Më 1 dhe 2 qershor 2026, Shkupi do të shndërrohet në qendrën e dialogut rajonal për të ardhmen energjetike dhe klimatike të Evropës Juglindore, përmes edicionit të nëntë të MEF Energy Forum 2026, një nga ngjarjet më të rëndësishme në fushën e energjisë dhe zhvillimit të qëndrueshëm në rajon.

Në kushtet e një transformimi gjithnjë e më intensiv klimatik dhe energjetik, fokusi nuk është më nëse ndryshimet do të ndodhin, por si do të realizohen ato, me çfarë ritmi dhe sa të drejta do të jenë për qytetarët dhe ekonomitë. Pikërisht për këtë arsye, forumi paraqet një platformë të rëndësishme që bashkon vendimmarrës, rregullatorë, investitorë, organizata ndërkombëtare dhe përfaqësues të shoqërisë civile, theksojnë organizatorët.

Gjatë viteve të fundit, MEF është konsoliduar si një nga platformat kryesore rajonale për diskutim dhe hartim politikash në fushën e energjisë dhe ndryshimeve klimatike. Edicioni i sivjetshëm merr peshë shtesë pasi forumi do të jetë një ngjarje zyrtare partnere në kuadër të presidencës së COP31.

Organizatorët theksojnë se përfundimet dhe rekomandimet që do të dalin nga forumi nuk do të kenë rëndësi vetëm për vendet e rajonit, por do të kontribuojnë edhe në debatet më të gjera ndërkombëtare për politikat klimatike dhe tranzicionin energjetik.

Ngjarja organizohet në partneritet me Delegacionin e Bashkimit Evropian në Maqedoninë e Veriut dhe Ministrinë e Mjedisit Jetësor dhe Planifikimit Hapësinor.

“Sfidat e sotme nuk njohin kufij, prandaj edhe përgjigjja duhet të jetë e përbashkët. Bashkëpunimi rajonal është kyç për qëndrueshmërinë klimatike, stabilitetin energjetik dhe zhvillimin e qëndrueshëm. MEF është një mundësi për partneritete të reja dhe zgjidhje konkrete me efekt real për qytetarët”, deklaroi ministri Muhamet Hoxha.

Një theks i veçantë do t’i kushtohet bashkëpunimit rajonal si parakusht për qëndrueshmërinë klimatike, stabilitetin energjetik dhe zhvillimin e qëndrueshëm ekonomik. Forumi do të mundësojë lidhjen e përfaqësuesve qeveritarë, kompanive dhe institucioneve financiare nga Ballkani Perëndimor, Turqia, Bashkimi Evropian dhe partnerë të tjerë globalë.

Sipas organizatorëve, MEF Energy Forum 2026 nuk është vetëm një konferencë, por një hapësirë ku politikat lidhen me sfidat reale, ndërsa ambiciet klimatike shndërrohen në iniciativa dhe zgjidhje konkrete. Kështu, këtë verë Shkupi do të jetë vendi ku do të zhvillohen diskutimet kyçe për të ardhmen energjetike të rajonit.

Ish-kryeministri Nikolla Gruevski, i cili nga viti 2018 jeton në Hungari, prej disa vitesh ka të regjistruar një kompani konsulence përmes së cilës siguron të ardhura nga shërbimet e biznesit, njoftoi portali hungarez “444”.

Sipas të dhënave që transmeton ky portal, Gruevski në vitin 2021 ka themeluar kompaninë “I.C.I.C Kft.”, e regjistruar për aktivitete konsulence. Bëhet fjalë për një kompani të vogël pa punonjës, e cila vepron në fushën e këshillimit për biznes dhe menaxhim.

Pasqyrat financiare tregojnë se kompania në vitin 2025 ka realizuar të ardhura prej rreth 9.600 euro, përkatësisht 3,4 milionë forinta hungareze.
Në vitin 2024, të ardhurat kanë qenë pak më të larta dhe kanë arritur në rreth 11.600 euro, respektivisht 4,1 milionë forinta.

Sipas të dhënave të publikuara, kompania në vitin 2025 ka përfunduar me një fitim prej rreth 5.650 euro, ose pothuajse 2 milionë forinta. Edhe pse të ardhurat nuk janë të larta, ato tregojnë se firma ka një aktivitet të vazhdueshëm që nga themelimi i saj.

Mediumi hungarez shton se të ardhurat e rregullta mund të tregojnë për një klient të përhershëm ose për një rreth të kufizuar klientësh, por në të dhënat e disponueshme nuk specifikohet se kush i shfrytëzon shërbimet e kësaj kompanie.

Ky informacion publikohet në një periudhë kur sërish është hapur çështja e statusit juridik të Gruevskit në Hungari. Portali hulumtues “VSquare” njoftoi se ish-kryeministri dyshohet se ka marrë shtetësinë hungareze në vitin 2022, bazuar në interesin shtetëror hungarez.

Një informacion i tillë deri më tani nuk ka ndonjë konfirmim zyrtar publik nga autoritetet hungareze. Kryeministri Hristijan Mickoski deklaroi se Qeveria nuk ka informacion zyrtar nëse Gruevski posedon shtetësi hungareze.

Nga Ministria e Drejtësisë njoftuan se Gruevski vazhdon të jetë shtetas i Maqedonisë së Veriut dhe se institucionet po i vijojnë procedurat lidhur me ekstradimin e tij, në përputhje me legjislacionin vendas, marrëveshjet dypalëshe dhe konventat ndërkombëtare.

Rasti mbetet aktual për shkak të procedurave gjyqësore që po zhvillohen në Maqedoni, si dhe për shkak të pyetjeve lidhur со statusin dhe qëndrimin e tij në Hungari.(INA)

Një aksident i rëndë trafiku ka ndodhur mbrëmë në rrugën e Plastikave në Shkup, ku janë përplasur një veturë dhe një motoçikletë.

Menjëherë pas aksidentit, në vendngjarje kanë mbërritur ekipet e Ndihmës së Shpejtë, të cilat kanë ndërmarrë përpjekje për reanimimin e të riut 19 vjeçar i cili ka drejtuar motoçikletën dhe më pas e kanë transportuar me urgjencë drejt Spitalit të Qytetit.

Megjithatë, pavarësisht përpjekjeve të mjekëve për ta shpëtuar, vdekja e M.F. është konstatuar në orën 23:11.

Policia ka bllokuar pjesërisht segmentin rrugor ku ndodhi aksidenti dhe ka kryer këqyrjen e vendit të ngjarjes për të përcaktuar shkaqet dhe rrethanat e plota të aksidentit. Hetimet janë në vazhdim.