Lajme

Dëme prej qindra mijëra eurosh nga vjedhja e kabllove, Prokuroria me aktakuzë ndaj tre personave

Prokuroria Themelore Publike e Shkupit, pas përfundimit të hetimeve, ka ngritur sot aktakuzë ndaj tre personave, të cilët si bashkëkryerës kanë kryer veprën penale – “vjedhje e rëndë” nga objekte të instalimeve publike me rëndësi të veçantë për sigurinë e njerëzve dhe pasurisë.

Të akuzuarit, së bashku me persona të tjerë ende të paidentifikuar, në periudhën nga marsi deri në fillim të majit të këtij viti, nga rrethi i fabrikës “Zhelezara” në Shkup – konkretisht nga objekti i “Polukonti–IGM” dhe nga tunelët nëntokësorë ku kalojnë kabllot e furnizimit me energji elektrike – kanë marrë disa kilometra kabllo të tensionit të lartë dhe të mesëm, pronë e kompanive A.D. ESM – Termocentralet e RMV-së – dega energjetike Shkup dhe “Makstil” A.D. Shkup, me vlerë të përgjithshme rreth 440 mijë euro.

Në disa raste, përmes hapjeve me shkallë që çonin në tunelët nëntokësorë, të akuzuarit hynin nga fabrika e “Polukonti–IGM” dhe, pasi siguroheshin me pajisje se kabllot nuk ishin nën tension, i prisnin me sharrë elektrike dhe i grumbullonin pranë hyrjes së tunelit. Si pasojë e veprimeve të tyre, më 9 prill shpërtheu zjarr në nënstacionin “TS Jug”, duke shkaktuar dëm shtesë në instalimet publike, për riparimin e të cilave u deshën mbi 100 mijë euro. Gjithashtu, gjatë periudhës së sanimit të defekteve, nuk u realizua prodhimi dhe shpërndarja e planifikuar e energjisë elektrike për konsumatorët fundorë, me dëm prej rreth 60 mijë eurosh.

Më 6 maj, tre të akuzuarit u kthyen sërish në objekt me një automjet “Volkswagen Golf” për të përgatitur kabllot për transport, por gjatë manipulimit me kabllot, njëri prej tyre u lëndua. Të tre shkuan fillimisht në Qendrën Urgjente “Nëna Terezë”, ku i plagosuri mori ndihmën mjekësore të nevojshme. Pas kësaj, ata u kthyen në vendngjarje për të marrë veglat e lëna, por u kapën dhe u arrestuan menjëherë pas daljes nga rrethi i “Zhelezarës”.

Prokurori publik i ka propozuar Gjykatës Themelore Penale të Shkupit që të vazhdojë masën e paraburgimit për të tre të akuzuarit, pasi ende ekziston rreziku i arratisjes, mundësia e ndikimit mbi dëshmitarët dhe rreziku për përsëritjen e veprës penale – arsye për të cilat masa e paraburgimit ishte kërkuar dhe vendosur fillimisht.

Lajme

4 gra të vrara nga partnerët gjatë këtij viti!

Këtë vit, 4 gra janë vrarë nga ish-ose partnerët e tyre aktualë. Në periudhën nga 2014 deri në 2024, gjithsej 115 gra janë viktima të femicidit, pra vrasjeve dhe tentativave për vrasje. Shteti duhet të angazhohet jo vetëm deklarativisht, por realisht për parandalimin dhe ri-integrimin e grave, viktima të dhunës së bazuar në gjini – thonë nga Rrjeti Kombëtar kundër dhunës ndaj grave dhe dhunës familjare.

“Këtë vit ndodhën 4 femicide, sepse të gjithë autorët ishin partnerë, aktualë ose ish-partnerë të grave të vrara. Në periudhën paraprake nga 2014 deri në 2024, kemi gjithsej 115 vrasje, por këtu përfshihen edhe tentativat për vrasje të grave. Ajo që po bëjmë tani është të analizojmë rastet gjyqësore të përfunduara me vendime të formës së prerë për të parë sa nga këto 115 vrasje dhe tentativa janë femicide”, tha Elena Dimushevska, Rrjeti kombëtar kundër dhunës ndaj grave dhe dhunës familjare.

Ata thonë se ri-integrimi është më i rëndësishmi. Megjithatë, edhe pse ligji ka hyrë në fuqi në maj 2021 dhe ri-integrimi është parashikuar në të gjitha shtyllat, shteti nuk është i përkushtuar në këtë çështje. Pasi nuk ka ndihmë nga shteti për ri-integrimin e viktimave, shumë prej tyre kthehen sërish tek partneri. Eksperiencat e tyre tregojnë se shtëpia nuk është vendi më i sigurt për gratë viktima të dhunës, madje 70 për qind e vrasjeve ndodhin aty.

“Dhunën ndaj grave nuk mund ta parandalojmë nëse nuk parashikojmë fonde financiare për shërbimet që u nevojiten më së shumti viktimave. Ajo që ekziston tani është një ndihmë vetëm një herë monetare, do të theksoj vetëm një herë, në shumën prej 15.000 denarësh. Dhe ajo nuk varet nga të ardhurat ose gjendja financiare e viktimës. Por kjo është e vetmja gjë që viktimat mund të marrin në këtë moment si ndihmë nga shteti”, u shpreh Elena Dimushevska, Rrjeti kombëtar kundër dhunës ndaj grave dhe dhunës familjare.

Rrjeti ofron ndihmë financiare për viktimat, përfshirë qiranë e banesës, mbulimin e shpenzimeve të ujit, rrymës dhe blerjen e ushqimit, por thonë se buxhetet e tyre janë të kufizuara dhe nuk mund të mbulojnë shpenzimet për të gjitha gratë dhe në një afat më të gjatë. Llogaritjet e tyre tregojnë se për një grua janë të nevojshme të paktën 25.000 deri në 30.000 denarë në muaj.

Lajme

Zjarri në Çarshinë e Vjetër të Shkupit vihet nën kontroll

Zjarri që shpërtheu sonte në një shtëpi të vjetër pranë kishës “Shën Spasi” në hyrje të Çarshisë së Vjetër të Shkupit është nën kontroll. Shkaku i zjarrit ende nuk dihet, dhe ekipet e Ministrisë së Brendshme do të kryejnë një inspektim.

“Në orën 19:43, u mor një njoftim për një zjarr në një shtëpi të braktisur në rrugën “Samoilova”. Menjëherë u dërguan tre automjete zjarrfikëse, të cilat me të mbërritur gjetën një zjarr në një fazë zhvillimi. Flakët ishin përhapur përtej strukturës së çatisë dhe dimensioneve të vetë ndërtesës”, tha Zvonko Tomevski, komandant i Departamentit të Zjarrfikësve të Shkupit.

Pastaj, siç deklaroi ai, u dërguan dy automjete shtesë dhe 20 zjarrfikës janë në vendngjarje duke ndërhyrë.

“Zjarri u vu nën kontroll në një kohë të shkurtër. Ndërhyrja ishte e suksesshme dhe zjarri nuk u lejua të përhapet në objektet fqinje. Tani po punohet për shuarjen e zjarrit dhe pastrimin e zonës, tha Tomevski.

Shkaqet e zjarrit, siç tha ai, duhet të përcaktohen më tej nga policia.

Sipas informacioneve jozyrtare, në shtëpinë tanimë të djegur shumë shpesh janë mbledhur njerëzit e pastrehë.

Lajme

Kasami: Gostivari gati për ndryshimin e madh

Kryetari i Tetovës dhe kryetar i Lëvizjes Besa Bilall Kasami ka qëndruar në Tetovë bashkë me liderët e tjerë të VLEN-it duke siguruar se edhe në këtë komunë do ta fitojnë pushtetin lokal sikurse në dhjetë komunat e tjera.

“Gostivari gati për ndryshimin e madh më 11 janar!

Gostivari VLEN! 🫶”, ka shkruar Bilall Kasami në Fejsbuk ku ka shpërndarë fotografi nga takimi me strukturat lokale të koalicionit dhe qytetarë.

Zgjedhjet lokale në Gostivar dhe Vrapçisht mbahen më 11 janar, pasi më 18 tetor dështoi të arrihej censusi në këto dy komuna. Qeveria ka caktuar Fadil Xhelilin si ushtres detyre kryetar i Gostivarit deri në zgjedhje, ndërsa ushtrues detyre në Vrapçisht u caktua Bujamin Kadriu.

Në zgjedhjet lokale në vjeshtë, VLEN fitoi 10 komuna, përfshirë komunat kryesore me shumicë shqiptare.