Lajme

Fluturojnë çmimet e vezëve – Një vezë mbi 12 denarë

Çmimi i vezëve është rritur në mënyrë të shpejtë. Në markete, një vezë kushton mbi 12 denarë, ndërsa në tregje mund të gjendet vetëm një denarë më lirë kursim që vështirë se i ndihmon qytetarët, shkruan Alsat.

Ndërkohë, vezët e fshatit që shiten në treg, janë bërë thuajse luks. Çmimi i tyre shkon nga 18 deri në 25 denarë dhe sipas shitësve është gjithnjë e më e vështirë të gjenden në shitje pasi blerja e vezëve të fshatit bëhet me parapagesë.

“Sa kushtojnë? Varet, këto janë nga 20 dhe 25 denarë. Pra veç më janë shtrenjtuar vezët? Po janë shtrenjtuar pasi gruri është 22 denarë për një kilogram, pra çmimi i vezëve të fshatit shkon nga 20 deri në 25 denarë. Varet por çmimi më i lirë është 18 apo 20 denarë dhe më nuk ka, jo nuk ka”, tha një shitës.

Çmimi i vezëve në treg sot ishte një denarë më lirë se në markete, por përsëri për një karton vezësh me 30 copë, çmimi fillonte nga 320 deri në 350 denarë. Qytetarët thonë se çmimet janë të pa përballueshme ndërsa kërkojnë kontrolle më të rrepta nga institucionet kur behet fjalë për çmimeve

“Si u duken çmimet që janë 350 denarë? Shtrenjtë janë por çfarë të bëjmë, ai punon që të fitoje e ne duhet të blejmë dhe të hamë, kjo është”, u shpreh një qytetar.

“Çmimet janë të larta dhe pagat janë të ulëta. Për dikë që nuk punon e jeton me tetë mijë denarë, çfarë të bëje me aq, as për bukë nuk mjaftojnë”, tha një qytetar tjetër.

“Më parë ishin 280 denarë por tani janë 320, shtrenjtë janë por çfarë të bëjmë”, theksoi një qytetar.

“Çfarë është kjo, jo vetëm vezët por edhe produktet tjera, katastrofë”, tha një qytetar.

Sa i përket rritjes së çmimit të vezëve, nga Ministria e Ekonomisë thonë se çmimi i tyre varet kryesisht nga produktet e tregut global të aksioneve, siç është soja që përdoret për prodhimin e ushqimit për pula, gjë që e bën çmimin të jetë i varur nga luhatjet në treg.

“Çmimi i vezëve varet kryesisht nga produktet e tregut global të aksioneve, siç është soja që përdoret për prodhimin e ushqimit për pula, gjë që e bën çmimin të jetë i varur nga luhatjet në treg. Megjithatë, institucionet mbeten të përkushtuara për të kontrolluar dhe monitoruar çmimet dhe për të mbrojtur interesat e konsumatorëve”, thonë nga Ministria e Ekonomisë.

Nga Ministria e Ekonomisë shtojnë se çmimet monitorohen vazhdimisht përmes Inspektoratit të Tregut dhe se reagojnë në mënyrë aktive sa herë që është e nevojshme. Ndërkohë, deri sa të ketë ulje të çmimit, qytetarët do të detyrohen që vezët t’i konsiderojnë si ushqim luksi./ Alsat.mk

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.