Lajme

VLEN: Ironia ka emër – BDI s’mund të japë leksione për sundimin e ligjit

Koalicioni VLEN ka reaguar ashpër ndaj deklaratave të sotme të zëdhënësit të BDI-së, Arbër Ademi, lidhur me “dështimin në sundimin e ligjit”, duke e cilësuar këtë dalje si shembull të “shkëputjes së BDI-së nga realiteti”.

Në reagimin e tyre, VLEN thekson se është “ironike dhe e pabesueshme” që një parti e cila, sipas tyre, ka gjysmën e kryesisë në listat e zeza për korrupsion, të mbajë ligjërata për standarde evropiane dhe sundimin e ligjit.

“BDI është arsyeja kryesore pse vendi për vite të tëra nuk ka lëvizur përpara në detyrimet e Klasterit I. Një parti që për 20 vite e ktheu kapjen e shtetit në art, sot shtiret si moraliste”, thuhet në reagim.

VLEN akuzon BDI-në për politizim të gjyqësorit, duke pretenduar se:

gjykatat janë shndërruar në “filial të BDI-së”,

vendimet “merreshin në korridoret partiake”,

ndryshimet e Kodit Penal janë bërë “për amnisti të të korruptuarve”.

Sipas tyre, vetë Bashkimi Evropian ka konstatuar problemet e qeverisjes së kaluar, duke kujtuar raportin e Priebe-s, i cili e përshkruante qeverisjen Gruevski–Ahmeti si “shembull klasik të kapjes së shtetit”, me raste të montuara politike dhe padrejtësi sistemike që çuan në “mijëra shqiptarë të dëbuar nga vendi”.

Koalicioni VLEN riafirmon se është për financim të pavarur dhe funksionim real të gjyqësorit, si dhe për mekanizma të fortë të llogaridhënies, “që drejtësia t’u shërbejë qytetarëve dhe askujt tjetër”.

Lajme

Deputetja Imerlije Saliu në Haxh: Falë mirësisë së Zotit këtë vit mu dha mundësia t’i përgjigjem thirrjes hyjnore

Deputetja e koalicionit VLEN, , ka bërë të ditur se këtë vit po kryen Haxhin, një nga obligimet më të rëndësishme fetare për besimtarët myslimanë.

Përmes një postimi nga vendet e shenjta në Arabinë Saudite, Saliji shprehu mirënjohjen që iu dha mundësia t’i përgjigjet thirrjes për këtë udhëtim shpirtëror, duke cituar fjalët e njohura të telbijes: “Lebbejke Allahumme Lebbejk, Lebbejke la sherike leke Lebbejk”.

Ajo tha se nata në Arafat, vend që në traditën islame njihet si vendi i takimit të parë mes Ademit dhe Havasë, e bën njeriun të kuptojë më thellë madhështinë e Krijuesit dhe përkohshmërinë e kësaj bote.

“Edhe pse kisha mundësinë ta përjetoja Haxhin në rrethana shumë më komode, zgjodha ta përjetoj si çdo besimtar tjetër, sepse Arafati ta rikujton fuqishëm se para Zotit nuk ka dallim pozite, pasurie, kombi apo titulli. Aty të gjithë qëndrojmë njësoj, vetëm si robër të Zotit”, shkroi Saliji.

Në mesazhin e saj, deputetja u lut që Allahu t’i pranojë lutjet e besimtarëve, t’u dhurojë zemra të qeta dhe faljen e Tij, duke kujtuar edhe thënien e Profetit Muhamed (paqja qoftë mbi të): “Haxhi është Arafat”.

Lajme

Çairi bëhet me pishinë të re

Kryetari i komunës së Çairit, Izet Mexhiti, ka njoftuar për hapjen e pishinës në Çair, një projekt që sipas tij ka kushtuar 1 milion euro.
Mexhiti, ka thënë se ata po realizojnë një nga një projektet të cilat i kanë realizuar.
“Pishina sportive, me investim prej 1 milion eurosh, sot hap dyert. Një projekt i madh që për shumë kohë ka qenë nevojë dhe kërkesë e qytetarëve, e që sot bëhet realitet.
Premtim pas premtimi, po i realizojmë. Një nga një. Çdo projekt që kemi zotuar ka hyrë në rrugën e realizimit dhe çdo ditë po dëshmojmë se puna, përkushtimi dhe përgjegjësia japin rezultate. Javë pas jave, bashkë me qytetarët, po përurojmë vepra që mbeten. Si sot këtë pishinë sportive.
Kjo është qeverisja jonë. Ky është VLEN. Fjalët i kthejmë në punë, ndërsa zotimet në rezultate.
Urime!”, ka shkruar Mexhiti.

Lajme

Deputeti Bytyqi: Qytetarët do të paguajnë mbi 60 milionë euro vetëm kamatë për borxhin e ri

Deputeti i LSDM-së, Fatmir Bytyqi, në konferencën e sotme për shtyp në Kuvend, tha se huamarrja e re qeveritare prej 260 milionë eurosh do të jetë shumë më e shtrenjtë, duke marrë parasysh normën e lartë të interesit, me shtetin që paguan midis 58 dhe 64 milionë euro vetëm për interesa.

Bytyqi theksoi se çmimi për huamarrje kaq të shtrenjtë do të paguhet nga qytetarët edhe para se të ndihet ndonjë efekt ekonomik.
“Sipas EURIBOR-it aktual gjashtëmujor prej 2.562% dhe marzhit të dakorduar prej 2.10 pikë përqindjeje, kjo kredi aktualisht do të kushtojë rreth 4.66% në vit. Në varësi të orarit përfundimtar të shlyerjes, shteti do të paguajë afërsisht midis 58 dhe 64 milionë euro vetëm për interesa, dhe me tarifën e njëhershme prej 3.64 milionë eurosh, barra e drejtpërdrejtë financiare varion nga 61 deri në 67 milionë euro, pa kosto shtesë të agjencisë dhe kosto të tjera. Ky është çmimi i vërtetë që qytetarët do të paguajnë edhe para se të ndiejnë ndonjë efekt ekonomik”, tha Bytyqi.

Në të njëjtën kohë, Bytyqi theksoi se paratë nga borxhi i ri nuk do të përdoren për të përmirësuar standardin e jetesës së qytetarëve, por për tenderët kriminalë të Qeverisë.
“Gjëja më e frikshme është se këto para nuk shkojnë te qytetarët, nuk shkojnë për një standard më të lartë, por për tenderët partiakë, kompanitë e preferuara dhe luksin e qeverisë. Prandaj, LSDM, siç njoftoi, do ta kundërshtojë këtë borxh”, tha Bytyqi.