Lajme

Burg dhe konfiskim të veturës, miratohet ligji për siguri në komunikacion

Janë miratuar ndryshimet ligjore: kush vozit i dehur, nën ndikimin e drogave ose me shpejtësi të tepruar, do të shkojë në burg dhe do të mbetet pa veturë.

Deputetët në Kuvendin e Maqedonisë së Veriut miratuan ndryshimet ligjore të nevojshme që sistemi “Qytet i Sigurt” të funksionojë plotësisht.

U votuan ndryshimet në Ligjin për Automjete, Ligjin për Policinë, Ligjin për Ekzekutimin e Sanksioneve dhe Ligjin për Sigurinë e Komunikacionit, ndërsa ndryshimet në Ligjin për Kundërvajtje janë ende në lexim të dytë. Paralelisht, janë propozuar edhe ndryshime në Kodin Penal, me qëllim harmonizimin me paketën e re të masave.

Rregullat e reja e rregullojnë në detaje procedurën – nga evidentimi i kundërvajtjes, njoftimi i shkelësit, e deri te shqiptimi i sanksioneve më të rënda. Sistemi “Qytet i Sigurt” pritet të funksionojë plotësisht nga 1 shkurti.

Sipas ndryshimeve ligjore, një shofer që brenda katër viteve merr tri herë ndalim të formës së prerë për drejtimin e automjetit të së njëjtës kategori, do të mbetet pa leje drejtimi. Gjykata do t’ia heqë lejen dhe shkelësi nuk do të ketë të drejtë të japë sërish provimin e vozitjes për së paku një vit.

Pas marrjes së vendimit gjyqësor, ai i dërgohet Ministrisë së Punëve të Brendshme, pas së cilës shoferi njoftohet përmes SMS-it ose emailit se leja e drejtimit pushon së vlefshmi brenda tetë ditësh. Ndalimi për drejtimin e automjetit mund të zgjasë nga një muaj deri në një vit, ndërsa të dhënat për masat e shqiptuara do t’u jenë të qasshme edhe shërbimeve kufitare.

Për shtetasit e huaj me leje drejtimi të huaj, ndalimi do të vlejë në territorin e shtetit dhe për këtë do të njoftohet edhe policia kufitare.

Risi ka edhe për të dhënat e kontaktit. Çdo pronar automjeti që ndryshon numrin e telefonit ose adresën elektronike, duhet t’i përditësojë këto të dhëna brenda tre ditësh në stacionin e kontrollit teknik. Nëse nuk e bën këtë, pason gjobë prej 100 eurosh, ndërsa janë paraparë dënime edhe për personat juridikë, sipas madhësisë së tyre.

Shkelësit do të marrin SMS dhe email me procesverbal dhe fotografi të kundërvajtjes së kryer. Ata kanë të drejtë ankese në gjykatë, ndërsa nëse gjobën e paguajnë brenda tetë ditësh, paguajnë vetëm gjysmën e shumës.

Me ndryshimet rregullohet më tej edhe sistemi i pikëve negative, ndërsa në Ligjin për Sigurinë e Komunikacionit futet tolerancë gjatë matjes së shpejtësisë, ku nga vlera e matur do të zbritet marzhi i gabimit të pajisjes.

Vendoset ndalim i plotë për drejtimin e automjetit nën ndikimin e drogave dhe substancave psikotrope. Autoshkollat marrin detyrime shtesë, ndërsa kandidatët për instruktorë, ligjërues, kontrollorë dhe provues do të duhet të japin provim profesional para një komisioni në MPB. Ligji i përcakton më saktë edhe zonat me komunikacion të qetësuar, duke futur “zonë shkollë” dhe “zonë 30”.

Ndryshime të rëndësishme parashihen edhe në Kodin Penal. Për vepra të rënda penale në komunikacion, gjykata detyrimisht do të shqiptojë ndalim për drejtimin e automjetit nga gjashtë muaj deri në dhjetë vjet. Po ashtu, gjykata do të mund t’ia konfiskojë automjetin shkelësit nëse ka kryer vepër të rëndë penale në komunikacion dhe më parë ka qenë i dënuar për vepra të ngjashme.

Dënime me burg nga tre muaj deri në tre vjet dhe gjoba financiare parashihen për vozitje me mbi 1.5 promil alkool në gjak, për vozitje nën ndikimin e drogave, për lëvizje në kah të kundërt, për parakalim në vende të papërshtatshme ose për tejkalim të ndjeshëm të shpejtësisë së lejuar. Të njëjtat sanksione vlejnë edhe për organizimin ose pjesëmarrjen në gara të ndaluara, si dhe për drejtimin e automjetit pa provim të dhënë ose pa leje drejtimi të vlefshme.

Lajme

Artan Grubit nesër i përfundon arresti shtëpiak

Ish zëvendëskryeministrit të parë Artan Grubi nesër i mbaron arresti shtëpiak. Vendimi ekzekutohet sipas fuqisë së ligjit pasi kalojnë 60 ditë nga dita e dorëzimit të propozim-akuzës. Megjithatë, Grubi i cili gati 8 muaj ka qëndruar në arrest shtëpie kërkon që t’i kthehet edhe pasaporta. Për këtë ka ofruar prona si garanci në vlerë mbi 335 mijë euro. Nga Gjykata Penale e Shkupit theksojnë shkurt për Alsat se për këtë propozim ende nuk kanë vendosur pasi e presin mendimin nga Prokuroria, e cila pritet që ta japë gjatë kësaj jave.

Ndërkohë vazhdon gjykimi për Grubin lidhur me keqpërdorimet në “Lotarinë Shtetërore”, megjithatë për dallim nga herët e kaluara, Grubi do të paraqitet në Gjykatë pa shoqërim policor.

Grubi gjykohet për “keqpërdorimin e detyrës zyrtare” pasi ka udhëhequr mbledhjen e Qeverisë ku është miratuar pika e rendit të ditës për nisjen e organizimit të pavarur të lojërave elektronike të fatit, ndonëse sipas Prokurorisë kjo nuk ka qenë e ligjshme. Sipas tyre, këtë e ka bërë në bashkëpunim me të akuzuarin e parë, ish drejtorin Përparim Bajrami.

Me këtë, Prokuroria pretendon se Grubi ka hapur rrugën që Lotaria Shtetërore t’i blejë VLT aparatet në vlerë mbi 9,7 milionë euro edhe pse të njëjtat nuk kanë qenë të nevojshme.

Pretendimet e këtilla Grubi i ka hedhur poshtë nën arsyetimin se për vendimin në mbledhje të Qeverisë kanë votuar 20 anëtarë, të gjithë “për”. Nga ana tjetër, teza e mbrojtjes së Grubit, por edhe të akuzuarve të tjerë është se ata kanë mbrojtur interesin shtetëror, me qëllim që përfitimi të shkojë direkt te Lotaria Shtetërore dhe jo të ndahet me partnerë të tjerë.

Lënda u hap në dhjetor të vitit 2024, rreth një javë pasi Shtetet e Bashkuara të Amerikës e futën në Listë të Zezë për korrupsion së bashku me ish gjyqtarin e Apelit Enver Bexheti. SHBA-ja i akuzoi për përfshirje në korrupsion të rëndësishëm, duke pretenduar se kishin pranuar ryshfet për të penguar proceset gjyqësore të lidhura me dënimin e ish shefit të Policisë Sekrete Sasho Mijallkov.

Megjithatë, Artan Grubi u largua nga Maqedonia më 15 dhjetor, duke kaluar pikën kufitare të Bllacës drejt Kosovës. Pas alarmit për arratisje, Grubi njoftoi në Facebook se ka udhëtuar për vizitë private dhe sapo t’i kryejë obligimet do të kthehet në shtëpi.

Megjithatë, obligimet e Grubit zgjatën mbi 14 muaj, për çka shteti shpalli fletëarrest të brendshëm ndërkombëtar. Në mëngjesin e 23 shkurtit, Grubi në Maqedoni hyri nga kishte dalë. Nëpër media dolën filmimet në të cilat shihej Grubi me pranga, pasi ishte vetëdorëzuar. Prej Pikës Kufitare Bllacë, Grubi dërgohet në Burgun e Shutkës, megjithatë vetëm pas disa orësh ai dërgohet në shtëpi pasi organet e sigurisë kishin alarmuar se rrezikohet jeta e Grubit në paraburgim. Për vendimin e këtillë pati reagime të ashpra në opinion.

Lajme

Astrit Iseni pas suspendimit të gjashtë policëve: Askush nuk është mbi ligjin

Gjashtë policë janë suspenduar pas dhunës brutale të ushtruar ndaj dy të rinjëve nga Saraji, Institucionet reaguan në kohë rekord, rasti nuk u la pa përgjigje, kështu deklaroi zëvendësministri i Punëve të Brendshme, Astrit Iseni, nga VLEN, I cili theksoi se MPB-ja ka kryer pjesën e saj të punës, ndërsa procedurat e mëtejshme i udhëheq Prokuroria. Sipas tij dhuna policore nuk ka vend në vendin tone dhe se uniforma është për ta mbrojtur qytetarin, jo për ta rrahur.

Iseni tha se sapo dolën pamjet, opozita shqiptare ka tentuar ta kthente dhunën ndaj dy të rinjve në betejë politike. Ku sic tha Iseni filluan akuzat, propaganda dhe përpjekjet për t’i dhënë ngjyrim etnik këtij rasti.

ASTRIT ISENI-ZËVENDËSMINISTËR I PUNËVE TË BRENDSHME

“Nuk harrohet “Sopoti”, ku i latë njerëzit të kalben burgjeve. Nuk harrohet djegia e dyqaneve shqiptare, ndërsa ju vazhdonit të rrinit si dekor në pushtet. Nuk harrohet “Monstra”, as fyerja ndaj shqiptarëve me termin “indijanci”. Nuk harrohet vdekja e Rexhail Qerimit në burg. Nuk harrohet vrasja e Harun Aliut. Nuk harrohet as vrasja e Xhemail Rexhepit (Komandant Shqiponjës). Për të gjitha këto raste, dhe shumë të tjera, çka bëtë JU? Asgjë. Heshtët!”.

Iseni theksoi se BDI për njëzet vjet ishin në pushtet, dhe se gjatë qeverisjes së tyre kanë ndodhur ngjarjet makabre, ku shumë prej rasteve janë lidhur me veprimet e policisë dhe të institucioneve të drejtësisë. Ai gjithashtu shtoi se sado që BDI mundohen t’i fshehin me gomë nga memoria kolektive e shqiptarëve, nuk do t’ia dalin sepse sic tha ai shqiptarët e mbajnë mend mirë. Ju jeni parti me shumë mëkate, fund e krye, deklaroi Iseni.

Lajme

40 kamera të reja në funksion, “Safe City” shtrihet në pesë komuna!

Sistemi i kamerave “Safe City” ka nisur funksionimin edhe në rajonin e Ohrit, me rreth 40 kamera të vendosura në disa komuna dhe akse të rëndësishme rrugore.

Kamerat do të mbulojnë Ohrin, Strugën, Kërçovën, Debërcën dhe Dibrën, si dhe rrugët drejt pikës kufitare Qafasan, Shën Naumit dhe autostradën Ohër–Kërçovë.

Sistemi do të regjistrojë shkeljet në trafik, përfshirë tejkalimin e shpejtësisë, parkimin e parregullt dhe kalimin në semafor të kuq.

Nga policia u bëjnë thirrje shoferëve të respektojnë rregullat dhe kufizimet e shpejtësisë, me qëllim rritjen e sigurisë dhe uljen e aksidenteve rrugore.