Lajme

Një vit nga tragjedia në diskotekën në Koçan, ku humbën jetën 63 veta dhe mbi 200 të plagosur

Sot mbushet një vit pas tragjedisë në Kochani, ku në një zjarr në diskotekën diskotekën “Puls” më 16 mars 2025 humbën jetën 63 persona dhe mbi 200 të tjerë u plagosën.

Lidhur me përkujtimin e kësaj tragjedie, sot në Shkup u mbajt një konferencë për të përkujtuar viktimat dhe për të diskutuar mësimet institucionale pas një prej tragjedive më të rënda në historinë e fundit të vendit, përcjell INA.

Paralelisht, në Koçan u mbajt një liturgji për të ndjerët, ndërsa familjarët dhe qytetarët përkujtuan viktimat e zjarrit që shpërtheu gjatë një mbrëmjeje në diskotekë, ku sipas hetimeve në objekt kishte më shumë vizitorë se sa lejohej, përfshirë edhe të mitur, ndërsa ishin përdorur mjete piroteknike pa leje. Objekti, sipas autoriteteve, kishte funksionuar ilegalisht për më shumë se një dekadë, pa përmbushur kushtet minimale teknike dhe pa sistem adekuat kundër zjarrit.

Procesi gjyqësor për rastin është në vazhdim me aktakuzë ndaj 35 personave dhe tre kompanive, përfshirë ish-ministra të ekonomisë, ish-kryetarë komunash, inspektorë dhe zyrtarë të tjerë, ndërsa institucionet po përballen me presion publik për zbardhjen e plotë të përgjegjësive.

Duke folur në konferencë, kryeministri Hristijan Mickoski, deklaroi se në një shoqëri demokratike tragjeditë nuk duhet të mbeten pa përgjigje dhe se publiku ka të drejtë ta dijë të vërtetën. Ai tha se dita e zjarrit ishte ndër më të vështirat në jetën e tij si njeri dhe si kryeministër, duke theksuar se përgjigjen për pyetjen se kush është përgjegjës duhet ta japin prokuroria dhe gjykatat, e jo opinioni publik apo “gjykime të shpejta”. Sipas tij, familjet e viktimave kanë të drejtë të dinë si ndodhi tragjedia dhe institucionet kanë detyrimin të sigurojnë drejtësi përmes një procesi profesional dhe të pavarur nga presionet.

Në fjalimin e tij ai lexoi emrat e 63 viktimave dhe vlerësoi solidaritetin e mjekëve, ekipeve të shpëtimit, institucioneve dhe partnerëve ndërkombëtarë gjatë përpjekjeve për të shpëtuar të plagosurit. Mickoski paralajmëroi gjithashtu realizimin e projekteve infrastrukturore dhe zhvillimore për Koçanin dhe rajonin, me synimin që qyteti të ketë më shumë perspektivë për të rinjtë.

Ministri i Shëndetësisë, Azir Aliu, vlerësoi reagimin e shërbimeve shëndetësore në orët e para kritike pas zjarrit, duke falënderuar më shumë se 400 punonjës shëndetësorë nga sektori publik dhe privat që, sipas tij, bënë përpjekje të jashtëzakonshme për të shpëtuar jetë.(INA)

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.