Lajme

Shkup “Bit Pazar”: Personi i armatosur “terrorizon” një dyqan, një kazino dhe një bastore

Mbrëmja e djeshme ka qenë mjaft e tensionuar në zonën e Bit Pazarit në Shkup, ku një person i armatosur ka sfiduar hapur organet e rendit duke sulmuar tre objekte të ndryshme biznesi në një hark kohë prej më pak se 60 minutash.

Sipas njoftimit zyrtar nga Ministria e Punëve të Brendshme, seria e sulmeve ka nisur rreth orës 21:21, kur personi në fjalë, nën kërcënimin e pistoletës, ka hyrë në një dyqan me qëllim për të marrë xhiron ditore. Pasi nuk ka arritur të marrë paratë, ai ka sulmuar fizikisht pronarin e objektit, 61-vjeçarin me iniciale Z.V., dhe është larguar nga vendngjarja.
Pa kaluar as gjysmë ore, rreth orës 21:48, i njëjti skenar është përsëritur në një bastore sportive në të njëjtën zonë. Këtë herë, personi i armatosur ka arritur të frikësojë punonjësen dhe të marrë me vete paratë e xhiros ditore.

Hovi kriminal i autorit nuk është ndalur me aq. Rreth orës 22:25, policia ka marrë denoncimin e tretë, këtë herë nga një kazino po në Bit Pazar. Edhe këtu, agresori ka tentuar të marrë paratë nën kërcënimin e armës, por pasi ka dështuar në qëllimin e tij, është dhënë në arrati.

Sektori për Punë të Brendshme (SPB) Shkup njofton se janë ndërmarrë të gjitha masat operative për identifikimin dhe kapjen e autorit, ndërsa po punohet intensivisht për dokumentimin e plotë të këtyre rasteve që kanë përhapur shqetësim te bizneset dhe banorët e zonës.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net