Lajme

Mbi 40 tonë vezë të paetiketuara nga Serbia asgjësohen

Mbi 40 tonë vezë të paetiketuara nga Serbia janë asgjësuar në deponinë Drisla, pasi u ndalua një tentativë për import të paligjshëm nga autoritetet.

Agjencia për Ushqim dhe Veterinari (AHV), në bashkëpunim me Administratën Doganore, zbuloi dy dërgesa me mbi 572 mijë vezë të fshehura në pikën kufitare Tabanoc.

Sipas autoriteteve, vezët synohej të etiketoheshin më pas dhe të shiteshin në mënyrë të rreme si produkte vendase.

AHV theksoi se me këtë aksion është parandaluar një mashtrim i madh dhe një rrezik potencial për shëndetin e konsumatorëve.

Ndaj subjekteve të përfshira do të ndërmerren masa përkatëse dhe do të zhvillohen kontrolle shtesë për aktivitetin e tyre.
Njoftimi i plotë nga Agjencia për Ushqim dhe Veterinari

“Shërbimet inspektuese dhe Departamenti për ndjekjen e mashtrimeve me ushqim pranë Agjencisë për Ushqim dhe Veterinari (AUV), në bashkëpunim të koordinuar me Doganën, gjatë javës së kaluar kanë parandaluar me sukses një tentativë për import të paligjshëm të dy dërgesave me vezë të paetiketuara nga Republika e Serbisë.

Në bazë të informacioneve operative dhe një ndjekjeje profesionale disamujore të aktiviteteve të importuesve dhe eksportuesve vendas të vezëve, në pikën kufitare Tabanoc është realizuar një aksion, ku gjatë kontrollit të detajuar janë zbuluar mbi 572 mijë vezë të freskëta të paetiketuara, të fshehura pas paletave të para me mall të deklaruar në mënyrë të rregullt.

Në njërën dërgesë janë gjetur 270 mijë, ndërsa në tjetrën 302.400 vezë të paetiketuara. Sipas të dhënave të AUV-së, këto produkte është dashur të etiketoheshin më pas dhe të plasoheshin në mënyrë të rreme si produkte vendore, duke rrezikuar drejtpërdrejt reputacionin dhe konkurrueshmërinë e prodhimit vendor.

Falë reagimit të shpejtë, profesional dhe të vendosur të AUV-së, është parandaluar një mashtrim serioz dhe një rrezik potencial për konsumatorët. Sasia totale prej 40 tonë e 410 kilogramë vezë është shpallur e pasigurt dhe është asgjësuar në mënyrë të padëmshme në deponinë Drisla.

AUV edhe një herë konfirmon rolin e saj kyç në mbrojtjen e sigurisë ushqimore dhe interesave të qytetarëve dhe prodhuesve vendas, duke mbetur e përkushtuar në luftën pa kompromis kundër mashtrimeve me ushqim, përmes kontrolleve dhe aktiviteteve të shtuara në terren. Për subjektet e përfshira në këtë rast do të shqiptohen masa përkatëse, si dhe do të pasojnë kontrolle shtesë për veprimtarinë e tyre të deritanishme”.

Lajme

Deputetja Imerlije Saliu në Haxh: Falë mirësisë së Zotit këtë vit mu dha mundësia t’i përgjigjem thirrjes hyjnore

Deputetja e koalicionit VLEN, , ka bërë të ditur se këtë vit po kryen Haxhin, një nga obligimet më të rëndësishme fetare për besimtarët myslimanë.

Përmes një postimi nga vendet e shenjta në Arabinë Saudite, Saliji shprehu mirënjohjen që iu dha mundësia t’i përgjigjet thirrjes për këtë udhëtim shpirtëror, duke cituar fjalët e njohura të telbijes: “Lebbejke Allahumme Lebbejk, Lebbejke la sherike leke Lebbejk”.

Ajo tha se nata në Arafat, vend që në traditën islame njihet si vendi i takimit të parë mes Ademit dhe Havasë, e bën njeriun të kuptojë më thellë madhështinë e Krijuesit dhe përkohshmërinë e kësaj bote.

“Edhe pse kisha mundësinë ta përjetoja Haxhin në rrethana shumë më komode, zgjodha ta përjetoj si çdo besimtar tjetër, sepse Arafati ta rikujton fuqishëm se para Zotit nuk ka dallim pozite, pasurie, kombi apo titulli. Aty të gjithë qëndrojmë njësoj, vetëm si robër të Zotit”, shkroi Saliji.

Në mesazhin e saj, deputetja u lut që Allahu t’i pranojë lutjet e besimtarëve, t’u dhurojë zemra të qeta dhe faljen e Tij, duke kujtuar edhe thënien e Profetit Muhamed (paqja qoftë mbi të): “Haxhi është Arafat”.

Lajme

Çairi bëhet me pishinë të re

Kryetari i komunës së Çairit, Izet Mexhiti, ka njoftuar për hapjen e pishinës në Çair, një projekt që sipas tij ka kushtuar 1 milion euro.
Mexhiti, ka thënë se ata po realizojnë një nga një projektet të cilat i kanë realizuar.
“Pishina sportive, me investim prej 1 milion eurosh, sot hap dyert. Një projekt i madh që për shumë kohë ka qenë nevojë dhe kërkesë e qytetarëve, e që sot bëhet realitet.
Premtim pas premtimi, po i realizojmë. Një nga një. Çdo projekt që kemi zotuar ka hyrë në rrugën e realizimit dhe çdo ditë po dëshmojmë se puna, përkushtimi dhe përgjegjësia japin rezultate. Javë pas jave, bashkë me qytetarët, po përurojmë vepra që mbeten. Si sot këtë pishinë sportive.
Kjo është qeverisja jonë. Ky është VLEN. Fjalët i kthejmë në punë, ndërsa zotimet në rezultate.
Urime!”, ka shkruar Mexhiti.

Lajme

Deputeti Bytyqi: Qytetarët do të paguajnë mbi 60 milionë euro vetëm kamatë për borxhin e ri

Deputeti i LSDM-së, Fatmir Bytyqi, në konferencën e sotme për shtyp në Kuvend, tha se huamarrja e re qeveritare prej 260 milionë eurosh do të jetë shumë më e shtrenjtë, duke marrë parasysh normën e lartë të interesit, me shtetin që paguan midis 58 dhe 64 milionë euro vetëm për interesa.

Bytyqi theksoi se çmimi për huamarrje kaq të shtrenjtë do të paguhet nga qytetarët edhe para se të ndihet ndonjë efekt ekonomik.
“Sipas EURIBOR-it aktual gjashtëmujor prej 2.562% dhe marzhit të dakorduar prej 2.10 pikë përqindjeje, kjo kredi aktualisht do të kushtojë rreth 4.66% në vit. Në varësi të orarit përfundimtar të shlyerjes, shteti do të paguajë afërsisht midis 58 dhe 64 milionë euro vetëm për interesa, dhe me tarifën e njëhershme prej 3.64 milionë eurosh, barra e drejtpërdrejtë financiare varion nga 61 deri në 67 milionë euro, pa kosto shtesë të agjencisë dhe kosto të tjera. Ky është çmimi i vërtetë që qytetarët do të paguajnë edhe para se të ndiejnë ndonjë efekt ekonomik”, tha Bytyqi.

Në të njëjtën kohë, Bytyqi theksoi se paratë nga borxhi i ri nuk do të përdoren për të përmirësuar standardin e jetesës së qytetarëve, por për tenderët kriminalë të Qeverisë.
“Gjëja më e frikshme është se këto para nuk shkojnë te qytetarët, nuk shkojnë për një standard më të lartë, por për tenderët partiakë, kompanitë e preferuara dhe luksin e qeverisë. Prandaj, LSDM, siç njoftoi, do ta kundërshtojë këtë borxh”, tha Bytyqi.