Lajme

Merko: Pse nuk më mbrojti BDI-ja, ndërsa të tjerët po?

Ish-kryetari i Komunës së Strugës nga radhët e BDI-së, Ramiz Merko ka shprehur revoltën e tij ndaj BDI-së, duke i akuzuar për standarde të dyfishta, pasi sipas tij ata nuk e kanë mbrojtur në rastet e kallëzimeve penale, ndërsa tani partia po mbron deputetin Blerim Bexheti dhe ish-kryetarin e komunës së Kërçovës, Fatmir Dehari.

Përmes një postimi në Facebook, ai ka reaguar duke thënë se ka ndjekur me vëmendje reagimet e BDI-së lidhur me kallëzimet penale ndaj Bexhetit dhe Deharit, për të cilat partia thotë se bëhet fjalë për presion politik, ndërsa ai vetë nuk ka pasur asnjë mbështetje partiake.
“Pse, Unë, Ramiz Merko nuk u mbrojt nga pushteti, ndërsa dy kryetarë po mbrohen nga opozita? Pse ky standard i dyfishtë? Deklaratat e fundit të BDI-së për presion politik ndaj ish-funksionarëve si Blerim Bexheti dhe Fatmir Dehari i kam ndjekur me vëmendje. Kërkesa për drejtësi të barabartë dhe mosndërhyrje politike në institucione është e drejtë dhe e nevojshme. Por pyetja që lind natyrshëm është: pse këto parime nuk vlejnë për të gjithë njësoj? Unë, si dikush që për më shumë se dy dekada kam qenë pjesë aktive e jetës politike, që kam mbajtur përgjegjësi institucionale dhe kam kontribuar në fitore të rëndësishme elektorale në Strugë dhe në zonën zgjedhore 5, e kam përjetuar drejtpërdrejt këtë standard të dyfishtë. Për vite me radhë kam qenë ndër zërat më të fuqishëm në terren, duke mbajtur gjallë strukturën dhe duke siguruar rezultate konkrete. Në disa cikle zgjedhore, pikërisht zona jonë ka bërë diferencën në balancën e mandateve. Por në momentin kur u përballa me procese gjyqësore, mbështetja mungoi. Përkundrazi, u krijua një distancim i hapur, madje deri në mohimin e lidhjes sime me strukturat. Dhe këtu lind problemi kryesor: standardi i dyfishtë. Sepse ndërkohë që sot flitet për presion politik ndaj disa ish-funksionarëve, për rastin tim nuk pati asnjë reagim, edhe pse proceset ndaj meje janë perceptuar gjerësisht si të motivuara politikisht nga periudha e qeverisjes LSDM-BDI. Akuzat ndaj meje nuk kanë qenë për korrupsion të provuar apo krime financiare, por për çështje administrative dhe vendimmarrje institucionale si emërime drejtorësh apo vendosje simbolesh që lidhen me historinë dhe identitetin shqiptar. Vendime që i kam marrë në funksion të përfaqësimit dhe mbrojtjes së gjuhës shqipe në institucione, si dhe për respektimin e ngjarjeve historike si një vlerë e njohur dhe e pranuar në nivel shtetëror. Megjithatë, këto u trajtuan si probleme, ndërkohë që në praktikë janë pjesë e përditshmërisë institucionale në vend. Dhe kontrasti bëhet edhe më i qartë kur shohim se në raste të tjera, për figura të nivelit të lartë si ish-zv.kryeministri Artan Grubi, reagimet janë të kujdesshme, të zbutura apo edhe mbrojtëse. Pra, në njërën anë relativizohen akuza të rënda për korrupsion, ndërsa në anën tjetër heshtet për procese që lidhen me vendimmarrje administrative dhe çështje identitare. Kjo nuk është më çështje individësh. Kjo është çështje parimesh. Nuk mund të kërkohet drejtësi e barabartë vetëm në raste të caktuara. Nuk mund të ketë mbështetje politike vetëm për disa dhe heshtje për të tjerët. Në këtë frymë, unë, Ramiz Merko, shpreh solidarizimin dhe mbështetjen time të fuqishme ndaj ish-funksionarëve si Blerim Bexheti, Fatmir Dehari, dhe të tjerë si Festimi, Ardiani, Sabaudini, Ejupi, Lirimi, Nefiu, Kreshniku etj, përballë çdo presioni apo procesi që perceptohet si i motivuar politikisht. Mbi të gjitha, qëndroj i palëkundur në mbështetje dhe solidarizim me të gjithë ata që sot përballen me presione të tilla, sepse drejtësia nuk mund të jetë selektive, ajo duhet të jetë e njëjtë për të gjithë”, ka shkruar Merko.

Lajme

MPB: Mos i hapni mesazhet e rrejshme për kinse gjoba në trafik

Ministria e Punëve të Brendshme paralajmëron se qytetarëve po u dërgohen mesazhe të rreme SMS me njoftime për kinse shkelje në trafik dhe gjoba që lidhen me sistemin “Safe City”.

Sipas MPB-së, mesazhet përmbajnë link përmes të cilave qytetarëve u kërkohet të japin të dhënat personale ose bankare dhe të paguajnë një gjobë të pretenduar. Kjo është përpjekje për mashtrim dhe mbledhje të dhënash të ndjeshme.
Ministria thekson se mesazhet zyrtare SMS për shkeljet dërgohen nga dërguesi “MVR-SC”. Mesazhi duhet të përfshijë targën e regjistrimit të automjetit, dhe lidhja zyrtare duhet të çojë në domenin safecountry.mvr.gov.mk.

Qytetarëve u kërkohet të mos hapin linqe të dyshimta dhe të mos japin numrat e kartave të pagesës, fjalëkalimet ose të dhëna të tjera personale nëse nuk janë të sigurt për vërtetësinë e mesazhit.

MPB rekomandon që çdo mesazh i dyshimtë të kontrollohet me kujdes, dhe çdo përpjekje e mundshme mashtrimi duhet të raportohet në institucionet kompetente.

Për më tepër, MPB kujton se mashtrime të tilla shpesh janë të dizajnuara të duken si njoftime zyrtare, në mënyrë që qytetarët të reagojnë shpejt dhe pa verifikim shtesë. Prandaj rekomandohet që gjithmonë të kontrolloni dërguesin, adresën e lidhjes dhe përmbajtjen e mesazhit përpara se të ndërmerrni ndonjë veprim.

Lajme

Nga pikëpagesat rrugore për pesë muaj janë arkëtuar mbi 31 milionë euro

Nga fillimi i këtij viti deri në qershor, nga pagesa e taksave në vend janë mbledhur një shifër rekord prej 1.919.775.277 denarë (mbi 31 milion euro), krahasuar me vitin e kaluar 2025 ku janë mbledhur 21.891.532 denarë më shumë, informuan për MIA-n nga Ndërmarrja Publike për Rrugë Shtetërore (NPRRSH).

Stacioni më i frekuentuar i pagesës është Tetova, vijon Petroveci, Ramanlia, Gllumova, Milladinovci, Zhelina, Gostivari, Stobi, Kadrifakova, Preodi, Sopoti, Demir Kapija, Otovica dhe Gjevgjelia.

Sipas mjeteve të mbledhura dhe çmimit të biletave të ardhura më të larta ka në Ramanli, pastaj Milladinovc, Petrovec, Gllumovë, Zhelinë, Tetovë, Stobi, Preodi, Gostivar, Sopot, Gjevgjeli, Kadrifakovë, Otovicë dhe Demir Kapi.

“Ndërmarrja Publike për Rrugë Shtetërore, sa herë që ka një vëllim të shtuar të trafikut në pikat pagesore dhe veçanërisht në sezonin e verës, Departamenti i mbledhjes së taksave harton një plan veprimi (orar) ku në secilën pikë pagesore në të dy korridoret, të gjitha korsitë e disponueshme vihen në funksion, natyrisht, përparësi i jepet njëlloj mbledhjes elektronike të taksave (ENP) në M-tag ku të paktën një korsi është gjithmonë në funksion – këto janë automjete që kalojnë pa u ndalur dhe mbledhjes elektronike të taksave M-card – këto janë automjete që nuk kanë kontakt me punonjës, pra kalim pa kontakt”, thonë nga NPRRSH.

Pjesëmarrja e mbledhjes elektronike të taksave në qarkullimin total është 36 për qind nga gjithsej 11 stacione të pikave pagesore ku është vendosur.

NPRRSH thekson se të dhënat mbi shitjen e pajisjeve elektronike dhe rimbushjen e tyre, veçanërisht pasi pajisjet M-tag janë gjithashtu të kapshme në pikat e shitjes së operatorëve, tregojnë se mbledhja elektronike e taksave është rritur për 6 për qind nga totali.

Që nga maji i këtij viti, M-tags mund të blihen edhe në rrjetin e shitjeve të “Telekomit të Maqedonisë” dhe “A1 Maqedoni”, ndërsa më parë ato ishin në dispozicion vetëm në NPRRSH ose në stacionin e taksave në Petrovec.

Udhëheqësia e NPRRSH gjatë promovimit të mundësisë së blerjes së M-tags nga operatorët celularë, informoi se po shqyrtojnë futjen e një modeli të mbledhjes së taksave si në Serbi, pra një sistem të mbyllur për mbledhjen e kilometrave të përshkuara. Për këtë qëllim, një studim është duke u zhvilluar tashmë për të futur një sistem të tillë taë pagesës në Korridorin 8.

Nga mbledhja e taksave në pikat pagesore vitin e kaluar (që nga 23 dhjetori) u arrit fitim prej 4.158.914.362 denarë (67,624,624 euro).

Lajme

Mickoski: Mandati i Qeverisë është 4 vjet, por nëse opozita kërkon zgjedhje, do të caktojmë datën

Kryeministri dhe kryetari i VMRO-DPMNE-së, Hristijan Mickoski, deklaroi sonte se, nëse opozita kërkon zgjedhje të parakohshme parlamentare, ata janë të gatshëm në çdo kohë të dalin në zgjedhje dhe t’i fitojnë ato. Mickoski tha se qëndrimi i tij është i njohur dhe se Qeveria e tij ka marrë mandat katërvjeçar.

“Qëndrimi im është i njohur për opinionin, sikurse edhe qëndrimi i kësaj Qeverie, se ne kemi marrë mandat për katër vjet. Mandati përfundon në pranverën e vitit 2028. Ende kemi një Qeveri teknike. Kështu që mandati i kësaj Qeverie politike do të duhej të përfundonte diku nga fundi i vitit 2027. Këto janë parametrat që mund t’i them tani dhe mbi bazën e të cilëve kemi marrë besimin e qytetarëve”, tha Mickoski në një intervistë për emisionin “Tema e ditës” në TV Sitel.

I pyetur se çfarë mund ta ndryshojë qëndrimin e tij, ai tha se është logjike që opozita të dëshirojë të jetë në Qeveri, sepse mendon se mund të jetë më e mirë se Qeveria aktuale. Nëse opozita kërkon zgjedhje të parakohshme parlamentare, atëherë, si Qeveri, janë të gatshëm për një takim liderësh, ku do të dakordoheshin për datën dhe do të shkohej në zgjedhje të parakohshme parlamentare.

“Nuk do të ikim, sigurisht. Prandaj them se mandati ynë është katër vjet dhe për një periudhë të tillë kemi marrë mbështetjen e qytetarëve për të realizuar reformat. Por, nëse opozita na e hedh dorashkën, është normale që ne të mos ikim frikacakisht nga zgjedhjet. Përkundrazi, ne jemi të gatshëm në çdo kohë të dalim në zgjedhje dhe t’i fitojmë ato”, deklaroi kryeministri Mickoski.