“Safe city” në tërë Maqedoninë e Veriut, ja kur pritet të realizohet?

Ministri i Punëve të Brendshme, Pançe Toshkovski, ka paralajmëruar se deri në fund të këtij viti sistemi “Qytet i Sigurt” do të jetë plotësisht funksional në të gjithë territorin e vendit.

Ai theksoi se qëllimi kryesor është rritja e sigurisë për qytetarët, ndërsa rezultatet e para tashmë tregojnë përmirësim në sigurinë rrugore, përcjell INA.

Sipas Toshkovskit, projekti po zbatohet në faza dhe çdo qytet përfshihet menjëherë sapo të plotësohen kushtet teknike.

“Me krijimin e kushteve teknike në nivel lokal, sistemi vendoset menjëherë në funksion. Nuk do të pritet implementim i njëkohshëm në të gjitha qytetet,” – deklaroi ai.

Toshovski gjithashtu paralajmëroi për përhapjen e mesazheve të rreme lidhur me gjoba trafiku që u dërgohen qytetarëve, duke theksuar se institucionet janë duke punuar për zbulimin e burimit të tyre.

Në fund, ministri apeloi që qytetarët të tregohen të kujdesshëm ndaj mesazheve të dyshimta dhe t’i raportojnë menjëherë ato tek autoritetet përkatëse./INA/

Ndërron jetë edhe një pacient me ethet e Nilit Perëndimor, gjithsej dhjetë viktima

Një pacient nga Shkupi (70 vjeç) është viktima e dhjetë me virusin e Nilit Perëndimor në Maqedoni.

Ai vdiq këtë fundjavë në Klinikën e Sëmundjeve Infektive ku mjekët luftuan për jetën e tij për më shumë se një muaj, njoftoi sot në një konferencë për shtyp drejtori i Klinikës së Sëmundjeve Infektive, Fadil Cana.
Deri më tani janë regjistruar gjithsej 70 raste të personave të infektuar me virusin.

Kanë vdekur gjithsej 10 pacientë, nëntë nga Shkupi dhe një nga Kumanova, kryesisht të moshuar me sëmundje të shumëfishta komorbiditete.

Lajme

Çmime të reja të derivateve të naftës, lirohet dizeli, shtrenjtohet bezina

Komisioni Rregullator për Energjetikë, Shërbime të Ujit dhe Shërbime për Menaxhimin e Mbetjeve Komunale ka marrë vendim për uljen e çmimeve me pakicë të derivateve të naftës mesatarisht për 1.06 për qind.

Sipas vendimit, nga 29 shtatori 2026 në ora 00:01, çmimet maksimale do të jenë:

EUROSUPER BS-95: 100 denarë/litër – rritje për 1 denar.
EUROSUPER BS-98: 102 denarë/litër – rritje për 1 denar.
EURODIZEL BS: 100 denarë/litër – ulje për 4.5 denarë.
Vaj ekstra i lehtë EL-1: 111.5 denarë/litër – ulje për 3 denarë.
Mazut M-1 NS: 49.882 denarë/kg – ulje për 0.196 denarë.

Në vendimin e ri është aplikuar edhe masa e Qeverisë për TVSH-në e reduktuar në 10 për qind për Eurodizelin, si dhe akciza e ulur për benzinat dhe naftën.

Sipas të dhënave të Komisionit Rregullator, çmimet referente të derivateve në tregun botëror kanë shënuar ndryshime të ndryshme gjatë periudhës së fundit. Te benzina është regjistruar një rritje e lehtë, ndërsa te dizeli, vaji ekstra i lehtë dhe mazuti janë shënuar ulje.

Lajme

Gashi në Riad: Thellim i bashkëpunimit parlamentar, ekonomik dhe bilateral

Kryetari i Kuvendit, Afrim Gashi, gjatë vizitës zyrtare në Mbretërinë e Arabisë Saudite, ka zhvilluar takim me kryetarin e Këshillit të Shurës, Abdullah bin Mohammed Al-Sheikh. Në takim është diskutuar për thellimin e bashkëpunimit parlamentar dhe bilateral, si dhe për mundësitë e rritjes së bashkëpunimit ekonomik dhe investimeve saudite në Maqedoninë e Veriut.

“ Në kuadër të vizitës zyrtare në Mbretërinë e Arabisë Saudite, zhvillova një takim me Kryetarin e Këshillit të Shurës, Abdullah bin Mohammed Al-Sheikh. Diskutuam për thellimin e bashkëpunimit parlamentar dhe bilateral, si dhe për mundësitë për rritjen e bashkëpunimit ekonomik dhe investimeve saudite në Maqedoninë e Veriut.

Theksova gjithashtu interesimin tonë për pjesëmarrje aktive në EXPO 2030 në Riad, si dhe rëndësinë e dialogut të rregullt politik dhe bashkëpunimit konkret ndërmjet dy vendeve. Jam i bindur se kjo vizitë do t’i japë një shtysë të mëtejshme marrëdhënieve ndërmjet Maqedonisë së Veriut dhe Arabisë Saudite”, deklaroi Gashi.