Lajme

Partitë në botë që bashkëdrejtohen nga dy bashkëkryetarë

Modeli i bashkëkryesimit politik po zgjerohet në skenën evropiane, duke u përdorur jo vetëm nga partitë e gjelbra, por edhe nga disa formacione të mëdha politike dhe lëvizje politike, si zgjidhje për balancimin e brendshëm të pushtetit, përcjell INA.

Në Maqedoninë e Veriut, në Kongresin e unifikimit të koalicionit VLEN, drejtimi i subjektit u strukturua me dy bashkëkryetarë: Bilall Kasami dhe Izet Mexhiti. Ky vendim u interpretua si përpjekje për të ruajtur ekuilibrin politik pas bashkimit të disa subjekteve shqiptare.

Në praktikën evropiane, bashkëdrejtimi është përdorur edhe nga parti dhe lëvizje të tjera me ndikim të madh politik, përcjell INA.

Në Spanjë, partia Podemos ka funksionuar në disa periudha me strukturë kolegjiale të drejtimit, ku kompetencat kryesore ndaheshin mes disa figurave qendrore, si pjesë e modelit të brendshëm të balancimit të fraksioneve.

Në Francë, partia “La France Insoumise” operon si lëvizje politike me koordinim të shpërndarë mes disa figurave kryesore, duke shmangur modelin klasik të një lideri të vetëm të centralizuar.

Në Itali, partia Five Star Movement ka kaluar në faza të ndryshme të drejtimit kolektiv, veçanërisht gjatë tranzicioneve të brendshme, duke eksperimentuar me struktura më horizontale të vendimmarrjes.

Në Irlandë, lëvizja politike Sinn Féin ka pasur periudha ku drejtimi politik është ndarë mes figurave kryesore të partisë, duke krijuar një formë të balancuar udhëheqjeje, edhe pse jo gjithmonë të formalizuar si bashkëkryesim.

Ndryshe nga rastet e mësipërme, shumica e partive të gjelbra e kanë bërë bashkëkryesimin pjesë të identitetit të tyre politik dhe organizativ.

Në Gjermani, Alliance 90/The Greens funksionon prej dekadash me dy bashkëkryetarë si standard i brendshëm i organizimit.

Në Mbretërinë e Bashkuar, Green Party of England and Wales udhëhiqet nga bashkëliderë, duke ndarë përgjegjësitë politike dhe organizative. Modeli i partive me bashkëkryetarë ka edhe në Kanada dhe Zelandën e Re.

Në nivel europian, grupi Greens–European Free Alliance funksionon me bashkëpresidencë, si model i standardizuar i ndarjes së pushtetit.(INA)

Lajme

Kapet duke vozitur me 203 km/h në Maqedoni, arrestohet shtetasi i Gjermanisë

Policia ka arrestuar sot një shtetas të Gjermanisë, i cili po drejtonte automjetin me shpejtësi prej 203 kilometra në orë në autostradën A1, në afërsi të Gjevgjelisë, njoftoi Ministria e Punëve të Brendshme.

Sipas MPB-së, sot në orën 08:00, në autostradën “Miqësia”, te fshati Miletkovë, policia nga SPB Strumicë – DPB Gjevgjeli e ka privuar nga liria M.F. (46) nga Gjermania. Gjatë kontrollit të trafikut me radar, është konstatuar se ai po drejtonte një automjet të markës BMW, me targa gjermane, me shpejtësi prej 203 km/h, në një pjesë ku shpejtësia e lejuar është 120 km/h.

Nga MPB-ja bëjnë të ditur se për rastin është njoftuar prokurori publik nga Prokuroria Themelore Publike në Gjevgjeli, ndërsa ndaj personit do të ngritet kallëzim përkatës.

MPB-ja apelon te të gjithë drejtuesit e automjeteve që t’i respektojnë rregullat dhe dispozitat e trafikut, veçanërisht kufizimet e shpejtësisë, dhe të mos rrezikojnë jetën e tyre dhe të pjesëmarrësve të tjerë në trafik.

Lajme

“Jetimat e Ballkanit” hapin kuzhinë humanitare në Shkup

Në Shkup është hapur Kuzhina Humanitare “Jetimat e Ballkanit”, e cila do të ofrojë ushqim falas për familjet dhe personat në nevojë, përcjell TV21. Sipas organizatorëve, kjo nismë synon t’u ofrojë ndihmë qytetarëve në nevojë, duke u mundësuar atyre të marrin ushqim në kushte dinjitoze.

“Në qytetin e Shkupit, hapëm Kuzhinën Humanitare ” Jetimat e Ballkanit”, një vend ku familjet në nevojë do të mund të marrin ushqim falas, me dinjitet dhe dashuri. Kjo kuzhinë është një tjetër hap drejt misionit tonë për të qenë pranë atyre që kanë më së shumti nevojë. Faleminderit nga zemra të gjithë atyre që kontribuan, ndihmuan dhe e bënë të mundur hapjen e kësaj kuzhine. Zoti ua shpërbleftë çdo kontribut dhe çdo dorë të shtrirë për të mirën! Bamirës, Zoti kurrë mos ju humbtë!”, thuhet në njoftim.

Lajme

Privohet nga liria 35 vjeçari, kapet me 14,440 euro pa dëshmi prejardhjeje

Një 35-vjeçar nga fshati Buçim i Radovishit është ndaluar nga policia pasi gjatë kontrollit të automjetit të tij janë gjetur 14.440 euro në valuta të ndryshme, për të cilat nuk ka paraqitur dëshmi për prejardhjen.

Sipas Ministrisë së Punëve të Brendshme, më 13 gusht policia ka ndaluar një automjet të tipit “Audi” në rrugën magjistrale Radovish–Shtip, pranë kryqëzimit për fshatin Buçim.

Automjeti drejtohej nga M.V., ndaj të cilit më herët ishte caktuar masa e kujdesit – ndalim për largim nga shtëpia, nën dyshimin për veprën penale të prodhimit dhe shpërndarjes së paautorizuar të drogës.

Gjatë kontrollit, policia ka gjetur 14.440 euro, ndërsa për rastin është njoftuar prokurori publik.

“M.V. nuk ka paraqitur dëshmi për prejardhjen e parave të gjetura”, thuhet në njoftimin e MPB-së.

Më 14 gusht, 35-vjeçari është nxjerrë para gjykatësit në Gjykatën Themelore në Gjevgjeli, i cili i ka caktuar masën e paraburgimit prej 30 ditësh. Pas vendimit, ai është dërguar në Burgun e Shkupit.