Lajme

Kasami: 30 për qind rritje të pagave për zjarrfikësit e Komunës së Tetovës

Kryetari i Komunës së Tetovës dhe bashkëkryetari i VLEN-it, Bilall Kasami, ka njoftuar se zjarrfikësit e Njësisë Territoriale Kundër Zjarrit në Tetovë do të përfitojnë rritje prej 30 për qind të pagave.

Përmes një postimi publik, Kasami theksoi se vendimi është marrë si vlerësim për punën, përkushtimin dhe sakrificën që zjarrfikësit tregojnë çdo ditë në mbrojtje të jetës dhe pronës së qytetarëve.

“Me vendimin e ri, zjarrfikësit do të përfitojnë rritje prej 30% të pagave, si vlerësim për punën, përkushtimin dhe sakrificën e tyre të përditshme në mbrojtje të jetës dhe pronës së qytetarëve”, ka shkruar Kasami.

Ai e ka cilësuar këtë vendim si përmbushje të një prej zotimeve të dhëna, duke theksuar se mbështetja dhe përmirësimi i kushteve për zjarrfikësit mbetet prioritet i Komunës së Tetovës.

Lajme

Pas arrestimit të Bogoevit, kryeministri Mickoski paralajmëron arrestime të reja

Kryeministri Hristijan Mickoski ka konfirmuar se po zhvillohet një hetim në të cilin është përfshirë edhe ish-drejtori i Administratës Doganore dhe ish-kryetari i Komunës së Karposhit nga LDSM, Stefan Bogoev. Dhe, sipas Mickoskit, në aksion janë përfshirë edhe disa punonjës të Administratës Doganore dhe një ndërmjetës, përkatësisht një person që ka qenë shumë i afërt me pushtetin e kaluar dhe që, sipas kryeministrit, shpesh ka mundësuar ose lehtësuar veprime të kundërligjshme. Mickoski duke iu referuar informacioneve që posedon, ai tha se aksioni do të zgjerohet edhe më tej.

“Përveç kësaj, disa institucione në periudhën e ardhshme do të ndërmarrin aksione të ngjashme lidhur me parregullsi nga e kaluara, të cilat janë të përfshira në raportet e auditimit dhe paraqesin indicie për keqpërdorim të detyrës zyrtare”. HRISTIJAN MICKOSKI-KRYEMINISTËR.

Mickoski ka theksuar se e gjithë kjo është në nivel hetimi, dhe se, ai beson në prezumimin e pafajësisë, duke shtuar se secili ka mundësinë dhe të drejtën ta dëshmojë pafajësinë e vet. Ditën e djeshme u bë e ditur se në një aksion të Drejtorisë së Policisë Financiare dhe të Prokurorisë Themelore Publike për Ndjekjen e Krimit të Organizuar dhe Korrupsionit janë ndaluar disa persona nën dyshimin për korrupsion. /SHENJA/

Lajme

Pasuria e 60 funksionarëve nën “vëzhgim” në Maqedoni

Komisioni Shtetëror Antikorrupsion në Maqedoninë e Veriut ka hartuar Planin Vjetor për vitin 2026, ku fokus kryesor do të jetë monitorimi i detajuar i gjendjes pasurore dhe konfliktit të interesit për 60 funksionari publikë. Lajmin e bëri të ditur Kryetari i Antikorrupsionit, Adem Çuçul.

Sipas planit, “skaneri” i Antikorrupsionit këtë vit do të kalojë nëpër këto kategori:

10 gjyqtarë

10 prokurorë publikë

10 deputetë

10 ministra

10 kryetarë komunash

10 ish-kryetarë komunash (të cilëve u ka përfunduar mandati)

Çuçul vuri në dukje një fenomen shqetësues që haset shpesh gjatë kontrolleve zyrtare. Sipas tij, në dokumente zyrtare funksionarët dhe familjarët e tyre nuk shfaqin rritje të dyshimtë të të ardhurave, por perceptimi dhe realiteti në opinionin publik flet ndryshe. “Shpesh në opinion dëgjohet se persona që nuk kanë të ardhura të mëdha, zotërojnë pasuri të madhe,” u shpreh Çuçul. Ai sqaroi se zbulimi i pasurisë së fituar në mënyrë të paligjshme mbetet një proces mjaft kompleks. Një nga pengesat kryesore është legjislacioni aktual, i cili i kufizon institucionet të kontrollojnë vetëm ata anëtarë të familjes që jetojnë në të njëjtën bashkësi familjare (ekonomi shtëpiake) me funksionarin, duke lënë hapësirë për fshehjen e pasurisë te të afërmit e tjerë. (INA)

Lajme

Tragjedia në Shëngjin: Dy të rinjtë që u mbytën nga dallgët janë nga Kosova

Një ngjarje e rëndë dyshohet të ketë ndodhur në bregdetin e Shëngjinit, ku katër shokë nga Kosova që kishin hyrë në det janë përballur me dallgët e forta.

Siç raporton Top Chanel, dyshohet se të rinjtë janë marrë nga rrymat dhe dallgët e detit, ndërsa dy prej tyre kanë humbur jetën dhe dy raportohet se janë në gjendje të rëndë.

Ende nuk ka një konfirmim zyrtar nga autoritetet lidhur me rrethanat e ngjarjes dhe gjendjen e personave të tjerë.
Në vendngjarje pritet ndërhyrja e forcave të kërkim-shpëtimit dhe policisë për të sqaruar plotësisht situatën.
Hetimet vijojnë, ndërsa autoritetet pritet të japin më shumë detaje në orët në vijim.