Lajme

BDI: Dy vjet e vonuan, sot lavdërohen me projektin tonë Shkup – Bllacë

Bashkimi Demokratik për Integrim (BDI) ka akuzuar qeverinë aktuale për vonesa në realizimin e autostradës Shkup–Bllacë, duke theksuar se projekti është ideuar, projektuar dhe siguruar financiarisht gjatë mandatit të qeverive ku kjo parti ishte pjesë.

Në një reagim publik, BDI deklaron se qeveria e kaluar ka përfunduar segmentin e parë prej 2 kilometrash të autostradës, por sipas tyre, ai ende nuk është lëshuar në përdorim edhe pas dy vitesh. Partia pretendon se ndërtimi i 10.8 kilometrave të mbetura është vonuar për shkak të bllokadave dhe mosveprimit të institucioneve aktuale.

Sipas BDI-së, projekti për vazhdimin e autostradës deri te qarkorja e Shkupit është përgatitur në bashkëpunim me kompaninë amerikane Hill International, ndërsa financimi është siguruar nga Banka Evropiane për Rindërtim dhe Zhvillim (BERZH).

Nga partia opozitare thonë se gjatë mandatit të tyre është shpallur edhe thirrja për ndërtimin e autostradës, në të cilën kanë aplikuar 11 kompani, ndërsa qeveria aktuale, sipas tyre, ka pasur për detyrë vetëm përzgjedhjen e realizuesit të projektit.

BDI gjithashtu akuzon qeverinë për, siç thotë, deklarata kontradiktore lidhur me projektin, duke përmendur çështje që kanë të bëjnë me shpronësimet, ndryshimin e trasesë dhe profilin e rrugës.

Në reagimin e saj, BDI rikujton edhe një sërë projektesh infrastrukturore që, sipas partisë, janë realizuar ose nisur gjatë qeverisjes së saj, përfshirë Korridorin 8, Korridorin 10-D, autostradën Shkup–Bllacë, Rrugën e Arbërit, qarkoren e Tetovës dhe projektet “One Stop Shop” në kufijtë me Kosovën dhe Shqipërinë.

Deri në publikimin e këtij lajmi, nuk ka pasur reagim nga qeveria lidhur me këto pretendime të BDI-së.

Lajme

Vrasja në Duqanxhik të Shkupit, MPB jep detaje

Dy sulmues me motoçikletë hapën zjarr ndaj një grupi prej pesë banorësh të Shkupit, duke goditur 26-vjeçarin A.M., i cili më vonë ndërroi jetë në spital nga plagët e marra.

Të shtënat u raportuan më 6 shtator rreth orës 23:30, pranë kryqëzimit të rrugëve “Prohor Pcinski” dhe Vojdan Çernodrinski” në Shkup.
Nga MPB thonë se D.G. (29), A.Xh. (24), K.B. (36), E.B. (25) dhe A.M. (26), të gjithë nga Shkupi, po qëndronin para një dritareje biznesi në atë moment.

Një një motoçikletë që ishin dy persona ndaloi përpara tyre, pas së cilës u qëllua me armë zjarri ndaj grupit. Sulmuesit ikën menjëherë.

Një nga plumbat goditi A.M., i cili u dërgua me ambulancë në Kompleksin e Klinikës Nënë Tereza, ku dhe ndërroi jetë.

Nga policia ende nuk kanë njoftuar për identitetin e sulmuesve, dhe arsyet incidentit.

Lajme

Një 27-vjeçar nga Maqedonia qëllohet për vdekje në Berlin, autorët në arrati

Në orët e para të mëngjesit të së hënës, në rrugën Sonnenallee në Neukölln në Berlin të Gjermanisë u qëllua për vdekje një 27 vjeçar nga Maqedonia e Veriut, raportuan mediat gjermane.

Sipas policisë, ngjarja ndodhi rreth orës 02:40 në kryqëzimin e rrugëve Planetenstraße dhe Sonnenallee, ndërsa i vdekur mbeti një shtetas i Maqedonisë së Veriut i moshës 27 vjeçare.

Policia e Berlinit njoftoi se, pavarësisht përpjekjeve të menjëhershme për reanimim personi i plagosur ndërroi jetë në vendngjarje.

Mbi viktimën u qëlluan gjashtë plumba njoftoi policia gjermane, ndërsa autori apo autorët e e sulmit dyshohet se janë larguar me një automjet të markës Mercedes.

Autoritetet e sigurisë po hetojnë nëse në ngjarje kanë qenë të përfshirë disa persona dhe nëse rasti ka lidhje me krimin e organizuar. Me urdhër të Prokurorisë, ka nisur hetimet.

Lajme

Përparim Bajrami në arrati, Gjykata vendosi ta gjykojë në mungesë

Për shkak se i akuzuari Përparim Bajrami vazhdon të jetë i pakapshëm për organet e përndjekjes, Gjykata vendosi që ta gjykojë në mungesë.

Familjarët e ish drejtorit të Lotarisë Shtetërore, Bajrami, kanë angazhuar Avokatin Elenko Millanov, i cili dorëzoi te gjyqtarja listën me prova. Bajrami është i akuzuari i parë. /Alsat.mk