Zëvendësministri i Mbrojtjes dhe përfaqësuesi i VLEN-it, Admir Shabani në emisionin “Click plus” në TV21 ka thënë se Propozim-ligji për përfaqësim të drejtë dhe adekuat është në suaza të normave evropiane dhe e mira e gjithë kësaj siç tha ai është se “garanton profesionalizmin e kandidatëve dhe punësimin në bazë të meritokracisë”.

Sipas Shabanit, balancuesi nuk është i shfrytëzueshëm dhe nuk mund të jetë kriter bazë për punësimin e kandidatëve në administratë publike dhe më tej.

“Balancuesi është mjet i konsumuar dhe do duhej mjet tjetër që në parim do të fokusohet në çështjen e profesionalizmit dhe kompetencave të kandidatëve për punësim, ndërsa çështja e etnisë do të jetë çështje dytësore. Propozimi i tashëm i ligjit është në suaza të normave evropiane dhe e mira e kësaj është se garanton profesionalizmin, ndërsa punësimin në bazë të meritokracisë”, ka thënë Shabani, duke potencuar si rregull këtu veçmas Trupin koordinues.

Ai tha se me këtë Ligj po rregullojnë të gjitha defektet që kanë trashëguar, ndërsa akuzoi kundërshtarin e tij politik, Jeton Shaqiri se pikërisht në kohën e tij balancuesi është keqpërdorë.

“Balancuesi kur Jetoni (Shaqiri) ka qenë ministër i Shoqërisë Informatike dhe Administratës dhe ministër i Arsimit është keqpërdorë në mënyrë të hatashme”, ka thënë Shabani.

Ministri i Shëndetësisë, Azir Aliu, në emisionin “Debat në SHENJA”, komentoi qëndrimin e BDI-së ndaj Ligjit për Përfaqësim të Drejtë, duke vlerësuar se kundërshtimi i një ligji që trajton çështje kombëtare mund të ketë pasoja serioze politike për këtë parti.

Sipas Aliut, një veprim i tillë mund të shënojë fillimin e rënies politike të BDI-së, duke e larguar atë jo vetëm nga pushteti, por edhe nga skena politike në afat të gjatë.

“Kjo do të jetë historike për BDI-në dhe mendoj se do të jetë hapi i parë për të shkuar në histori përgjithmonë jo veç në opozitë BDI-ja. Të jesh kundër një ligji për të definuar procese kombëtare është më shumë se vetvrasje politike. Dhe po të më pyetni si politikan, uroj që ta bëjnë këtë, uroj që të jenë përpara dhe uroj që të dalin dhe të na japin më shumë material si qeveri”, deklaroi Aliu.

Mali i Zi ka mbyllur përkohësisht Kapitullin 2 (Liria e lëvizjes së punëtorëve) dhe Kapitullin 28 (Mbrojtja e konsumatorit dhe shëndetit), që bëjnë pjesë në Klasterin 2, në kuadër të negociatave për anëtarësim në Bashkimin Evropian (BE), transmeton Anadolu.

Komisarja evropiane për zgjerim, Marta Kos, vlerësoi se Mali i Zi po përparon “me shpejtësi të madhe”, duke theksuar se mbyllja e dy kapitujve paraqet përfitime konkrete të procesit të integrimit evropian.

“Komisioni Evropian dëshiron të mundësojë një paketë financiare për Malin e Zi javën e ardhshme. Tani po flasim për reformat e ardhshme. Të gjithë aktorët politikë duhet të vazhdojnë të kontribuojnë në procesin e reformave”, tha Kos.

“BE-ja tashmë po përgatit vendin e Malit të Zi në BE. Ne po përgatitemi”, shtoi ajo.

Kryeministri i Malit të Zi, Milojko Spajiq, tha se vendi mbetet i përkushtuar për përfundimin e procesit të negociatave dhe se deri në fund të vitit do të mbyllen të gjithë kapitujt, me synimin që Mali i Zi të bëhet anëtari i 28-të i BE-së deri në vitin 2028.

“Mali i Zi ka mbyllur gjysmën e kapitujve të negociatave të anëtarësimit me BE-në, ndërsa deri në fund të vitit do të mbyllim edhe pjesën e mbetur”, tha Spajiq.

Ai theksoi se çdo kapitull i mbyllur është dëshmi se procesi i zgjerimit funksionon kur ekzistojnë vullneti politik dhe kapaciteti reformues.

“Mali i Zi nuk vonon dhe nuk improvizon, por jep rezultate”, tha Spajiq, duke shtuar se integrimi evropian përfaqëson një “projekt brezash” dhe rrugë drejt sigurisë dhe prosperitetit më të madh për qytetarët.

Ai veçoi rëndësinë e kapitujve të mbyllur, duke thënë se Kapitulli 2 u mundëson qytetarëve lirinë e lëvizjes dhe të punës në BE, ndërsa Kapitulli 28 forcon mbrojtjen e konsumatorëve dhe standardet e tregut.

Ai theksoi se Mali i Zi tani ka mbyllur përkohësisht tre nga katër kapitujt që kanë të bëjnë me liritë themelore të BE-së, si dhe shtatë nga dhjetë kapitujt në kuadër të Klasterit 2.

Spajiq shtoi se mbyllja e kapitujve nuk nënkupton fundin e reformave, por konfirmimin e progresit, duke u bërë thirrje deputetëve të mbështesin ndryshimet kushtetuese që janë pjesë e agjendës evropiane.

Mali i Zi i hapi negociatat për anëtarësim në BE në vitin 2012, duke u bërë vendi i parë i rajonit që nisi procesin e anëtarësimit sipas metodologjisë së re të BE-së.