Blerjet online nga platformat ndërkombëtare si Temu, Shein dhe AliExpress po përballen me kosto të reja në Bashkimin Evropian. Sipas raportimit të Skopjeinfo, nga 1 nëntori ka hyrë në zbatim një tarifë administrative prej 2 eurosh për artikull, për mallrat që porositen nga vendet jashtë BE-së.
Masa synon të mbulojë shpenzimet e kontrollit doganor dhe përpunimit të miliona dërgesave të vogla që mbërrijnë çdo ditë në tregun evropian.

Kjo pagesë është e ndarë nga tarifa e përkohshme doganore prej 3 eurosh për dërgesat me vlerë nën 150 euro, e cila, sipas artikullit, zbatohet që nga 1 korriku.

Ndërsa tarifa doganore synon krijimin e kushteve më të barabarta ndërmjet tregtarëve tradicionalë dhe platformave ndërkombëtare, pagesa administrative lidhet me shpenzimet për kontrollin dhe përpunimin e porosive.

A do të shtrenjtohen porositë edhe për qytetarët e Maqedonisë së Veriut?

Për blerësit në Maqedoninë e Veriut, tarifat e reja të BE-së nuk nënkuptojnë automatikisht pagesa shtesë.

Meqenëse vendi nuk është anëtar i Bashkimit Evropian, porositë që mbërrijnë drejtpërdrejt në Maqedoni vazhdojnë t’u nënshtrohen rregullave vendore doganore dhe tatimore.

Megjithatë, ndryshimet në tregun evropian mund të ndikojnë në mënyrë të tërthortë në kostot e transportit dhe çmimet e porosive që kalojnë përmes qendrave të shpërndarjes në BE.

Kryetari i Komunës së Haraçinës, Daut Beqiri, ka bërë të ditur se së shpejti në këtë komunë do të hapet dega e parë bankare në histori.

Beqiri njoftoi se sot është nënshkruar kontrata me përfaqësuesit e Halkbankës për dhënien me qira të një hapësire në objektin e Komunës, ndërsa dega e re pritet të jetë funksionale brenda 45 ditësh.

Ai theksoi se hapja e bankës është një nga zotimet e dhëna gjatë fushatës zgjedhore, i cili tashmë po bëhet realitet.

Sipas Beqirit, ky investim do të lehtësojë shërbimet financiare për qytetarët dhe bizneset, si dhe do të krijojë kushte më të mira për zhvillim dhe investime të reja në Haraçinë.

Komisioni Rregullator për Energjetikë (KRRE) ka vendosur rritjen e çmimeve me pakicë të derivateve të naftës, mesatarisht për 1,55 për qind. Vendimi hyn në fuqi nga mesnata, ndërsa rritja prek benzinat dhe naftën.

Sipas vendimit të KRRE-së, Eurosuper BS-95 shtrenjtohet për 2 denarë dhe do të kushtojë 93 denarë për litër. Eurosuper BS-98 gjithashtu rritet për 2 denarë, duke arritur në 95 denarë për litër.

Ndërkohë, Eurodizel BS (D-E V) shtrenjtohet për 1 denar dhe çmimi i ri do të jetë 100 denarë për litër.

Pa ndryshime mbetet çmimi i vajit ekstra të lehtë për amvisëri (EL-1), i cili do të vazhdojë të kushtojë 110 denarë për litër.