Bashkëkryetarët e koalicionit VLEN, Izet Mexhiti dhe Bilall Kasami, kanë publikuar të njëjtin mesazh në rrjetet sociale, duke e cilësuar si historike mundësinë që provimi i jurisprudencës të jepet edhe në gjuhën shqipe.

Në postimet e tyre, Mexhiti dhe Kasami theksojnë se bëhet fjalë për një arritje të rëndësishme për studentët shqiptarë dhe për avancimin e barazisë gjuhësore në vend.

“Premtimi u bë realitet, jurisprudenca flet shqip! Një ditë historike për studentët shqiptarë dhe një hap i rëndësishëm për barazinë dhe dinjitetin e gjuhës shqipe. Fjalët marrin vlerë kur pas tyre qëndrojnë vepra. Sot kemi një arsye më shumë për të festuar! Studentë të dashur, ta gëzoni këtë të drejtë! Gëzuar Festat e Nëntorit”, thuhet në mesazhin e publikuar nga dy liderët e VLEN-it.

Ky reagim vjen në kohën kur çështja e dhënies së provimit të jurisprudencës në gjuhën shqipe ka qenë në qendër të debatit politik në vend, ndërsa përfaqësuesit e VLEN-it e konsiderojnë këtë si realizim të një prej zotimeve të tyre ndaj qytetarëve shqiptarë.

Rreth 10 milionë euro në vit pritet të derdhen në buxhetin e shtetit nga gjobat përmes sistemit “Qyteti i Sigurt”. Ministri i Punëve të Brendshme, Pançe Toshkovski, thotë se bëhet fjalë për vlerësime fillestare dhe jo për shifra përfundimtare, pasi viti ende nuk ka përfunduar.

“Prurjet e përgjithshme që pritet të hyjnë çdo vit në buxhetin e shtetit janë rreth 10 milionë euro. Këto nuk janë shifra të përcaktuara saktësisht. Viti nuk ka përfunduar ende, por bazuar në dinamikën aktuale, pritjet janë që shuma të jetë rreth 10 milionë euro”, deklaroi Toshkovski. Nga këto mjete, 25 për qind, përkatësisht rreth 2,5 milionë euro, janë të destinuara për Ministrinë e Punëve të Brendshme dhe do të riinvestohen në zhvillimin dhe avancimin e mëtejshëm të sistemit “Qyteti i Sigurt”.

“Pikërisht 25 për qind janë të destinuara për buxhetin e Ministrisë së Punëve të Brendshme. Këto mjete do të riinvestohen në gjithçka që lidhet me zbatimin dhe avancimin e sistemit ‘Qyteti i Sigurt’”, tha ministri. Toshkovski theksoi se qëllimi kryesor i projektit nuk është mbushja e buxhetit me para nga gjobat, por rritja e sigurisë në komunikacion.

“Po e përsëris për të miliardën herë, qëllimi i këtij projekti nuk është mbushja e buxhetit të shtetit”, deklaroi Toshkovski.

Ministra, drejtorë, zyrtarë dhe përfaqësues të kishës janë mes personave që kanë marrë gjoba nga sistemi i kamerave “Safe City”. Ministri i Punëve të Brendshme, Pançe Toshkovski, tha se të gjitha gjobat janë paguar, pavarësisht nëse shkeljet janë bërë me automjete zyrtare apo private.

Duke folur për rezultatet e sistemit, Toshkovski theksoi se kamerat nuk bëjnë dallime mes qytetarëve dhe bartësve të funksioneve publike.

Ai shtoi se gjatë një viti e gjysmë të fundit nuk ka pasur përpjekje për ndërhyrje në raste konkrete të kundërvajtjeve në trafik.

Sipas ministrit, zbatimi i “Safe City” ka dhënë rezultate edhe në sigurinë rrugore, duke kontribuar në uljen për 30 për qind të numrit të viktimave në aksidente trafiku.