Lajme

BDI: Dy timonierë në një anije që po fundoset, VLEN u bashkua që të shpërbëhet!

Komunikata e BDI-së

Akti i djeshëm, ku disa subjekte politike u përpoqën të fshihen pas emrit të një partie, nuk është bashkim, por britma e fundit dëshpëruese për mbijetesë politike. Kështu thuhet në reagimin e BDI-së, sipas të cilës, ironia është e plotë, VLEN zgjodhi dy timonierë për të drejtuar të njëjtën anije që tashmë po fundoset me shpejtësi.

“Kjo udhëheqje e fragmentuar është pranim i drejtpërdrejtë se në atë grupim mbizotëron mosbesim dhe fragmentim total. Në vend të vizionit, ata ofruan treg të egove, sepse askush nuk deshi t’ia lëshojë vendin tjetrit, vendosën të shtiren si parti me dy kryetarë. E vërteta është e qartë: VLEN u bashkua vetëm që bashkërisht të shpërbëhet”, thuhet në reagimin e BDI-së.

Vendosja e dy liderëve, sipas BDI-së, është dëshmi se partia është e ndarë në fraksione ende pa filluar punën.

“Ndërkohë që liderët vetëshpallen, ministra dhe funksionarë kyç nga radhët e tyre tashmë e kanë braktisur anijen, duke refuzuar të jenë pjesë e këtij projekti të dështuar, të destinuar vetëm për shpëtimin e disa karrierave politike. Shqiptarët nuk meritojnë eksperimente politike. Dita e djeshme duhet të mbahet mend vetëm si fillimi i fundit të një grupimi që sakrifikoi të ardhmen e popullit të vet për të ruajtur kolltukët”.

Koalicioni VLEN po përballet me një debakël të vërtetë kadrovik, vijon më tej BDI.

“Ndërsa po shpërbëhen nga brenda, vazhdojnë të dërgojnë mesazhe të rreme për “zero korrupsion”, ndërkohë që realiteti i përgënjeshtron në çdo hap. Nuk mund të luftojë korrupsionin një parti e krijuar artificialisht, kur vetë e praktikon atë në vepër”.

Pothuajse dy vite janë në pushtet, thotë BDI, ndërsa bilanci i premtimeve të tyre kyçe është zero.

“Ndryshimet kushtetuese: Shtylla kryesore e zgjedhjeve të vitit 2024 – premtimi se ska qeveri pa ndryshime, apo për ndryshime për 3 muaj apo për ndryshime brenda 6 muajve – është braktisur zyrtarisht.
Decentralizimi dhe infrastruktura: Nuk pamë asnjë decentralizim të komunave, përkundrazi është thelluar cebtralizimi, si dhe as përmirësim të infrastrukturës lokale në vendbanimet me shumicë shqiptare.
Akademia Shqiptare: Akademia e premtuar e shkencave dhe arteve përfundoi edhe më keq se ndonjë shoqatë lokale dhe e padukshme.
‘Banka Shqiptare’: Në vend të mbështetjes për bizneset shqiptare, mashtruan votuesit dhe lejuan hyrjen e kapitalit serb përmes Alta Bankës.
Bixhozi dhe kazinotë: Të rreme dolën premtimet për mbylljen e tyre. Ligji u tërhoq nga Kuvendi, ndërsa Izet Mexhiti vazhdoi të përfitojë nga monopoli “Megavin”, për të cilin vetë kishte deklaruar se do të mbyllej.
Marrëveshja e Ohrit dhe gjuha: Në vend të forcimit të Inspektoratit të Gjuhëve dhe trajtimit dinjitoz të gjuhës shqipe, po përparojnë vetëm interesat biznesore të liderëve të tyre.
Qytetarët si aksionarë: Premtuan se populli do të kishte pjesë në të mirat publike dhe pronën shtetërore. Në realitet, “aksionarë” në bizneset fitimprurëse (kazinotë dhe bankat) u bënë vetëm njerëzit e afërt me udhëheqjen.
Dhe shumë premtime të tjera me të cilat i mashtruan shqiptarët”.

Shumë shpejt, sipas BDI-së, do ti nënshtrohen vetingut urgjent ndërkombëtar për pasurinë e funksionarëve, si dhe me një revizion të plotë të pasurisë kriminale të klanit rreth Mexhitit.

Lajme

Nikolloski: Shteti ka rezerva të kerozinës për tre muaj

Ministri i Transportit, Aleksandar Nikolloski, informoi se vendi nuk ka probleme me furnizimin me kerozin dhe se aktualisht ka rezerva për 90 ditë. Nikolloski njoftoi gjithashtu hapjen e pesë destinacioneve të reja nga dy aeroportet, të cilat do të fillojnë të funksionojnë nga muaji i ardhshëm, transmeton Portalb.mk.

“Përveç faktit që furnizohen aeroporti i Shkupit dhe i Ohrit, me kerozinin tonë furnizohet plotësisht edhe aeroporti i Prishtinës dhe pjesërisht aeroporti i Nishit. Kemi rezerva për 90 ditë, edhe pse ligji parashikon 60 ditë. Në kushte kur po paralajmërohen anulime fluturimesh, ne gjatë muajit qershor planifikojmë pesë destinacione të reja nga aeroporti i Shkupit dhe i Ohrit. ‘Austrian Airlines’ do të fillojë për herë të parë të fluturojë nga Vjena drejt Ohrit. ‘Wizz Air’ do të fluturojë nga Ohri në Krakov dhe në Wrocław, dhe kemi dy destinacione të shkëlqyera turistike nga aeroporti i Shkupit: njëra është Palermo – Sicili, tjetra Alghero – Sardenjë”, tha Nikolloski.

Kujtojmë se, çmimi i karburantit për avionë (kerozina) është rritur me 122 përqind që nga fillimi i luftës me Iranin, sipas kompanisë konsulente Energex me seli në Londër. Së pari, probleme me furnizimin u raportuan në aeroportet aziatike, mdërkohë që ka vonesa të mëdha edhe në furnizimin me karburant në aeroportet në Itali.

Lajme

Kjo është përbërja e re që do të udhëheqë VLEN-in

Koalicioni VLEN ka zyrtarizuar strukturat e tij drejtuese gjatë punimeve të Kongresit të parë të mbajtur në Shkup, duke shënuar kalimin nga një aleancë partish në një subjekt të unifikuar politik.

Sipas vendimeve të miratuara nga delegatët, Izet Mexhiti dhe Bilall Kasami janë zgjedhur bashkëkryetarë të lëvizjes, ndërsa pozicioni i sekretarit të përgjithshëm i është besuar Bekim Salit, përcjell INA.

Për të kompletuar hierarkinë drejtuese, Kongresi emëroi Mimoza Musën dhe Bekim Qokun në postet e nënkryetarëve, duke përcaktuar kështu ekipin që do të udhëheqë organizimin dhe strategjinë e mëtejshme të subjektit në skenën politike të Maqedonisë së Veriut.

Ky proces i rëndësishëm i strukturimit të brendshëm pason diskutimet mbi platformën politike dhe synon të forcojë përfaqësimin e kësaj force brenda koalicionit qeverisës dhe përballë elektoratit.(INA)

Lajme

Shkodran Alili i bashkohet koalicionit VLEN

Avokati dhe humanisti Shkodran Alili, i njohur si kandidat i pavarur për Komunën e Kërçovës, tashmë i është bashkuar koalicionit VLEN.

Ky zhvillim paraqet një lëvizje të rëndësishme në skenën politike lokale, pasi Alili kishte ndërtuar profilin e tij politik jashtë partive tradicionale. Përfshirja e tij në VLEN pritet të ndikojë në forcimin e koalicionit në Kërçovë.(INA)