Lajme

Mesazhi i Reisul Ulemasë, Shaqir Fetahu me rastin e Kurban Bajramit

Me rastin e festës së Kurbanit Bajramit, kreu i Bashkësisë Fetare Islame, Shaqir Fetahu,në urimin përcjellë me një video mesazh tha se kjo festë, përmes kurbanit, kultivon personalitet konstruktiv, të matur, të urtë, të përkushtuar ndaj të mirës, solidar, paqësor dhe në çdo moment të kujdesshëm për mirëqenien e përgjithshme.
“Sot, me zemër dhe shpirt, përjetojmë festën e madhe të Kurban Bajramit, festë kjo që shënon kryerjen e obligimit të Haxhit, obligimin e prerjes së kurbanëve, si dhe ditët në të cilat u plotësua Kur’ani Famëlartë për të qenë udhërrëfyes për mbarë njerëzimin dhe për të gjitha kohërat.
Në ditët e kësaj feste, miliona besimtarë, me besim të paluhatshëm dhe vetëdije të lartë, kryejnë obligimin e Haxhit për ta plotësuar kushtin e pestë të Islamit, duke dëshmuar në praktikë fuqinë e besimit dhe përkushtimin e tyre ndaj Zotit të Madhërishëm me fjalët: “Të përgjigjemi, o Zoti ynë, të përgjigjemi!”
Vërtet, sot në Qaben e bekuar, në luginën e Arafatit dhe në vendet tjera të shenjta, besimtarët dëshmojnë se qëllimi i tyre është dashuria ndaj Allahut, ndaj vetvetes dhe ndaj njeriut.
Në Qaben e bekuar marrin porosinë se njerëzimi buron nga një mashkull dhe një femër, gjë që ngre vetëdijen për barazinë në të gjitha sferat e jetës, për devotshmërinë, respektin, njerëzinë dhe zhvillimin në shërbim të njeriut.
Sot, në këtë ditë të madhe, besimtarët me kënaqësi kryejnë obligimin hyjnor të prerjes së kurbanëve të tyre, duke dëshmuar në praktikë se pasuria është dhuratë e Zotit dhe se ajo nuk është qëllim i jetës, por mjet për arritjen e qëllimeve të saj: besimit, kujdesit ndaj vetvetes, njeriut, jetimit, të varfrit, dijes dhe mirëqenies njerëzore.
Kjo vërteton parimin e madh islam se nuk ka vepra madhore pa sakrifica të mëdha dhe se e mira arrihet duke flijuar edhe më të dashurën që posedon njeriu.
Andaj, Festa e Kurban Bajramit, përmes kurbanit, kultivon personalitet konstruktiv, të matur, të urtë, të përkushtuar ndaj të mirës, solidar, paqësor dhe në çdo moment të kujdesshëm për mirëqenien e përgjithshme.
Kjo festë e bën besimtarin të vetëdijshëm që ta largojë nga vetja urrejtjen, xhelozinë, agresivitetin, nënçmimin, diskriminimin dhe përçarjen.
Ajo simbolizon vetëdijen e lartë mbi Krijuesin, kujdesin për familjen e shëndoshë, afërsinë me njëri-tjetrin, urtësinë në veprime, dashurinë ndaj të afërmve, prindërve dhe familjes, forcimin e lidhjeve ndërnjerëzore, shmangien e konflikteve ndërmjet vendeve dhe kombeve, si dhe mbjelljen e paqes, tolerancës dhe solidaritetit për ngritjen e vetvetes, familjes dhe shoqërisë në përgjithësi.
Besimtarë të nderuar,
Në këtë festë të madhe, shfrytëzoj rastin që, në emër të Bashkësisë Fetare Islame të RMV-së dhe në emrin tim personal, t’ju shpreh urimet më të sinqerta dhe më të përzemërta të gjithë besimtarëve, familjeve tona, si dhe bashkatdhetarëve tanë kudo që jetojnë.
Lusim Zotin e Madhërishëm që t’i pranojë sakrificat tona, kurbanët dhe lutjet tona, duke na shpërblyer me mëshirën dhe begatitë e Tij të pakufishme.
URIME FESTA E MADHE E KURBAN BAJRAMIT”, ka thënë në mesazhin e urimit efendi Fetahu.

Lajme

MPB: Mos i hapni mesazhet e rrejshme për kinse gjoba në trafik

Ministria e Punëve të Brendshme paralajmëron se qytetarëve po u dërgohen mesazhe të rreme SMS me njoftime për kinse shkelje në trafik dhe gjoba që lidhen me sistemin “Safe City”.

Sipas MPB-së, mesazhet përmbajnë link përmes të cilave qytetarëve u kërkohet të japin të dhënat personale ose bankare dhe të paguajnë një gjobë të pretenduar. Kjo është përpjekje për mashtrim dhe mbledhje të dhënash të ndjeshme.
Ministria thekson se mesazhet zyrtare SMS për shkeljet dërgohen nga dërguesi “MVR-SC”. Mesazhi duhet të përfshijë targën e regjistrimit të automjetit, dhe lidhja zyrtare duhet të çojë në domenin safecountry.mvr.gov.mk.

Qytetarëve u kërkohet të mos hapin linqe të dyshimta dhe të mos japin numrat e kartave të pagesës, fjalëkalimet ose të dhëna të tjera personale nëse nuk janë të sigurt për vërtetësinë e mesazhit.

MPB rekomandon që çdo mesazh i dyshimtë të kontrollohet me kujdes, dhe çdo përpjekje e mundshme mashtrimi duhet të raportohet në institucionet kompetente.

Për më tepër, MPB kujton se mashtrime të tilla shpesh janë të dizajnuara të duken si njoftime zyrtare, në mënyrë që qytetarët të reagojnë shpejt dhe pa verifikim shtesë. Prandaj rekomandohet që gjithmonë të kontrolloni dërguesin, adresën e lidhjes dhe përmbajtjen e mesazhit përpara se të ndërmerrni ndonjë veprim.

Lajme

Nga pikëpagesat rrugore për pesë muaj janë arkëtuar mbi 31 milionë euro

Nga fillimi i këtij viti deri në qershor, nga pagesa e taksave në vend janë mbledhur një shifër rekord prej 1.919.775.277 denarë (mbi 31 milion euro), krahasuar me vitin e kaluar 2025 ku janë mbledhur 21.891.532 denarë më shumë, informuan për MIA-n nga Ndërmarrja Publike për Rrugë Shtetërore (NPRRSH).

Stacioni më i frekuentuar i pagesës është Tetova, vijon Petroveci, Ramanlia, Gllumova, Milladinovci, Zhelina, Gostivari, Stobi, Kadrifakova, Preodi, Sopoti, Demir Kapija, Otovica dhe Gjevgjelia.

Sipas mjeteve të mbledhura dhe çmimit të biletave të ardhura më të larta ka në Ramanli, pastaj Milladinovc, Petrovec, Gllumovë, Zhelinë, Tetovë, Stobi, Preodi, Gostivar, Sopot, Gjevgjeli, Kadrifakovë, Otovicë dhe Demir Kapi.

“Ndërmarrja Publike për Rrugë Shtetërore, sa herë që ka një vëllim të shtuar të trafikut në pikat pagesore dhe veçanërisht në sezonin e verës, Departamenti i mbledhjes së taksave harton një plan veprimi (orar) ku në secilën pikë pagesore në të dy korridoret, të gjitha korsitë e disponueshme vihen në funksion, natyrisht, përparësi i jepet njëlloj mbledhjes elektronike të taksave (ENP) në M-tag ku të paktën një korsi është gjithmonë në funksion – këto janë automjete që kalojnë pa u ndalur dhe mbledhjes elektronike të taksave M-card – këto janë automjete që nuk kanë kontakt me punonjës, pra kalim pa kontakt”, thonë nga NPRRSH.

Pjesëmarrja e mbledhjes elektronike të taksave në qarkullimin total është 36 për qind nga gjithsej 11 stacione të pikave pagesore ku është vendosur.

NPRRSH thekson se të dhënat mbi shitjen e pajisjeve elektronike dhe rimbushjen e tyre, veçanërisht pasi pajisjet M-tag janë gjithashtu të kapshme në pikat e shitjes së operatorëve, tregojnë se mbledhja elektronike e taksave është rritur për 6 për qind nga totali.

Që nga maji i këtij viti, M-tags mund të blihen edhe në rrjetin e shitjeve të “Telekomit të Maqedonisë” dhe “A1 Maqedoni”, ndërsa më parë ato ishin në dispozicion vetëm në NPRRSH ose në stacionin e taksave në Petrovec.

Udhëheqësia e NPRRSH gjatë promovimit të mundësisë së blerjes së M-tags nga operatorët celularë, informoi se po shqyrtojnë futjen e një modeli të mbledhjes së taksave si në Serbi, pra një sistem të mbyllur për mbledhjen e kilometrave të përshkuara. Për këtë qëllim, një studim është duke u zhvilluar tashmë për të futur një sistem të tillë taë pagesës në Korridorin 8.

Nga mbledhja e taksave në pikat pagesore vitin e kaluar (që nga 23 dhjetori) u arrit fitim prej 4.158.914.362 denarë (67,624,624 euro).

Lajme

Mickoski: Mandati i Qeverisë është 4 vjet, por nëse opozita kërkon zgjedhje, do të caktojmë datën

Kryeministri dhe kryetari i VMRO-DPMNE-së, Hristijan Mickoski, deklaroi sonte se, nëse opozita kërkon zgjedhje të parakohshme parlamentare, ata janë të gatshëm në çdo kohë të dalin në zgjedhje dhe t’i fitojnë ato. Mickoski tha se qëndrimi i tij është i njohur dhe se Qeveria e tij ka marrë mandat katërvjeçar.

“Qëndrimi im është i njohur për opinionin, sikurse edhe qëndrimi i kësaj Qeverie, se ne kemi marrë mandat për katër vjet. Mandati përfundon në pranverën e vitit 2028. Ende kemi një Qeveri teknike. Kështu që mandati i kësaj Qeverie politike do të duhej të përfundonte diku nga fundi i vitit 2027. Këto janë parametrat që mund t’i them tani dhe mbi bazën e të cilëve kemi marrë besimin e qytetarëve”, tha Mickoski në një intervistë për emisionin “Tema e ditës” në TV Sitel.

I pyetur se çfarë mund ta ndryshojë qëndrimin e tij, ai tha se është logjike që opozita të dëshirojë të jetë në Qeveri, sepse mendon se mund të jetë më e mirë se Qeveria aktuale. Nëse opozita kërkon zgjedhje të parakohshme parlamentare, atëherë, si Qeveri, janë të gatshëm për një takim liderësh, ku do të dakordoheshin për datën dhe do të shkohej në zgjedhje të parakohshme parlamentare.

“Nuk do të ikim, sigurisht. Prandaj them se mandati ynë është katër vjet dhe për një periudhë të tillë kemi marrë mbështetjen e qytetarëve për të realizuar reformat. Por, nëse opozita na e hedh dorashkën, është normale që ne të mos ikim frikacakisht nga zgjedhjet. Përkundrazi, ne jemi të gatshëm në çdo kohë të dalim në zgjedhje dhe t’i fitojmë ato”, deklaroi kryeministri Mickoski.