Lajme

Mexhiti: Po punohet për jurisprudencën në shqip dhe të gjitha provimet e tjera

Se nuk do të zgjasë edhe 20 vite mbetet e qartë, por sa kohë nevojitet saktësisht për zgjidhjen e çështjes së jurisprudencës mbetet ende e paqartë. Bashkëkryetari i VLEN-it, Izet Mexhiti tha se po punohet intenzivisht për këtë çështje por edhe për zgjidhjen e provimeve të tjera profesionale që deri më tani janë mbajtur në maqedonisht.

“Besoj se në kuadër të asaj që e kam deklaruar, shumë shpejt do kemi zgjidhje të jurisprudencës”, tha Izet Mexhiti, Bashkëkryetar i VLEN-it .
-Sa shpejt nënkupton?
-Nëse kam thënë 3 muaj, domethënë aq sa kanë mbetur do të kalojë edhe ajo.”

Ndërkohë lidhur me vendimin e Gjykatës Kushtetuese për shfuqizimin e emrave të disa rrugëve në Tetovë, Mexhiti në intervistën në Alsat fajësoi përbërjet e kaluara qeveritare, ndërsa tha se Gjykata është në shërbim të opozitës.

“Faji është se zgjidhja ka qenë joligjore dhe gjysmake, të kish përfunduar të kishte pasur pëlqim nga Qeveritë BDI-LSDM, ose BDI VMRO, 20 vite, s’do të mundte as kjo gjykatë e instrumentalizuar ta shfuqizonte këtë vendim siç nuk mund ta shfuqizon pllakën te sheshi ‘Skënderbeu’ e cila është legale.

-Por unë prapë thash, vendimet tani po merren, jo atëherë-Sepse është gjykatë në shërbim të opozitës, për të krijuar probleme, për të krijuar marrëdhënie ndëretnike të komplikuar dhe për të poentu opozita”, theksoi Izet Mexhiti, Bashkëkryetar i VLEN-it .

Mexhiti nënvizoi se nëse vendimi do te kishte kaluar në Qeveri, sot kushtetuesja nuk do të kishte pasur as mundësinë dhe as luksin për ta shfuqizuar.

Lajme

Buteli mirëpriti motoçiklistë nga vendi dhe rajoni, Kostovski: Takim i motoçiklistëve po kthehet në traditë

Komuna e Butelit këtë fundjavë ishte nikoqire e një numri të madh motoçiklistësh, të cilët morën pjesë në takimin e motoçiklistëve të dytë të organizuar në parkun “Olimpiski Son”.

Kryetari i Komunës së Butelit, Darko Kostovski, bëri të ditur se ngjarja u zhvillua në një atmosferë festive, me shumë argëtim, lojëra me motorë, muzikë dhe ushqim, duke e kthyer fundjavën në një takim të veçantë për adhuruesit e motoçiklizmit.

Sipas tij, Komuna e Butelit edhe këtë vit ishte sponsori gjeneral dhe mbështetësi kryesor i këtij organizimi, duke dhënë mbështetje për zhvillimin e një aktiviteti që po fiton gjithnjë e më shumë interes.

“Argëtim i shkëlqyer, shumë lojëra me motorë, muzikë e mirë dhe ushqim i shijshëm ishin shenja dalluese të këtij takimi të motoçiklistëve”, theksohet në njoftimin e publikuar nga kryetari i komunës.

Kostovski ka përgëzuar edhe moto-klubin “Crni” nga Radishani për organizimin e suksesshëm të ngjarjes, duke vlerësuar punën e tyre në realizimin e këtij tubimi.

Ai ka shprehur bindjen se moto-sobori në Butel do të vazhdojë të rritet nga viti në vit, me synimin që edicioni i ardhshëm të jetë edhe më i madh dhe më i organizuar.

Lajme

Protestuesit nisin rrethimin e Kryeministrisë: Sonte do ta gdhijmë këtu! Marshim gjithë natën

Në Tiranë mbahet dita e 21-të e protestës, ku qytetarët janë mbledhur në sheshin “Skënderbej” dhe më pas u mblodhën poshtë Kryeministrisë.

Pjesë e kësaj proteste janë bashkuar edhe shqiptarë nga Diaspora, teksa me flamuj dhe pankarta në duar, ata kërkojnë të plotësohen kërkesat e tyre.

Përpara Kryeministrisë, ata pritet të mbajnë fjalimet e tyre të përhershme dhe më pas të nisin marshimin në rrugët e kryeqytetit.

Gjithashtu, protestuesit kanë hapur flamurin shqiptar te Piramida, teksa të tjerët kanë hedhur tullumbace kuqezi në bulevard.

Në thirrjet e tyre, ata i japin afat kryeministrit Rama për të dhënë dorëheqjen deri të dielën.

Pjesë e kësaj proteste u bë edhe deputetja që u largua nga PS një javë më parë, Marjana Koçeku.

Pas fjalëve të protestuesve në podium, ata nisën marshimin rreth Kryeministrisë dhe Piramidës, ndërkohë i bënin thirrje Edi Ramës dhe Sali Berishës për dorëheqje.

Një nga protestuesit njoftoi se protesta mund te vazhdoje deri në oret e vona të mengjesit pasi diaspora ka vendosur ta “ gdhijmë” në shesh.

Lajme

Ali Ahmeti nga Kërçova: Energjia që pashë sonte më bën optimist për fitoret që na presin

Kryetari i Bashkimit Demokratik për Integrim, Ali Ahmeti, ka ndjekur sot punimet e Kuvendit Zgjedhor në degën partiake të Kërçovës, ku janë zgjedhur strukturat e reja drejtuese të degës.

Në fjalimin e tij para anëtarësisë partiake, Ahmeti theksoi se Kërçova ka qenë gjithmonë një vatër e rëndësishme e angazhimit kombëtar dhe politik, ndërsa energjia që pa në këtë tubim, sipas tij, e bën optimist për fitoret që e presin partinë në të ardhmen.

Përmes një postimi publik, Ahmeti bëri të ditur se në Kuvendin Zgjedhor janë zgjedhur Kryesia e Degës, Këshilli Mbikëqyrës, Komiteti i Veteranëve dhe sekretarët e sekretariateve. Ai shprehu bindjen se përgjegjësitë e marra do të barten me dinjitet, profesionalizëm dhe përkushtim të plotë ndaj anëtarësisë, qytetarëve dhe kauzës së përbashkët.

“Këto struktura përbëhen nga njerëz kompetentë, të përgjegjshëm dhe të dëshmuar, të cilët, së bashku me mbështetjen e qytetarëve, do ta forcojnë edhe më tej BDI-në si adresën më të besueshme dhe shtëpinë politike të shqiptarëve në vend”, ka theksuar Ahmeti.

Në fund, ai uroi të zgjedhurit e rinj dhe u dëshiroi suksese në detyrat që i presin.