Kryeministri Edi Rama ka paralajmëruar masa ligjore ndaj atyre që shkaktojnë dëme gjatë trazirave në protestë, duke përfshirë edhe përgjegjësinë e prindërve për veprimet e fëmijëve të tyre të mitur.

Gjithashtu, Rama theksoi domosdoshmërinë e marrjes së masave radikale për kufizimin e rrjeteve sociale për të miturit nën moshën 16 vjeç.

“Kush shkatërron, duhet të paguajë. Prindërit nuk do të mbeten jashtë kësaj përgjegjësie dhe do të paguajnë dëmet që shkaktojnë fëmijët e tyre. Nuk jam i idesë së përgjegjësisë për të miturit. Përgjigjja e vetme është ajo që po bën sot Evropa: ulja e moshës dhe e qasjes.

Na duhet instrumenti i këmbënguljes së shtetit. Është koha për t’i dhënë përgjigje pyetjes se si do të realizojmë ndalimin e rrjeteve sociale për fëmijët nën moshën 16 vjeç dhe si do ta drejtojmë gishtin ndaj kësaj mase agresorësh të dinjitetit njerëzor, të cilët, përmes rrjeteve sociale, ua marrin njerëzve qetësinë familjare.

Kjo është diçka që dihej, që kur nën puplat e flamingove fshiheshin edhe duart që sot kanë dalë hapur. Por, nga ana tjetër, ajo që e sfidon një shtet e bën atë edhe më të fortë, vetëm më të fortë. Policia e Shtetit meriton gjithë respektin e të gjithëve, siç tregojnë të gjitha faktet dhe jo publikimet mediatike”, u shpreh Rama.

Bizhuteri ari me vlerë rreth 4 milionë denarë janë sekuestruar në pikën kufitare të Bogorodicës, pasi një qytetar i Maqedonisë së Veriut tentoi t’i fuste ilegalisht në vend, duke i fshehur brenda një jastëku për qafën.

Zv drejtori i doganave, Mustafa Dauti njoftoi se rasti u zbulua gjatë kontrollit të një autobusi që qarkullonte në linjën Stamboll–Gostivar. Pasi asnjë nga udhëtarët nuk deklaroi mallra për kontroll doganor, zyrtarët kryen një kontroll më të detajuar të autobusit.

Gjatë kontrollit, në brendësi të jastëkut për qafën që mbante me vete i dyshuari u gjetën 77 copë bizhuteri ari, me peshë të përgjithshme prej 612 gramësh.

Sipas provave të siguruara nga Departamenti i Hetimeve gjatë procedurës paraprake, i dyshuari e kishte blerë arin në një punëtori argjendarie në Stamboll, me qëllim që ta fuste ilegalisht në Maqedoninë e Veriut dhe më pas ta shiste në argjendarinë e tij.

Bizhuteritë janë sekuestruar, ndërsa ndaj tij është ngritur kallëzim penal për veprën penale të kontrabandës, e dënueshme sipas Kodit Penal.

Drejtoria e Policisë Financiare ka paraqitur kallëzim penal në Prokurorinë Themelore Publike në Shkup kundër J.M., ish-drejtor i përgjithshëm i SHA “Posta e Maqedonisë së Veriut” në pronësi shtetërore dhe kryetar i Bordit Drejtues, nën dyshimin për veprën penale “Keqpërdorim i pozitës dhe autoritetit zyrtar”, sipas nenit 353 të Kodit Penal.

Sipas Policisë Financiare, gjatë periudhës 2021–2022, i kallëzuari, në kundërshtim me statutin e shoqërisë dhe Ligjin për shoqëritë tregtare, nuk ndërmori veprime për zbatimin e vendimeve dhe konkluzioneve të Bordit Drejtues lidhur me shlyerjen e detyrimeve financiare ndaj dy subjekteve juridike, në vlerë të përgjithshme prej 19.292.984 denarësh.

Edhe pse i ishin dorëzuar dokumentet e nevojshme për kryerjen e pagesave, ai nuk e nënshkroi marrëveshjen për shlyerjen e borxhit, nuk i konfirmoi faturat dhe nuk i nënshkroi urdhërpagesat.

Me këto veprime dhe mosveprime, sipas kallëzimit, u mundësua ngritja e procedurave gjyqësore kundër shoqërisë, pas të cilave, me vendime gjyqësore, u përcaktuan detyrime për pagesën e kamatës ndëshkuese.

Në këtë mënyrë, SHA “Posta e Maqedonisë së Veriut” ka pësuar dëm financiar në vlerë prej 10.968.483 denarësh, vetëm në bazë të kamatave ndëshkuese.