Dalja e qytetarëve në zgjedhjet në Komunën e Bërvenicës ka shënuar pjesëmarrje të lartë, duke arritur në 48,64 për qind deri në orën 17:00, raporton live gazetari i TS Nevrij Ademi nga vendvotimet në komunën e Bërvenicës..

Sipas të dhënave të fundit nga KSZH-ja, në votime kanë marrë pjesë gjithsej 7.902 qytetarë nga 16.256 votues të regjistruar në listën zgjedhore. Ndërkaq, janë përpunuar 16.247 votues.

Krahasuar me orën 15:00, kur kishin votuar 6.579 qytetarë apo 40,49 për qind, deri në orën 17:00 numri i votuesve është rritur për 1.323 qytetarë.

Gazetari i TetovaSot, Nevrij Ademi, po raporton nga vendvotimet në Bërvenicë, duke përcjellë nga afër pjesëmarrjen dhe zhvillimet e procesit zgjedhor.

Në këto zgjedhje, gara për drejtimin e Komunës së Bërvenicës zhvillohet mes kandidatëve të AKI-së dhe VMRO-DPMNE-së.

Banka Popullore e Maqedonisë së Veriut ka vendosur administrim të përkohshëm në “Alta Banka SHA Manastir”, duke përcaktuar një kufi javor prej 10.000 denarësh për daljet e mjeteve nga llogaritë e personave fizikë përmes kartelave bankare.
Masa ka hyrë në fuqi më 1 nëntor 2026, ndërsa guvernatori Trajko Sllaveski ka theksuar se vendimi është marrë për mbrojtjen e bankës dhe interesave të depozituesve.
Sipas Sllaveskit, vendimi vjen pas zhvillimeve në Alta Banka në Beograd, së cilës i është revokuar licenca e punës dhe janë plotësuar kushtet për nisjen e procedurës së falimentimit. Kjo bankë është aksionare me pjesëmarrje të kualifikuar në Alta Banka në Manastir.
“Me qëllim të mbrojtjes së bilancit të ‘Alta Banka SHA Manastir’ dhe interesave të depozituesve të saj, Këshilli Ekzekutiv i Bankës Popullore, në mbledhjen e mbajtur më 1 nëntor 2026, miratoi vendim për vendosjen e administrimit në ‘Alta Banka SHA Manastir’. Vendimi tashmë është në fuqi”, njoftoi Sllaveski.
Ai theksoi se masa është e përkohshme dhe nuk është marrë për shkak të gjendjes së dobët financiare të bankës në Manastir, por për shkak të zhvillimeve që lidhen me aksionarin e saj në Beograd.
Sipas guvernatorit, Alta Banka ka kapitalizim të lartë, është likuide, ka cilësi solide të portofolit kreditor dhe i përmbush të gjitha standardet mbikëqyrëse.
Ndërkohë, Banka Popullore nuk ka saktësuar të gjitha kategoritë e pagesave që do të përfshihen në kufizimet e përkohshme dhe as datën e saktë deri kur do të vlejnë ato.
Sllaveski u ka bërë thirrje klientëve që kanë kredi në këtë bankë të vazhdojnë t’i shlyejnë detyrimet e tyre rregullisht dhe me kohë, duke theksuar se vendosja e administrimit të përkohshëm nuk e pezullon obligimin për pagesën e kredive.

Dy automjete zyrtare të Ministrisë së Ekonomisë, të cilat shfrytëzohen nga Inspektorati Shtetëror i Tregut në Tetovë, janë dëmtuar nga një person i panjohur.
Sipas informacioneve të SPB-së Tetovë, më 31 tetor, në orën 23:35, dëmtimin e ka denoncuar një 45-vjeçar nga fshati Xhepçisht, i punësuar në objektin e Inspektoratit të Tregut në rrugën “Boris Kidriç”.
Sipas denoncimit, rreth orës 22:40, ai kishte vërejtur një person të panjohur duke hipur mbi dy veturat zyrtare të markës “Peugeot”, me targa të Shkupit.
Gjatë këtij veprimi, personi kishte thyer xhamin e pasmë të njërës veturë, ndërsa automjetit tjetër i kishte dëmtuar fshirësen e xhamit të pasmë. Më pas, ishte larguar nga vendi i ngjarjes.
Policia ka kryer këqyrjen në vendin e ngjarjes dhe po ndërmerr masa për zbardhjen e plotë të rastit dhe identifikimin e personit përgjegjës.