Blerjet online nga platformat ndërkombëtare si Temu, Shein dhe AliExpress po përballen me kosto të reja në Bashkimin Evropian. Sipas raportimit të Skopjeinfo, nga 1 nëntori ka hyrë në zbatim një tarifë administrative prej 2 eurosh për artikull, për mallrat që porositen nga vendet jashtë BE-së.
Masa synon të mbulojë shpenzimet e kontrollit doganor dhe përpunimit të miliona dërgesave të vogla që mbërrijnë çdo ditë në tregun evropian.

Kjo pagesë është e ndarë nga tarifa e përkohshme doganore prej 3 eurosh për dërgesat me vlerë nën 150 euro, e cila, sipas artikullit, zbatohet që nga 1 korriku.

Ndërsa tarifa doganore synon krijimin e kushteve më të barabarta ndërmjet tregtarëve tradicionalë dhe platformave ndërkombëtare, pagesa administrative lidhet me shpenzimet për kontrollin dhe përpunimin e porosive.

A do të shtrenjtohen porositë edhe për qytetarët e Maqedonisë së Veriut?

Për blerësit në Maqedoninë e Veriut, tarifat e reja të BE-së nuk nënkuptojnë automatikisht pagesa shtesë.

Meqenëse vendi nuk është anëtar i Bashkimit Evropian, porositë që mbërrijnë drejtpërdrejt në Maqedoni vazhdojnë t’u nënshtrohen rregullave vendore doganore dhe tatimore.

Megjithatë, ndryshimet në tregun evropian mund të ndikojnë në mënyrë të tërthortë në kostot e transportit dhe çmimet e porosive që kalojnë përmes qendrave të shpërndarjes në BE.

Komisioni Rregullator për Energjetikë (KRRE) ka vendosur rritjen e çmimeve me pakicë të derivateve të naftës, mesatarisht për 1,55 për qind. Vendimi hyn në fuqi nga mesnata, ndërsa rritja prek benzinat dhe naftën.

Sipas vendimit të KRRE-së, Eurosuper BS-95 shtrenjtohet për 2 denarë dhe do të kushtojë 93 denarë për litër. Eurosuper BS-98 gjithashtu rritet për 2 denarë, duke arritur në 95 denarë për litër.

Ndërkohë, Eurodizel BS (D-E V) shtrenjtohet për 1 denar dhe çmimi i ri do të jetë 100 denarë për litër.

Pa ndryshime mbetet çmimi i vajit ekstra të lehtë për amvisëri (EL-1), i cili do të vazhdojë të kushtojë 110 denarë për litër.

Bashkëkryetari i VLEN-it, Izet Mexhiti, ka reaguar pas përfundimit të zgjedhjeve në Bërvenicë dhe deklaratave politike që pasuan rezultatin zgjedhor.

Mexhiti ka theksuar se zgjedhjet kanë përfunduar dhe se Bërvenica tashmë ka kryetarin e saj të komunës, ndërsa deklaratat polarizuese të bëra pas zgjedhjeve i ka cilësuar si “folklor paszgjedhor”.

Ai ka theksuar se votat janë shprehje e lirë e vullnetit të qytetarëve dhe se asnjë subjekt politik nuk i ka ato në pronësi.

Sipas Mexhitit, në politikë pozicionimi kundër të gjithëve nuk është strategji që çon drejt suksesit, por një qasje që herët a vonë prodhon zhgënjim.

Duke folur për karakterin multietnik të shoqërisë, ai ka theksuar se nuk duhet të ketë ndarje në “ne” dhe “ata”, pasi kjo nënkupton pabarazi dhe përpjekje për të përjashtuar tjetrin.

“Dialogu dhe bashkëpunimi në çdo shoqëri janë imperativ dhe parakusht për funksionim të mirëfilltë. Në shoqëritë multietnike, ky dialog është detyrim i të gjithë aktorëve shoqërorë”, ka shkruar Mexhiti.

Në fund, ai ka theksuar se qytetarët vendosin me votë, ndërsa politikanët duhet të marrin përgjegjësi për qëndrimet dhe veprimet e tyre, në vend që të merren me arsyetime dhe interpretime paszgjedhore.