Lajme

Një e treta e qytetarëve duan të largohen nga vendi, kryesisht të moshës 40 – 49 vjeç

Çdo i treti person në Maqedoni të Veriut mendon të largohet nga vendi, tregon hulumtimi i opinionit publik i realizuar për Detektor nga Instituti për hulumtime politike në Shkup. Sipas hulumtimit 32.3% e të anketuarve deklaruan se po mendonin ose kishin menduar ndonjëherë të largoheshin nga vendi, ndërsa 63.6% nuk kishin menduar për këtë temë.

INSTITUTI PËR HULUMTIME POLITIKE

“Është për t’u habitur që më së shumti për emigracionin mendojnë personat nga mosha 40 deri në 49 vjeç, ku 42.5% prej tyre thanë se kishin apo kanë plane për t’u larguar nga vendi. Numra të ngjashmëm prej 42.2% të qytetarëve që mendojnë të largohen janë edhe në grupmoshën 30-39 vjeç, ndërsa ndër më të rinjtë, ata nën 30 vjeç, 37.8% kanë menduar ose po mendojnë të largohen nga vendi”

Krahasimi me anketat e viteve të kaluara, të cilat i ka bërë instituti, nuk tregojnë ndonjë ndryshim të dukshëm në qëndrimet e qytetarëve. Në të gjitha anketat e 5 viteve të fundit, përqindja e qytetarëve që kanë menduar ose po mendojnë të largohen është mbi 30%.

Megjithatë 52,7% e të gjithë qytetarëve të anketuar kanë thënë se në 5 vitet e ardhshme nuk kanë mundësi që të shpërngulen nga vendi, ndërsa 11,5% e të anketuarve janë të sigurt se do të largohen në të njëjtën periudhë.

INSTITUTI PËR HULUMTIME POLITIKE

“Qytetarët shpesh vendosin të largohen për shkak të pagave më të larta (17.2%), kushteve më të mira të punës (15.7%), mundësive më të mira që u ofrohen fëmijëve (12.2%) si dhe sistemit më të mirë shëndetësor dhe arsimor që ofrojnë vendet e huaja (11.5% )”

Tek të rinjtë nën 30 vjeç, pagat e pritshme më të larta (21.7%) dhe kushtet më të mira të karrierës (20.6%) janë arsyet kryesore pse ata largohen ose do të largoheshin nga vendi.

Destinacioni më i preferuar për zhvendosje janë vendet e Bashkimit Europian. 42.7% e qytetarëve thanë se nëse vendosin të largohen, do të shpërngulen në një nga shtetet anëtare të Bashkimit Europian.

Dy të tretat e qytetarëve tashmë kanë një të afërm që është shpërngulur jashtë vendit. Krahasimi me anketat e 5 viteve të fundit tregon se numri i qytetarëve që kanë të afërm që janë shpërngulur nga vendi është rritur nga 60% vitin e kaluar në 66.6% këtë vit.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.