Lajme
Dimitrievski: Dua t’i përfundoj projektet që i kam nisur në Kumanovë, jam i kënaqur me ministrat në Qeveri
Maksim Dimitrievski, kryetar i Kumanovës dhe lider i lëvizjes “Për Maqedoninë tonë” (ZNAM), deklaroi se do të kandidojë për një mandat të tretë si kryetar komune, sepse dëshiron të përfundojë projektet që tashmë i ka nisur. Në një intervistë për TV Alfa, ai tha se qytetarët do të vendosin nëse ai ka “lodhur” me prezencën e tij në skenën lokale, por ai beson në punën që ka bërë.
“Nëse dikujt i shkon mirë puna, shpresoj që qytetarët ta njohin dhe ta mbështesin këtë. Në të kundërtën, do të vazhdoj jetën time të përditshme dhe aktivizmin politik, sepse ZNAM sapo ka nisur rrugëtimin në skenën politike – partia ekziston vetëm një vit e gjysmë”, tha Dimitrievski.
Ai kujtoi se në mandatin e parë ka stabilizuar financiarisht komunën më të zhytur në borxhe, ndërsa në mandatin e dytë janë realizuar projekte kapitale, si në zona urbane ashtu edhe në fshatra. Ndjehet krenar për ndërtimin e qendrës shpërndarëse të “Lidl” në Kumanovë, të cilën e cilësoi si investimin më të madh të një kompanie të huaj në vend.
Dimitrievski konfirmoi se për zgjedhjet lokale të ardhshme, ZNAM do të ketë mbështetje nga VMRO-DPMNE, e cila nuk do të ketë kandidatë të vet në Kumanovë dhe në komunën Qendër, por do të përkrahë kandidatët e propozuar nga lëvizja e tij.
“Ne si ZNAM nuk kemi kandidat për të gjitha komunat, sepse nuk duam vetëm të marrim pjesë – duam të fitojmë. Kur ke mbështetjen e një partie serioze si VMRO-DPMNE, ajo ka rëndësi”, shtoi ai.
Reforma në drejtësi dhe punën e ministrave të ZNAM
Në lidhje me punën e ministrave të partisë së tij në Qeveri, Dimitrievski tha se është i kënaqur me angazhimin e tyre, veçanërisht me ministrin e Drejtësisë, Igor Filkov, i cili sipas tij ka përgatitur 22 projektligje, por vuri në dukje se miratimi i ligjeve është proces i Kuvendit dhe Qeverisë.
“Nuk mund të përfundosh diçka për një vit e gjysmë që s’është bërë për 8-9 vjet. Ndryshimet në Kodin Penal të bëra për 48 orë, tani na kanë sjellë në një situatë ku krimet janë bërë, por fajtorët nuk mund të ndëshkohen”, deklaroi ai.
Duke folur për ministrinë e Administratës Publike, të udhëhequr nga Goran Minçev i ZNAM, ai përmendi si sukses heqjen e balancerit dhe miratimin e disa ligjeve të rëndësishme.
“Gjithmonë ka vend për përmirësim, por në përgjithësi jam i kënaqur me punën e ministrave tanë. Nëse ka rikonstruim të mundshëm të Qeverisë, ajo është përgjegjësi e kryeministrit dhe ai duhet të japë sqarime para shumicës parlamentare”, tha ai.
Qëndrime për zgjedhjet dhe zhvillimet politike
Dimitrievski u shpreh se nuk pret që BDI të ketë rezultate më të mira se koalicioni VLEN në zgjedhjet e ardhshme, për aq kohë sa partia e Ahmetit nuk reformohet nga brenda dhe nuk largohet nga njerëzit që, sipas tij, ishin pjesë e krimit dhe korrupsionit.
Gjithashtu, ai u deklarua i hapur për të mbështetur platformën nacionale të propozuar nga lideri i LSDM-së, Venko Filipçe, me kusht që të mos rrezikohet gjuha, identiteti, kultura dhe vetëqenia kombëtare e maqedonasve.
Në fund, ai komentoi edhe për zjarret e qëllimshme që kanë ndodhur në Kumanovë dhe vende të tjera, duke thënë se ekziston dyshim për skenarë të qëllimshëm në prag të zgjedhjeve, dhe se pajtohet me kryeministrin Mickoski që kjo mund të jetë pjesë e një forme të sulmeve hibride.
“Ky fenomen ndodh gjithmonë para zgjedhjeve. Pas tyre, gjithçka qetësohet. Por problemi i vërtetë është mungesa e një sistemi funksional dhe dënimeve efektive – politikat ndëshkuese janë katastrofale”, tha Dimitrievski.
Lajme
Në ditën e parë u shitën mbi 24.5 milionë kopje të GTA 6, 2.36 miliardë dollarë të ardhura
Pas 13 vitesh pritje, videoloja e shumëpritur Grand Theft Auto 6 (GTA 6) ka debutuar me një sukses të jashtëzakonshëm tregtar. E publikuar më 19 nëntor, loja ka arritur të kthehet brenda pak orësh në një nga lançimet më të mëdha në historinë e industrisë së argëtimit.
Sipas vlerësimeve paraprake të kompanisë analitike Sensor Tower, shitjet e GTA 6, duke përfshirë edhe porositë paraprake, kanë kaluar 24.5 milionë kopje. Të ardhurat vlerësohen në rreth 2.36 miliardë dollarë.
Nëse këto shifra konfirmohen, GTA 6 do të regjistrojë një nga debutimet më të mëdha tregtare të të gjitha kohërave. Kompania mëmë Take-Two Interactive dhe zhvilluesi Rockstar Games nuk kanë publikuar ende shifra zyrtare të shitjeve, por e kanë përshkruar kërkesën për lojën si të paprecedentë.
Sipas agjencisë Reuters, vlerësimet e Sensor Tower tregojnë se GTA 6 ka shitur pothuajse trefishin e kopjeve që kishte shitur paraardhësi i tij, GTA 5, gjatë 24 orëve të para të publikimit në vitin 2013.
Të ardhura sa një superprodhim hollivudian
Përmasat e suksesit bëhen edhe më të dukshme kur krahasohen me industrinë e filmit. Sipas të dhënave të cituara në raport, filmi Spider-Man: Brand New Day ka grumbulluar rreth 2.5 miliardë dollarë nga shitja e biletave në kinematë botërore.
GTA 6 ka arritur t’i afrohet kësaj shifre që në ditën e parë të publikimit, duke përfshirë edhe porositë paraprake.
Ndërkohë, kompania kërkimore e tregut Niko Partners parashikon se të ardhurat nga loja mund të kalojnë 3 miliardë dollarë deri në fund të vitit 2026.
Miliona lojtarë në pritje, rekord edhe në trafikun e internetit
Publikimi i GTA 6 ka shkaktuar një mobilizim të jashtëzakonshëm të lojtarëve në mbarë botën. Shumë prej tyre kanë qëndruar zgjuar gjatë natës për të nisur menjëherë aventurën e re, ndërsa të tjerë kanë planifikuar të marrin pushim nga puna për t’i kushtuar më shumë kohë lojës.
Interesi masiv është reflektuar edhe në trafikun e internetit. Në Britaninë e Madhe, operatori Virgin Media O2 ka regjistruar nivele rekord të transferimit të të dhënave, për shkak të shkarkimeve dhe instalimeve paraprake të lojës.
GTA 6 zë rreth 212 GB hapësirë, çka kërkon një sasi të konsiderueshme të dhënash për shkarkim dhe instalim.
Një nga videolojërat më të shtrenjta në histori
Pas këtij projekti qëndron një investim gjigant. Kostoja e zhvillimit të GTA 6 vlerësohet të ketë kaluar 1 miliard dollarë, shifër që, nëse konfirmohet, do ta rendiste atë ndër videolojërat më të shtrenjta të prodhuara ndonjëherë.
Rockstar Games ka punuar për më shumë se një dekadë për të sjellë pasardhësin e GTA 5, i cili u publikua në vitin 2013 dhe u shndërrua në një prej lojërave më të suksesshme komerciale të të gjitha kohërave.
Ngjarjet e lojës zhvillohen në Leonida, një shtet imagjinar i frymëzuar nga Florida, ndërsa qendra kryesore e historisë është Vice City, e ndërtuar mbi modelin e Majamit.
Protagonistët janë Lucia dhe partneri i saj Jason, dy personazhe të përfshirë në botën e krimit, grabitjeve dhe ndjekjeve të rrezikshme. Loja ndërthur aksionin me satirën sociale, duke trajtuar kulturën amerikane dhe anën e errët të ëndrrës amerikane.
Rockstar ka ende dy burime të mëdha të ardhurash
Pavarësisht suksesit të jashtëzakonshëm të ditëve të para, potenciali tregtar i GTA 6 mund të rritet edhe më tej.
Për momentin, loja është e disponueshme për PlayStation 5 dhe Xbox Series X|S. Ende nuk është njoftuar një datë zyrtare për versionin e kompjuterëve, ndërsa pritet edhe prezantimi i modalitetit online, ku lojtarët do të mund të ndërveprojnë dhe të zhvillojnë misione së bashku përmes internetit.
Përvoja e GTA 5 tregon rëndësinë që mund të ketë kjo pjesë e lojës. GTA Online u shndërrua në një burim të rëndësishëm të ardhurash për kompaninë, përmes blerjeve virtuale, automjeteve luksoze, pronave dhe përmbajtjeve të tjera shtesë.
Kufizime në disa tregje
Përmbajtja e lojës, e cila përfshin skena të dhunshme dhe materiale të destinuara për të rritur, ka sjellë edhe kufizime në disa tregje ndërkombëtare.
Në Japoni janë raportuar ndërhyrje për përshtatjen e përmbajtjes me rregullat vendase, ndërsa në Kinën kontinentale loja nuk ka marrë miratimin për shitje zyrtare.
Megjithatë, këto kufizime nuk duket se kanë ndikuar në interesin e jashtëzakonshëm global.
Me më shumë se 24.5 milionë kopje të shitura sipas vlerësimeve paraprake dhe të ardhura që kapin rreth 2.36 miliardë dollarë, GTA 6 po vendos një standard të ri për industrinë e videolojërave. Për Rockstar Games, debutimi i 19 nëntorit mund të jetë vetëm fillimi i një suksesi që pritet të vazhdojë edhe në vitet e ardhshme.
Lajme
Era e fuqishme në Tetovë dhe Pollog! Rreth 15 intervenime, pa të lënduar
Erërat e fuqishme që përfshinë mbrëmë Tetovën dhe rajonin e Pollogut shkaktuan dëme të shumta materiale. Pemë të rrëzuara, kulme të dëmtuara, rrugë të bllokuara dhe ndërprerje të energjisë elektrike në disa vendbanime. Ekipet e zjarrfikësve intervenuan në rreth 15 raste, ndërsa në terren gjatë gjithë natës ishin edhe ekipet e ndërmarrjes publike komunale për largimin e pemëve dhe degëve të rrëzuara.
“Patëm rreth 15 intervenime, dy zjarre, disa kulme të rrëzuara, rrugë të bllokuara, si dhe shtylla elektrike të dëmtuara. Kemi intervenuar në të gjitha rastet dhe situatën e kemi pasur nën kontroll. Fatmirësisht, nuk kemi persona të lënduar”, deklaroi Avni Ameti, shef i NjTKZ Tetovë.
Komuna e Tetovës u ka bërë apel qytetarëve që të kenë kujdes gjatë motit të lig dhe të shmangin lëvizjet e panevojshme. Deri më tani, në Komunë nuk është paraqitur asnjë kërkesë zyrtare për kompensimin apo evidentimin e dëmeve.
“Komuna e Tetovës mbrëmë doli me apel për qytetarët që të kenë kujdes dhe të shmangin lëvizjet gjatë erërave të fuqishme. Deri më tani nuk kemi pasur denoncime nga banorët për dëmet materiale, por nëse paraqiten raste të tilla, Komuna së bashku me inspektoratin do të dalë në terren për verifikimin e tyre dhe marrjen e masave të nevojshme”, deklaroi Besarta Ramadani, zëdhënëse e Komunës së Tetovës.
Në polici është raportuar edhe dëmtimi i një automjeti nga tjegullat e një kulmi në rrugën industriale. Ekipet e SPB Tetovë, zjarrfikësit dhe ndërmarrja publike komunale kanë bashkëpunuar për sigurimin dhe pastrimin e rrugëve. Deri më tani, as në Qendrën për Menaxhim me Kriza nuk janë raportuar dëme më të mëdha materiale. Fatmirësisht, nga të gjitha incidentet nuk ka persona të lënduar.
Lajme
Imer Aliu: PPD, BDI dhe VLEN – emra të ndryshëm, e njëjta filozofi politike!
35 vite pluralizëm, emra të rinj partish, por e njëjta formulë politike: kompromiset për pushtet në kurriz të interesave të shqiptarëve. Kështu e përshkruan përfaqësimin politik shqiptar në Maqedoninë e Veriut, Imer Aliu, përfaqësues i lartë i PDSH-së.
Sipas Aliut, nga PPD-ja te BDI-ja dhe VLEN-i, partitë kanë ndryshuar emrat, por jo filozofinë politike, duke e vendosur qëndrimin në pushtet mbi interesat e shqiptarëve.
Ai thekson se PDSH-ja ka përfaqësuar një koncept tjetër, të bazuar në dinjitetin kombëtar, barazinë politike dhe refuzimin e nënshtrimit për interesa pushteti.
“Sa herë duhet të ndryshojnë emrat e partive që më në fund të kuptoni se po votoni për të njëjtin model politik?”, pyet Aliu.
-
Lajme12 months agoZbulohet Identiteti i Personit Të Vrarë Në Tetovë
-
Lajme2 years agoDetaje nga ngjarja tronditëse në Tetovë: Burri vrau gruan dhe vajzën 4 vjeçe, pastaj qëlloi djalin 9 vjeç dhe veten e tij
-
Lifestyle3 years agoTrashet miqësia me maqedonë në familjen e Adelina Tahirit
-
Lajme3 years agoKëto ministri dhe poste zv ministrash do ti takojnë VLEN-it
-
Lajme12 months agoAplikacion që zbulon kamerat radar, shoferët e shkarkojnë masivisht
-
Lajme3 years agoJa kush janë 13 deputetët e koalicionit “VLEN” (Lista)
-
Lajme3 years agoBurrin e Shkurte Fejzës e godet vetura (PAMJE)
-
Lajme1 month agoÇmimi i naftës shënon rënie
