Lajme

Albi Qamili bëhet njeriu i dytë në Tetovë, Bilall Kasami e emëron zëvendës Kryetar

Albi Qamili do të jetë Zëvendës Kryetar i Komunës së Tetovës, me vendim të kryetarit Bilall Kasami, i cili sot edhe zyrtarisht e nënshkroi këtë vendim.

Kasami para mediave tha se Albi Qamili do të jetë një krah i fuqishëm i tij për realizimin e projekteve në të mirë të qytetarëve. Ai gjithashtu theksoi se Qamili ka qenë një ndër aktivistët për të spikatur të rinisë tetovare, i cili ka kontribuar për ndryshimet në Tetovë.

“Albi Qamili është ndër aktivistët më të spikatur të rinisë tetovare, i cili ka dhënë kontribut të rëndësishëm për ndryshimet që kanë ndodhur në Komunën e Tetovës. Për mua si kryetar, duke pasur angazhimet edhe jashtë Komunës së Tetovës, do të jetë një krah i fuqishëm dhe lehtësim, që qytetarëve t’iu shërbejmë pa vonesa dhe pengesa. Besoj që Albi Qamili do të jetë krah i fuqishëm në drejtim të realizimit të projekteve në të mirë të qytetarëve të Tetovës”, tha Kasami.

Ndërsa zv.kryetari i ri Albi Qamili, tha se këtë detyrë do ta kryejë me përgjegjësi, duke pasur parasysh besimin dhe pritshmëritë e qytetarëve.

“Po e marr këtë detyrë me shumë përgjegjësi dhe mirënjohje. Vërtetë është kënaqësi të jesh i dyti aty ku Bilall Kasami është i pari. Unë ju siguroj se këtë detyrë do ta kryej me përgjegjësi, duke pasur në mendje besimin tuaj, pritshmëritë dhe prioritetet tuaja dhe platformën tonë fituese për Kapitullin e Dytë për zhvillimin e Tetovës”.

“Kam kënaqësinë që do të kem rastin të kontribuoj për një Tetovë edhe më të mirë, edhe më të zhvilluar, më të pastër dhe më funksionale, edhe si këshilltar, por tashmë edhe si Zëvendës Kryetar i Komunës. Transformimi i Tetovës, që filloi para katër vitesh me Bilall Kasamin në krye, duhet të vazhdojë edhe më fuqishëm në mandatin e dytë të kryetarit

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.