Lajme

Historiani serb: Shqiptarët janë autoktonë në Ballkan, serbët rrëmbyen tokat e tyre

Një libër historie për klasën e gjashtë në Serbi ka shkaktuar reagime të forta dhe polemika në qarqet akademike dhe mediatike, pasi në të thuhet se shqiptarët janë popull autokton në Ballkan, ndërsa serbët janë ardhacakë që u vendosën në tokat e tyre.
Sipas mediave serbe, ky detaj është cilësuar si “skandaloz” për mënyrën se si paraqitet historia mesjetare e Serbisë.
Libri është botuar nga Enti i Teksteve dhe Mjeteve Mësimore të Serbisë dhe është shkruar nga historiani Rade Mihaljçiç, profesor në Fakultetin e Filozofisë të Universitetit të Beogradit dhe anëtar i Akademisë Serbe të Shkencave dhe Arteve.
Në tekst thuhet qartë se sllavët – përfshirë serbët – ishin emigrantë në Ballkan, ndërsa shqiptarët përshkruhen si pasardhës të ilirëve dhe si popull vendas.
“Vendasit janë shqiptarët, të cilët ishin pasardhës të ilirëve,” citohet në librin shkollor.
Autori flet gjithashtu edhe për pushtimet osmane në trojet shqiptare, duke theksuar se shqiptarët ishin pala e dëmtuar historikisht.
Ky përshkrim ka shkaktuar zemërim te disa historianë serbë. Profesori universitar John Deretiç ka reaguar ashpër, duke e quajtur përmbajtjen e librit të papranueshme dhe duke kërkuar rishikim të saj.
“Në këtë libër shkollor thuhet se sllavët erdhën në Kosovë e Metohi dhe atje gjetën ilirët, që janë shqiptarët e sotëm. Thuhet se ua morën shtëpitë dhe tokat, dhe se për këtë arsye ata u detyruan të shkonin në male për të jetuar me bagëti. Kjo është skandaloze. Çfarë duhet të mësojnë fëmijët tanë nga kjo?”, ka deklaruar Deretiç.
Rade Mihaljçiç ka lindur më 21 janar 1937 dhe njihet për studimet e tij mbi historinë mesjetare serbe, veçanërisht për Perandorinë Serbe dhe Betejën e Kosovës.

Lajme

Kasami për protestën: BDI “hedh gurin dhe fsheh dorën”

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në “TV Koha” duke komentuar protestën e së nesërmes në Tetovë thotë se BDI në një farë forme luan rolin e saj në stilin “hedh gurin dhe fsheh dorën”!

Sipas tij, bëhet fjalë për situatë absurd.

“BDI nuk deklarohen se qëndrojnë zyrtarisht pas protestës. Këshilltarët e BDI-së para një kohe kërkuan seancë të jashtëzakonshme të Këshillit komunal dhe kur morën informatë se kjo nuk është çështje e Këshillit komunal dhe në situatë kur Këshilli komunal mund të përsërisë gabimin që është bërë në 2007, me automatizëm Këshilli komunal shkon në zgjedhje në bazë të Ligjit dhe Kushtetutës dhe e heshtën atë çështje. Duke e ditur që faji më shumë është i atyre, sepse nuk kemi ne aspak faj si VLEN as në pushtetit qendror e as në atë lokal, ata po mundohen edhe një herë të ‘hedhin gurin dhe të fshehin dorën’. Konkretisht ata duhet të tregojnë se cili është faji i kësaj qeverise aktuale të komunës dhe kësaj qeverie aktuale në pushtetin qendror”, ka thënë Kasami.

Lajme

Kasami: Vendimi i Gjykatës Kushtetuese nuk do të ndryshojë asgjë

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha ka thënë se vendimi i Gjykatës Kushtetuese për emrat e rrugëve në Tetovë, nuk do të ndryshojë asgjë.

I pyetur se çfarë do të ndodhë me fatin e rrugës “Dervish Cara”, Sheshin “Iliria” dhe cili do të jetë epilogu, Kasami shprehet i prerë:

“Vendimi i Gjykatës Kushtetuese nuk do të ndryshojë asgjë. Komuna do të vazhdojë të përdorë emërtimet e vitit 2007 e këndej, institucionet do të vazhdojnë të përdorin emërtimet si gjithmonë, ndërkohë Komuna e Tetovës do të vazhdojë me procesin e emërtimit të rrugëve. Ky proces do të përfundojë konform Ligjit dhe Kushtetutës dhe nga ai moment edhe këta rrugë dhe shumë rrugë tjera do të kenë emërtime shqiptare”, ka thënë mes tjerash Kasami.

Lajme

Kasami: BDI dhe Gjykata Kushtetuese të sinkronizuar dakorduan vendimin

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha duke komentuar protestën e nesërme tha se qytetarët nuk do t`i përgjigjen pozitivisht protestës së BDI-së, duke pranuar se integristët megjithatë kishin harxhuar kohën e tij, siç tha ai, “për të trajtuar një problem inekzistent”.

Ai tha se le të tregojnë se cila është përgjegjësia e Tetovës, cila është përgjegjësia e kësaj qeverie që ne siç tha, “të dalim e t`u përgjigjemi”.

“E vetmja përgjegjësi këtu është e Gjykatës Kushtetuese dhe e BDI-së që në mënyrë të sinkronizuar dakordojnë një vendim për abrogim të këtij vendimi në momentin kur jemi në fazën finale të emërtimit të rrugëve konform Kushtetutës dhe Ligjit. Dhe një herë duhet të pyes publikisht BDI-në ‘A është edhe një tentim i BDI-së, për të ndalur procesin e emërtimit të rrugëve në Tetovë?”, ka thënë Kasami.