Lajme

Në Gostivar rritet numri i lejeve për ndërtim

Komuna e Gostivarit është ndër komunat e para në vend që ka ndarë leje për ndërtim gjatë vitit 2025. Nga sektori i urbanizmit në këtë Komunë bëjnë të ditur se brenda vitit 2025 janë dhënë 258 leje ndërtimi. Udhëheqësi i Sektorit të Urbanizmit në Komunën e Gostivarit, Semir Zulbehari, ka bërë të ditur se kjo është arritur falë korrektësisë dhe shërbimit në nivel që jep ky sektor në drejtim të qytetarëve, të cilët kërkojnë leje për ndërtim. “118 leje janë dhënë për ndërtim të shtëpive individuale, 24 leje për ndërtim të objekteve kolektive, nëntë për objekte industriale, 70 leje janë dhënë për projekte infrastrukturore, 37 leje janë dhënë për ndërhyrje të ndryshme, duke përfshirë adaptime, rindërtime, mbindërtime si dhe vendosje të paneleve fotovoltaike.

Gjatë vitit 2025 janë miratuar edhe plane detale urbanistike për blloqet urbane 27, 24 dhe 25, ndërsa janë përfunduar edhe 50 procedura për plane detale urbanistike. Aktualisht, janë në zhvillim edhe 10 për ndryshim të planeve urbanistike me qëllim të përshtatjes së këtyre planeve me nevojat urbane të qytetarëve”, njoftoi udhëheqësi i Sektorit të Urbanizmit në Komunën e Gostivarit, Semir Zulbehari.

Në ndërkohë, në Komunën e Vrapçishtit,vitin 2025 e llogarisin si të suksesshëm në aspektin e dhënies së lejeve të ndërtimit. Kryetari i Komunës së Vrapçishtit, Isen Shabani, ka bërë të ditur se gjatë vitit të kaluar janë parashtruar 146 kërkesa për leje ndërtimi për objekte banimi, prej të cilëve 84 janë miratuar, ndërsa për objekte industriale janë dorëzuar 13 kërkesa dhe vetëm 9 janë pranuar.

“Në Komunën e Vrapçishtit kemi dy kategori të lejeve, pra kategoria A1 për objekte banimi dhe kategorinë G, që është për zonën industriale. Për vitin 2025 për objekte të kategorisë A1 kemi 146 kërkesa, për 84 është dhënë leje dhe punohet në terren, kurse 62 janë në procedurë për shkak të mungesës së dokumentacionit dhe besoj se kompanitë do t`i përfundojnë dokumentacionet, dhe do të fillojnë me punë. Në zonën industriale kemi 13 kërkesa, nëntë prej tyre janë kryer dhe katër janë në procedurë për t`ju dhënë leje ndërtimi”, deklaroi kryetari i Komunës së Vrapçishtit, Isen Shabani.

Edhe nga Komuna e Vrapçishtit edhe nga Komuna e Gostivarit presin që edhe gjatë këtij viti të ketë më shumë interesim për ndërtime, ndërsa premtojnë se procedurat do të kryhen në kohë dhe pa zvarritje, ndërsa apelojnë që palët që kërkojnë leje ndërtimi duhet që kur të parashtrojnë kërkesa për leje ndërtimi, të dorëzojnë dokumentacionin e kompletuar që më shpejt të jepet leja e ndërtimit. /Nistori/

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)