Lajme

Rruga “Liria” në Tetovë sërish do të bëhet “Marshall Tito” me vendim të Kushtetueses

Vendimi i Gjykatës Kushtetuese për të hapur procedurë për emrat e rrugëve në Tetovë, sipas historianit Muzafer Bislimi nuk është formal, por politik. Sipas Bislimit, rrugët asokohe janë emëruar me konsensus të partive shqiptare dhe maqedonase.

“Po të ishte atë vit ose vitin e ardhshëm do të ishte një gjë formale, mirëpo kjo punë të bëhet gati se 20 vite më vonë, thjeshtë mund ta konstatojmë si një provokim që bëhet ndaj shqiptarëve sepse sa e di unë ato rrugë janë emëruar dhe riemëruar me parimin e badinterit, me vendim të Këshillit të Komunës dhe nuk ka pasur asnjë kundër”, tha Muzafer Bislimi, Historian.

Çështja me emrat, Bislimi thotë se mund të nxitë tensione, ndërsa rikthen kujtesën në kohërat e errëta të shekullit të kaluar ku shqiptarët detyroheshin të përdorin toponime maqedonase.

“Të ngrihet një iniciativë e tillë, besoj se është një matje e pulsit të shqiptarëve dhe një tensionim edhe më tej të situatës e cila faktikisht, na përkujton kohën e para viteve 90 kur shqiptarët ishin të detyruar që toponimet dhe i kemi dëgjuar të gjithë lajmet e televizioneve shtetërore ku Shkupit, çdoherë i thoshin Skopje, ishte një kulminacion i mohimit të gjuhës shqipe”, u shpreh Muzafer Bislimi, Historian./Alsat

Lajme

Kasami për protestën: BDI “hedh gurin dhe fsheh dorën”

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në “TV Koha” duke komentuar protestën e së nesërmes në Tetovë thotë se BDI në një farë forme luan rolin e saj në stilin “hedh gurin dhe fsheh dorën”!

Sipas tij, bëhet fjalë për situatë absurd.

“BDI nuk deklarohen se qëndrojnë zyrtarisht pas protestës. Këshilltarët e BDI-së para një kohe kërkuan seancë të jashtëzakonshme të Këshillit komunal dhe kur morën informatë se kjo nuk është çështje e Këshillit komunal dhe në situatë kur Këshilli komunal mund të përsërisë gabimin që është bërë në 2007, me automatizëm Këshilli komunal shkon në zgjedhje në bazë të Ligjit dhe Kushtetutës dhe e heshtën atë çështje. Duke e ditur që faji më shumë është i atyre, sepse nuk kemi ne aspak faj si VLEN as në pushtetit qendror e as në atë lokal, ata po mundohen edhe një herë të ‘hedhin gurin dhe të fshehin dorën’. Konkretisht ata duhet të tregojnë se cili është faji i kësaj qeverise aktuale të komunës dhe kësaj qeverie aktuale në pushtetin qendror”, ka thënë Kasami.

Lajme

Kasami: Vendimi i Gjykatës Kushtetuese nuk do të ndryshojë asgjë

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha ka thënë se vendimi i Gjykatës Kushtetuese për emrat e rrugëve në Tetovë, nuk do të ndryshojë asgjë.

I pyetur se çfarë do të ndodhë me fatin e rrugës “Dervish Cara”, Sheshin “Iliria” dhe cili do të jetë epilogu, Kasami shprehet i prerë:

“Vendimi i Gjykatës Kushtetuese nuk do të ndryshojë asgjë. Komuna do të vazhdojë të përdorë emërtimet e vitit 2007 e këndej, institucionet do të vazhdojnë të përdorin emërtimet si gjithmonë, ndërkohë Komuna e Tetovës do të vazhdojë me procesin e emërtimit të rrugëve. Ky proces do të përfundojë konform Ligjit dhe Kushtetutës dhe nga ai moment edhe këta rrugë dhe shumë rrugë tjera do të kenë emërtime shqiptare”, ka thënë mes tjerash Kasami.

Lajme

Kasami: BDI dhe Gjykata Kushtetuese të sinkronizuar dakorduan vendimin

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha duke komentuar protestën e nesërme tha se qytetarët nuk do t`i përgjigjen pozitivisht protestës së BDI-së, duke pranuar se integristët megjithatë kishin harxhuar kohën e tij, siç tha ai, “për të trajtuar një problem inekzistent”.

Ai tha se le të tregojnë se cila është përgjegjësia e Tetovës, cila është përgjegjësia e kësaj qeverie që ne siç tha, “të dalim e t`u përgjigjemi”.

“E vetmja përgjegjësi këtu është e Gjykatës Kushtetuese dhe e BDI-së që në mënyrë të sinkronizuar dakordojnë një vendim për abrogim të këtij vendimi në momentin kur jemi në fazën finale të emërtimit të rrugëve konform Kushtetutës dhe Ligjit. Dhe një herë duhet të pyes publikisht BDI-në ‘A është edhe një tentim i BDI-së, për të ndalur procesin e emërtimit të rrugëve në Tetovë?”, ka thënë Kasami.