Lajme

Arbër Ademi akuzon opozitën shqiptare

Koordinatori i Grupit Parlamentar të BDI-së, Arbër Ademi e ka akuzuar opozitën shqiptare se me mos-votimin e Ligjit për Lojërat e fatit mbron interesat e VMRO-DPMNE-së. Në konferencë për mediat Ademi tha se për miratimin e këtij ligji është Lëvizja Anti-Bixhoz, ndërsa kundër ligjit janë vetëm Asociacioni i Kazinove dhe Bastoreve.

“Kush është kundër miratimit të këtij ligji. Është asociacioni i Kazinove dhe Bastoreve. Më thoni gjatë këtij mandati, përpos propozimit francez për të cilin janë organizuar protesta, për cilin ligj tjetër janë organizuar protesta. Janë organizuar protesta vetëm miratimit të këtij ligji për lojërat e këtij fati. Nga kush, nga mafia e kazinove dhe bastoreve. Në qoftë se shikojmë thellë dispozitat ligjore të këtij ligji, për amendamentet, më thoni ju si gazetarë, pse VMRO-DPMNE propozoi Amendament që distanca tëvogëlohjet nga 500 në 250 metra…. mua më vjen keq që e ashtuquajtura opozitë shqiptare është vendosur në shërbim të plotë të VMRO-DPMNBE-së dhe dalin këtu lexojnë kumtesa, konferenca të shtypit të cilat janë përgatitur kryekëput nga Qendra për komunikim e VMRO-DPMNE-së”, tha Arbër Ademi, koordinator i grupit parlamentar të BDI-së./tvklan.mk

Lajme

Rama për “La7”: Shqipëria e së ardhmes do të jetë si Italia

Kryeministri i vendit, Edi Rama ka dhënë mbrëmjen e djeshme një intervistë për “Piazza Pulita” në kanalin italian “La7”. Gjatë intervistës, kryeministri Rama ka thënë me bindje se Shqipëria e së ardhmes do të jetë si Italia.

“Kur më pyesin si do të jetë Shqipëria e së ardhmes, u them të shikojnë Italinë. Kjo është Shqipëria e së ardhmes”, u shpreh Rama.

Më tej, kryeministri nuk ka kursyer vlerësimet për homologen e tij italiane, Giorgia Melonin, për të cilën ka thënë se ka një marrëdhënie të mirë. Më tej, Rama ka shtuar se Meloni është një person shumë real dhe i drejtpërdrejtë.

“Kushdo që e njeh Giorgia Melonin nuk mund të mos ketë një marrëdhënie të mirë me të, ajo është një person shumë real dhe i drejtpërdrejtë”, tha Rama në “La7”.

Lajme

Kishte grabitur një barnatore, arrestohet 30-vjeçari nga Shkupi

MPB ka njoftuar se me datë19.09.2024, në orën 21:55, në territorin e komunës Aerodrom, zyrtarët policorë nga Njësia e Policisë Ndërhyrëse pranë SPB Shkup e arrestuan B.P. (30) nga Ilinden, Shkup. Ai dyshohet se rreth orës 21:30, në një farmaci në lagjen “Lisoçe e Re”, nën kërcënimin e një pistolete ndaj punonjësve, kishte marrë para nga qarkullimi ditor. Pistoleta u gjet dhe u konfiskua, ndërsa paratë u rikthyen pronarit.

Personi është ndaluar në stacionin policor dhe pas dokumentimit të plotë të rastit, kundër tij do të ngrihet një padi përkatëse.

Lajme

Cila kompani në Maqedoni vitin e kaluar ka dhënë 56.6 milionë euro vetëm për rroga?

ESM është prodhues shtetëror i energjisë elektrike dhe një nga kompanitë me numrin më të madh të të punësuarve në Maqedoninë e Veriut.

Vitin e kaluar kjo kompani ka paguar 56.56 milionë euro për paga të gati 4500 punëtorëve, ndërsa nga shitja e energjisë elektrike ka fituar 288 milionë euro, përcjell portali Faktor.

Kompania shtetërore e prodhimit të energjisë elektrike ESM (e njohur më parë si ELEM) ka paguar gjithsej 56.56 milionë euro vitin e kaluar për paga, sipas të dhënave zyrtare nga raporti i tyre financiar vjetor i përgatitur nga një auditim i pavarur.

Vitin e kaluar, ESM punësoi pothuajse 4,500 njerëz, shumica e tyre nga rajoni i Pellagonisë, përkatësisht komuna Manastir dhe Novaci, ku është vendosur kapaciteti më i madh prodhues i kompanisë – termocentrali REK Manastir dhe minierat e tij Suvodol dhe Brod-Gneotino. Përveç REK Manastir, kjo kompani ka edhe dy termocentrale të tjera. Njëra është në Osllomej të Kërçovës, ndërsa tjetra në Negotinë. ESM gjithashtu ka gjashtë hidrocentrale, një park me erë, një central të gazit dhe një drejtori në qendër të Shkupit.

Në të njëjtën kohë, grupi ESM operon një fabrikë për pjesë rezervë për nevojat e termocentraleve në Novaci, një prodhues i nxehtësisë në Shkup dhe Manastir dhe tre kompani turistike që menaxhojnë hotelet dhe objektet akomoduese të ESM.