Zyrtarët doganorë në Aeroportin Ndërkombëtar të Shkupit, gjatë kontrollit të një pasagjeri, shtetas i huaj, i cili po udhëtonte drejt Londrës, zbuluan 150 mijë paund britanikë të cilët nuk ishin deklaruar sipas detyrimeve ligjore.

Sipas Ligjit për Punë Devizore, pasagjerit i janë kthyer deviza në kundërvlerë prej 10 mijë eurosh, ndërsa pjesa tjetër prej 141,315 paund britanikë është mbajtur përkohësisht. Siç njofton Drejtoria e Doganave, ndaj personit është ngritur kallëzim përkatës për kundërvajtje.

Nga kjo drejtori theksojnë se zbatojnë vazhdimisht aktivitete që synojnë zbulimin dhe parandalimin e transferimit të paligjshëm ndërkufitar të parave të gatshme, duke kontribuar drejtpërdrejt në luftën kundër krimit financiar.

Një situatë dramatike është regjistruar gjatë orëve të fundit në pikat e karburantit në Maqedoninë e Veriut, ku radhët e gjata dhe nervozizmi i shoferëve kanë krijuar një atmosferë paniku. Shumë qytetarë raportojnë se në disa pika të caktuara nuk po lejohet furnizimi me dizel, ndërsa në të tjera po aplikohen kufizime jozyrtare të sasisë, përcjell INA.

“Në disa benzinata thjesht nuk të lënë të mbushësh naftë dhe më kthyen mbrapsht. Është një kaos i vërtetë sepse askush nuk jep informacion zyrtar, ndërkohë që njerëzit kanë filluar të frikësohen se do mbeten pa karburant,” deklaron i revoltuar një shofer nga Shkupi.

Nga ana tjetër, Qeveria ka dalë me një njoftim urgjent për të qetësuar situatën. Kryeministri Hristijan Mickoski, pas takimeve me përfaqësuesit e industrisë së naftës, ka deklaruar se gjendja është plotësisht nën kontroll dhe se ka rezerva të mjaftueshme për të mbuluar të gjitha nevojat e vendit. Sipas autoriteteve, nuk ka vend për panik pasi furnizimi vazhdon rregullisht.

Kjo valë shqetësimi vjen në një kohë kur çmimet e naftës në tregjet botërore kanë shënuar rritje si pasojë e tensioneve në Lindjen e Mesme, çka ka shtuar dyshimet te qytetarët për një shtrenjtim të mundshëm ose bllokim të derivateve në ditët në vijim.(INA)

Ministri i Ekonomisë dhe Punës, Besart Durmishi, sonte në emisionin “Biznis21” në TV21 deklaroi se çështja e pagës minimale është shndërruar në një arenë politike ditore dhe se çdo rritje eventuale duhet të ketë arsyetim ekonomik.

“Më vjen keq që një temë kaq serioze si paga minimale është bërë arenë e politikës ditore. Ne kemi rreth 30 mijë persona që marrin pagë minimale, nga gjithsej 750 mijë sa kemi në nivel shteti. Nga këta 30 mijë persona, gjysma prej tyre janë njerëz që kanë hapur vetë biznese, përkatësisht kompani si tregtarë individualë dhe kanë edhe të ardhura të tjera”, tha Durmishi.

Ai shtoi se si qeveri gjithmonë janë të qëndrimit se pagat duhet të rriten, por se duhet të merren parasysh edhe parametra të tjerë ekonomikë.

“Sinqerisht, asnjëherë nuk kemi thënë se rritja është e mjaftueshme. Gjithmonë jemi të qëndrimit se pagat duhet të rriten, por duhet të ketë bazë ekonomike. Duhet të shohim edhe produktivitetin dhe të mos shkaktojmë probleme të tjera. Nëse shkojmë me zgjidhje ad-hoc dhe me përmbushjen e kërkesave populiste të opozitës, nëse reagojmë në këtë mënyrë pa arsyetim ekonomik, mund të shkaktojmë inflacion. Ndërkohë, kompanitë me numër më të vogël të të punësuarve mund të përballen me implikime financiare dhe të detyrohen të ndërmarrin hapa për të larguar punonjës”, deklaroi Durmishi.