Lajme

Detaje shokuese për arratisjen e Gruevskit, nuk iku nga Shkupi, por nga një hotel në Ohër

Detaje të reja janë publikuar lidhur me arratisjen e ish-kryeministrit Nikola Gruevski drejt Hungarisë në nëntor të vitit 2018.

Në një emision në Kanal5, Aleksandar Malenko ka deklaruar se Gruevski nuk u largua nga shtëpia e tij në Shkup, siç është besuar deri më tani, por nga hoteli “Royal View” në Ohër, i vendosur në bregun e Liqenit të Ohrit, përcjell INA.

Sipas Malenkos, arratisja ka ndodhur më 10 nëntor 2018, rreth orës 02:40 pas mesnate. Ai pretendon se personalisht ka hapur garazhin e hotelit për largimin e Gruevskit, i cili është nisur me një veturë “Passat”, të drejtuar nga shoferi i tij, ndërsa në automjet ndodheshin edhe pjesëtarë të sigurimit personal.

Familja e Gruevskit – bashkëshortja dhe vajzat – sipas tij, kanë mbetur në hotel dhe kanë vazhduar qëndrimin e planifikuar.

Malenko pohon se Gruevski kishte mbërritur në Ohër tre ditë më herët, më 7 nëntor 2018 në mbrëmje, me dy automjete: një automjet të MPB-së nga Drejtoria e Gjashtë për sigurim dhe përcjellje, si dhe veturën e tij private me shofer dhe sigurim.

Ai thotë se familja Gruevski ishte pritur në garazhin e hotelit dhe se qëndrimi ishte paralajmëruar sipas protokolleve të MPB-së si vizitë e mysafirëve VIP, pa u bërë i ditur identiteti i tyre, në përputhje me procedurat standarde të sigurisë.

Më vonë, Gruevski arriti në Budapest të Hungarisë në rrethana që vazhdojnë të mbeten të paqarta, pasi paraprakisht kishte kaluar përmes Shqipërisë, Malit të Zi dhe Serbisë.

Për arratisjen e tij në Maqedoninë e Veriut u hap hetim, por deri më sot askush nuk ka mbajtur përgjegjësi.(INA)

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.