Lajme

A mund të qeverisë LVV e vetme? Tre skenarët e mundshëm për qeverinë e re

Lëvizja Vetëvendosje del e para në zgjedhje, por mbetet nën shumicën prej 61 mandatesh, duke e bërë të domosdoshëm koalicionin për formimin e qeverisë së re.

Zgjedhjet e 7 qershorit prodhuan një diferencë mes partisë së parë dhe të tjerave pas saj, por jo vendimtar sepse në fund qeverinë nuk e formon diferenca në vota, por vendimmarrja në kuvend.

Bazuar në rezultatet preliminare të Komisionit Qendror të Zgjedhjeve, Lëvizja Vetëvendosje prin me 42,91% të votave, e pasuar nga PDK-ja me 21,12%, LDK-ja me 17,58% dhe AAK-ja me 7,15%.

Rezultatet bazohen në numërimin preliminar të të gjitha votave brenda vendit, ndërsa gjatë ditëve të ardhshme pritet numërimi i votave me kusht dhe atyre me postë, të cilat mund të ndryshojnë përqindjen e partive por jo renditjen.

Sipas një projeksioni të publikuara të dielën në platformën X nga analisti politik Blerim Vela, projeksioni final – duke përfshirë edhe votat me postë të diasporës – Lëvizja Vetëvendosje mund të arrijë 46% të votave apo 51 mandate në kuvendin e ri.

Përllogaritjet, të cilat bazohen në ndarjen e parashikuar të votave të diasporës 60-40 në favor të LVV-së, parashohin që partitë e opozitës të sigurojnë në plotni 49 ulëse në legjislaturën e re.

A mund të qeverisë e vetme Lëvizja Vetëvendosje apo kërkohen koalicione?

Me 51 mandate të projektuara në kuvendin e ri, partia e kryeministrit në detyrë Albin Kurti mbetet pak nën shumicën absolute prej 61 votave, të mjaftueshme për të qeverisur e vetme.

Për rrjedhojë, qeveria e vetme e Kurtit nuk është e mundshme pa partnerë. Por, ekzistojnë disa skenarë.

Në “Skenarin A”, Vetëvendosje mund të formojë shumicën e mjaftueshme për formimin e qeverisë (61 deputetë) përmes një koalicioni me pakicat joserbe dhe Partinë për Liri, Drejtësi dhe Mbijetesë të komunitetit serb, e cila drejtohet nga ministri në detyrë Nenad Rashiq.

51 mandatet e Lëvizjes Vetëvendosje dhe 11 pakica joserbe me PLDM-në e Rashiqit arrijnë në 62 vota të mjaftueshme për qeverinë e re.

Llogaritjet mund të ndërlikohen nga dy lojtarë politike me të cilët Vetëvendosje nuk ka gjetur gjuhë të bashkëpunimit në dy vitet e fundit: Duda Balje dhe Adem Hodza. Të dy përfaqësues të komuniteteve joshumicë kanë siguruar nga një mandat në kuvendin e ri.

Pa dy votat eventuale të Baljes dhe Hodzës, numrat për qeverinë e re nuk do të mjaftonin.

“Skenari B” përfshin Lëvizjen Vetëvendosje në koalicion me një nga partitë e tjera të opozitës: PDK-në, LDK-në ose AAK-në. Ky konsiderohet edhe skenari më i mundshëm, duke marrë parasysh edhe çështjen e zgjedhjes së presidentit, e cila mbetet një nga sfidat kryesore përpara subjekteve politike parlamentare.

Për zgjedhjen e presidentit kërkohet një shumicë prej dy të tretash të deputetëve, çka do të mund të arrihej vetëm përmes një marrëveshjeje të gjerë politike mes Vetëvendosjes, partive kryesore të opozitës dhe deputetëve nga komunitetet joserbe.

Ndërkohë, “Skenari C” e përjashton Lëvizjen Vetëvendosje nga kalkulimet për formimin e qeverisë së re. Sipas këtij skenari, opozita e bashkuar, së bashku me komunitetet joshumicë përfshirë Listën Serbe – e cila, bazuar në rezultatet aktuale, ka nëntë mandate – mund të sigurojë shumicën për formimin e qeverisë, por pa numrat e nevojshëm për zgjedhjen e presidentit. /Paparaci.com

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.