Lajme

Hiqen kioskët, por jo pengesat: Kaosi për këmbësorët vazhdon në Bit Pazar

Dy kioskë u larguan nga BitPazari me qëllim lirimin e hapësirave publike, por në betonin që mbeti, shitësit ambulantë të frutave dhe perimeve kanë vendosur tezgat e tyre. Për shkak të mos largimit të betonit dhe lirimit të plotë të trotuarit, qarkullimi për këmbësorët vazhdon të mbetët i vështirë.

Nga ana tjetër mbikalimi vazhdon të mos jetë funksional ndërsa qytetarët nuk kanë alternativë tjetër përveç se të kalojnë në rrezik vendkalimin ilegal për të cilin akoma nuk ka një zgjidhje.

“Duhet të zgjidhet problemi sepse ura është aty por nuk shfrytëzohet e këtu është shumë rrezik por edhe bëjmë rrëmujë me veturat e ndaluara. Të lirohet ura do ishte më mirë, tha një qytetar.

“Kështu është rrezik por kalojmë çfarë të bëjmë. ”Unë mendoj se duhet të ketë semaforë këtu, tha një qytetar.

Edhe pse qytetarët kërkojnë një zgjidhje sa më të shpejtë për shkak të rrezikut të këmbësorëve, nga Qyteti i Shkupit thonë se ende po kërkojnë një zgjidhje ideale për këtë vendkalim të rrezikshëm.

“Qyteti i Shkupit është plotësisht i informuar për gjendjen në lokacionin pranë Bit Pazarit dhe për faktin se një pjesë e qytetarëve vazhdojnë të përdorin kalimin e paligjshëm për këmbësorë, duke krijuar kështu një rrezik serioz për sigurinë. Në kuadër të kompetencave të tij, Qyteti po ndërmerr aktivitete për të gjetur një zgjidhje të përhershme dhe të qëndrueshme, e cila do të mundësojë lëvizje të sigurt për këmbësorët dhe do të parandalojë përdorimin e mëtejshëm të kalimit të paligjshëm, në përputhje me legjislacionin e trafikut dhe në interes të të gjithë qytetarëve. Sa i përket bazës prej betoni që mbeti pas largimit të kioskës, heqja e saj është paraparë në kuadër të rregullimit të hapësirës dhe do të realizohet sipas dinamikës së përcaktuar nga shërbimet kompetente të Qytetit,” thanë nga Qyteti i Shkupit.

Edhe nga Komuna e Çairit thonë të njëjtën se ende po kërkohet një zgjidhje të duhur për këtë vendkalim.

“Rruga në këtë lokacion është nën kompetencë të Qytetit të Shkupit, ndërsa mbikalimi nuk është funksional. Komuna e Çairit në koordinim me Qytetin e Shkupit dhe institucionet kompetente po punojnë për gjetjen e zgjidhjes më të përshtatshme dhe më të sigurt për qytetarët. Në kuadër të këtyre analizave po shqyrtohet alternativa përfshirë edhe mënyrën e kalimit të këmbësorëve me qellim rritjen e sigurisë në këtë lokacion,” thanë nga Komuna e Çairit.

Deri tani në vendkalimin ilegal në BitPazar të Shkupit dhjetëra qytetarë kanë pësuar lëndime si shkak i aksidenteve ndërsa disa raste kanë përfunduar edhe me fatalitet. Në rastin e fundit të një aksidenti të disa javëve më parë një grua dhe një burrë përfunduan me lëndime në spital në tentativë për të kaluar këtë vendkalim ilegal. Opsioni i fundit që ka qarkulluar sipas autoriteteve është largimi i urës së Bit Pazarit dhe legalizimi i vendkalimit./Alsat.mk

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)