Lajme

Bekim Neziri lirohet nga burgu shtëpiak, i merret pasaporta, reagon VMRO

Kjo është edhe një reformë tjetër e Frontit evropian. Kështu u shpreh kryetari i VMRO-S Hristijan Mickoski për vendimin e Gjykatës së Apelit, me të cilin i akuzuari për sulmin në M-NAV Bekim Neziri, lirohet nga burgu shtëpiak. Mickoski u bënë me dije se ata siç shprehet do të pastrojnë mafian e cila e ka robëruar Maqedoninë.

Hristijan Mickoski, kryetar i VMRO-DPMNE-së

“Këto janë ato reforma që po i ofron fronti evropian. Me grushta sulmojnë objekte strategjike, e rrezikojnë trafikun ajror, e rrezikojnë sigurinë ajrore dhe të avionëve aleatë. Të njejtit ata do t’i shihni teksa shetisin lirshëm rrugëve, sepse prokurorët dhe gjykatët i kanë të atyre”.

Të premten, Gjykata e Apelit, e liroi Bekim Nezirin, nga arresti shtëpiak dhe e zëvendësoi me masën për marrjen e pasaportës. Vendimi i Apelit vjen pasi gjykata e parë nuk pranoi kërkesën e prokurorisë për caktimin e masës së paraburgimit për Nezirin dhe një tjetër person të dyshuar. Prokuroria e lartë mbështeti qëndrimin për lirimin e Nezirit, duke argumentuar mungesën e provave të mjaftueshme për të mbështetur akuzat kundër tij dhe të tjerëve të dyshuarve. Përveç Nezirit, edhe Almir Ramdedoviq, është liruar nga arresti shtëpiak, me gjykatën që nuk ka gjetur arsye për caktimin e masës së paraburgimit. Për të dyshuarit e tjerë, gjykata ka caktuar arrest shtëpiak deri në vendosjen e masave të mëtejshme. Më 4 janar, disa persona kishin hyrë në objektin e kontrollimit të fluturimeve dhe kishin sulmuar të punësuarit në kontrollin e fluturimeve. Sipas kreut të Sindikatës së Kontrollorëve, gjatë kohës së sulmit, mbi 36 avionë kanë qenë duke fluturuar në hapësirën ajrore të Maqedonisë së Veriut.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.