Lajme

VLEN: Dimitrievski të mos ia bëjë qejfin BDI-së

Pasi kryetari i ZNAM, Maksim Dimitireski tha për VLEN-in që “ta korrigjojnë veten, mos ta emitojnë BDI-në”, ka reaguar VLEN. Këta të fundit thonë se nuk është e patjetërsueshme që partnerët qeverisës të pajtohen për të gjitha dhe se secili ka të drejtë të ndërtojë identitetin e tij bazuar në bindjet që ka.

VLEN i bënë thirrje ZNAM që siç thotë, të mos i bëjë pa vetëdije qefin BDI-së ndërkohë që tha se udhëheqja e tyre kriminale dëshiron tensione në të gjitha fushatë”.

“Çdo subjekt politik ka të drejtën demokratike për të ndërtuar identitetin e tij bazuar në bindjet e veta. Nuk është e nevojshme të pajtohemi për të gjitha çështjet, por duhet të respektojmë njëri-tjetrin duke pasur parasysh faktin se jemi pjesë e një Qeverie të përbashkët, pasi kjo është në interes të të gjithë qytetarëve, pavarësisht përkatësisë etnike, fetare apo politike. Si Qeveri, kemi prioritete programore të përcaktuara dhe të harmonizuara dhe detyra jonë është të punojmë me përkushtim për realizimin e tyre. Në këtë kontekst, i bëjmë thirrje ZNAM-it që të mos i bëjë pa vetëdije qefin BDI-së”.

“Udhëheqja e tyre kriminale dëshiron tensione në të gjitha fushat. Për t'i shpëtuar përgjegjësisë penale për korrupsionin e kryer politik dhe për të ruajtur pasurinë e fituar në mënyrë të paligjshme, ata ëndërrojnë edhe për tërmete Brenda koalicionit qeveritar”.

“VLEN fitoi 107 mijë vota shqiptare dhe nuk mund të tjetërsohet etnikisht vetëm për ta bërë lëvizjen ZNAM të ndihet rehat në Qeveri. Sidomos duke marrë parasysh se Dimitrievski është zgjedhur kryetar i komunës së Kumanovës edhe me vota shqiptare dhe e di shumë mirë rëndësinë e mirëkuptimit dhe respektit të ndërsjellë. Nuk duam të besojmë se ZNAM dëshiron të hyjë në një fushatë për zgjedhjet lokale duke përsëritur kredon e gabuar të Tito Petkovskit nga zgjedhjet presidenciale të vitit 1999 – nuk na duhen votat e shqiptarëve. Shumica parlamentare përbëhet nga dy koalicione dhe një lëvizje si ZNAM. Teza se ata janë vetëm partnerë të VMRO-DPMNE-së është populizëm naiv me jetë të shkurtër”, thonë nga VLEN.

“VLEN është krijuar si një reflektim i nevojës së shumicës së shqiptarëve që kërkonin një opsion krejtësisht të kundërt nga BDI-ja. VLEN do të vazhdojë të ndërtojë një doktrinë autentike politike, të cilën do ta zbatojë përmes një strukture të re dhe moderne koalicioni, detyra e së cilës është zgjidhja e problemeve të qytetarëve dhe sigurimi i një të ardhmeje të sigurt për shqiptarët. Koalicioni VLEN është sinqerisht dhe ndershmërisht i përkushtuar ndaj decentralizimit, përshpejtimit të perspektivave të BE-së dhe vazhdimit të punës së tij për të luftuar krimin dhe korrupsionin”, thuhet në kumtesën e VLEN.

Lajme

Burri dhe gruaja dogjën vilën duke përgaditur hajvarin

Burri dhe gruaja shkaktuan zjarr në fshatin Gorno Sonje ndërsa po bënin ajvar, pasi hirit nga soba me thëngjill e derdhën pranë shtëpisë. Policia intervenoi dhe zjarri u shua pa të lënduar.

Sipas informacioneve të MPB-së, dje rreth orës 19:50 në polici u raportua se në fshatin Gorno Sonje, pranë Shkupit, kishte filluar zjarr, ku ishte djegur një vilë dhe bari.

“Policët e SPB Shkup dolën në vendngjarje dhe biseduan me D.M. (74), pronarin e vilës, i cili shpjegoi se me bashkëshorten po bënin dimërishte dhe pranë shtëpisë kishin derdhur hirin nga soba, në të cilën ka të ngjarë të kishte thëngjill, dhe ishin larguar, pas së cilës kishte filluar zjarri», thonë nga MBP-ja.

Nuk pati të lënduar, ndërsa ekipi i Brigadës së Mbrojtjes nga Zjarri Shkup e shoi zjarrrin.

Lajme

VLEN merr dy poste të tjera të zëvendësministrave: Priten rokada në eshallonin e dytë qeveritar

Koalicioni VLEN pritet të marrë pozicionet e zëvendësministrave në dikasteret e Shëndetësisë dhe të Politikës Sociale, pas bisedimeve dhe marrëveshjes së arritur me kryeministrin Hristijan Mickoski.

Burime nga koalicioni konfirmojnë se propozimet konkrete me emrat e kandidatëve i janë dorëzuar tashmë kryeministrit për konfirmim përfundimtar, përcjell INA.

Ndryshimet në eshallonin e dytë vijnë si rrjedhojë e riorganizimit të kabinetit qeveritar në korrik, gjatë të cilit VLEN mbeti pa drejtimin e këtyre dy ministrive. Argumenti kryesor i koalicionit është ruajtja e balancit politik brenda partnerëve të pushtetit.

Për të marrë këto dy poste pa ndryshuar peshën e përgjithshme në qeveri, VLEN do të duhet të heqë dorë nga dy pozita të tjera zëvendësministrash.

Është pothuajse e sigurt se koalicioni do të lirojë postin e zëvendësministrit në Bujqësi (ku ministri është nga lëvizja ZNAM), vend i cili pritet t’i kalojë VMRO-DPMNE-së.

Po ashtu do lirohet edhe posti i zëvendësministrit të Kulturës, që pritet t’i takojë VMRO-DPMNE-së ose lëvizjes ZNAM, pasi ministri aktual i Kulturës është nga radhët e VLEN-it.

Kjo parti gjithashtu pret të marrë edhe një tjetër post zëvendësministri, përveç atyre që ka në Energjetikë dhe Transformim Digjital.
Kryeministri Mickoski ka paralajmëruar se kompletimi dhe rokadat në eshallonin e dytë qeveritar do të përmbyllen brenda gjysmës së dytë të tetorit.(INA)

Lajme

Qytetarët ofrojnë garancion për Artan Grubin!

Vazhdon seria e deklaratave publike në mbështetje të Artan Grubit. Pas reagimeve të Asllan Kokës dhe Uka Shaqirit, edhe Blero Arifi nga Velesi ka bërë të ditur se është i gatshëm të vendosë në dispozicion të gjithë pasurinë e tij si garanci për lirimin e Grubit informon Tetovasot.

Përmes një postimi në rrjetet sociale, Arifi ka shkruar se, me mirëkuptimin e familjes, është i gatshëm të vendosë në garanci edhe pasurinë e saj.

“Edhe unë jam gati të vë në garanci gjithçka që kam — pasurinë time dhe, me mirëkuptimin e familjes, edhe pasurinë e saj për lirimin e Artan Grubit,” ka shkruar Blero Arifi.

Ai ka sqaruar se këtë qëndrim e merr për shkak të bindjes së tij personale.

“E bëj këtë sepse besoj në pafajësinë e tij dhe besoj se ndaj tij po zhvillohet një përndjekje politike,” është shprehur Arifi.

Në fund të postimit, ai shton se bindjet duhet të mbështeten me veprime.

“Kur beson te drejtësia, nuk mjafton vetëm të flasësh. Duhet të jesh i gatshëm të qëndrosh pas bindjes tënde edhe kur kjo të kushton,” ka përfunduar ai.

Deklarata e Blero Arifit vjen pas disa reagimeve të ngjashme të mbështetësve të Artan Grubit, të cilët ditët e fundit kanë shprehur publikisht gatishmërinë për të ofruar pasurinë e tyre si garanci.

Ndërsa, tetovari Asllan Koka ka bërë një deklaratë publike, duke shprehur gatishmërinë që pasurinë e tij të paluajtshme ta vendosë si garanci pasurore për ish-zëvendëskryeministrin Artan Grubi.

Përmes një postimi në rrjetet sociale, Koka ka shkruar se është i gatshëm ta japë shtëpinë e tij si garanci me qëllim që Grubit t’i kthehet pasaporta.

“Edhe pasuria e paluajtshme e ime është në dispozicion të Artan Grubit për t’u vendosur si garanci pasurore, me qëllim që t’i kthehet pasaporta,” ka shkruar Asllan Koka.(INA)