Lajme

SPB Tetovë i shpallë luftë krimit brenda policisë

Kryeshefi i Sektorit për Punë të Brendshme (SPB) të Tetovës, Riad Aliu i shpall luftë krimit brenda policisë. Për dhjetë ditë, përveç arrestimeve të tjera, nën pranga kanë rënë një polic aktiv i SPB-së i angazhuar në policinë e Rostushës, i dyshuar për përfshirje në trafik droge, si dhe një ish pjesëtar i policisë së Tetovës, tani me punë në drejtorinë e gjashtë, e që ka qenë i përfshirë në prodhim dhe tregtim me armë. Përskaj këtyre dy arrestimeve, policia e Tetovës ka vënë nën pranga edhe gjashtë persona të përfshirë në trafik droge, të cilët janë kapur brenda javës.

Zëdhënësi i SPB-së së Tetovës Fatmir Rexhepi tha se policia e Tetovës do ta luftojë krimin pa marrë parasysh se në cilët rrugë apo institucione kryhet i njëjti.

“Gatë javës së kaluar SPB Tetovë ka realizuar dy aksione të suksesshme, në njërin prej të cilëve janë privuar nga liria gjashtë persona që kanë qenë të involvuar në tregti të paligjshme me substanca narkotike dhe të njëjtët janë mbajtur në SPB Tetovë, dhe të njëjtive iu caktuar masa e paraburgimit prej 30 ditësh. Po ashtu gjatë të premtes gjatë një bastisjeje në fshatin Neproshten të Tetovës, është konstatuar se një person ka qenë i involvuar në trafik armësh dhe tek i njëjti janë gjetur dhe konfiskuar shumë fishekë dhe projektil të kalibrave të ndryshëm, armë pa leje dhe thërmues. I njëjti është arrestuar dhe është m,bajtur në stacionin e Tetovës dhe me daljen para gjykatësit hetues i njëjti ka marrë masë paraburgimi prej 30 ditësh”, deklaroi Fatmir Rexhepi. Zëdhënës i SPB Tetovë.

Sipas Prokurorisë Publike, personi i arrestuar ditë më parë, e që ka qenë i përfshirë në trafik armësh, ka qenë i angazhuar si operues i lartë në Ministrinë e Punëve të brendshme.

“I dyshuari 51 vjeç nga fshati Neproshten i Tetovës, i punësuar si operues i lartë në MPB, në shtëpinë e tij dhe në një shtëpi tjetër në pronësi të tij, pa leje ka mbajtur armë zjarri, municion dhe material shpërthyes që për qytetarët janë të ndaluara. Gjatë kontrollit, tek i njëjti janë gjetur e konfiskuar, një pushkë e tipit karabinë, 14 plumba për të njëjtën, thërmuese, dy shenja optike, sasi më e madhe e plumbave të kalibrave të ndryshëm, një qese barot, një shok bombë. Dy pushka ajrore “gamo” me nihan të instaluar, pistoletë Glock 9 mm, me dy karikator më nga dhjetë plumba dhe gjësende të tjera të ndaluara që i ka poseduar pa leje përkatëse”, njoftojnë nga Prokuroria Publike.

Nga SPB e Tetovës, për Alsat janë shprehur se, lufta ndaj krimit do të vazhdoj madje edhe ndaj personave të punësuar në polici. /Alsat.mk

Lajme

Pamje të rënda: Biznesmeni amerikan vritet pas shpine, autori arratiset me biçikletë

Oficerët e policisë së qytetit të New York-ut po përdorin teknologjinë e fundit për të identifikuar nëpërmjet kamerave identitetin e personit që vrau shefin ekzekutiv të United Healthcare, Brian Thompson të mërkurën në mëngjes.

Të shtënat ndodhën jashtë hotelit Hilton në Midtown Manhattan në Times Square, ndërsa Thompson ishte planifikuar të fliste në një konferencë. Sipas policisë, i dyshuari mbante një maskë të zezë për fytyrën dhe dukej se po priste Thompson jashtë hotelit Hilton ku pritej të fliste. Brian Thompson sapo mbërriti në hotel u qëllua në shpinë e në këmbë, dhe ndërroi jetë më vonë në spital.

Vrasësi u largua nga vendi i ngjarjes pa marrë asnjë nga sendet e Thompson. Policia beson se ai kishte planifikuar paraprakisht vrasjen. Video tregon atë duke ikur në këmbë nga vendi i ngjarjes dhe u pa për herë të fundit në Central Park me një biçikletë elektrike. Policia zbuloi se i dyshuari ishte fotografuar më herët në një Starbucks para të shtënave.

Hetuesit deri më tani nuk kanë identifikuar një motiv për vrasjen. Bashkëshortja e Thompson tha se kishte pasur disa kërcënime kundër tij më herët, megjithëse ajo nuk dha detaje. Një atentat ndaj drejtuesit te kompanisë së sigurimeve kishte ndodhur edhe më parë, në qytetin e lindjes së Thompson, Maple Grove, Minnesota në vitin 2018.

Lajme

Sot është dita botërore e kafes turke

Sot është dita botërore e kafesë turke, e cila është një nga elementët e pazëvendësueshëm të trashëgimisë kulturore të kuzhinës tradicionale turke.

Kultura dhe tradita e përgatitjes dhe konsumimit të kafesë turke u përfshi në Listën Përfaqësuese të UNESCO-s të Trashëgimisë Kulturore Jomateriale të Njerëzimit në vitin 2013 dhe 5 dhjetori u shpall “Dita Botërore e Kafes Turke”.

Kafeja turke bëhet nga kokrrat e kafesë me cilësi të lartë me origjinë nga Brazili dhe Amerika Qendrore, në shumicën e rasteve të pjekura ngadalë dhe më pas të bluara shumë shumë imët.

Besohet se kjo lloj pije është ndër llojet më të konsumuara të kafesë në botë, së bashku me ekspresin.

Pija shërbehet në gota të vogla së bashku me një gotë ujë. Vetë tradita është një simbol i mikpritjes, miqësisë dhe argëtimit që përshkon të gjitha sferat e jetës. Kafja turke luan një rol të rëndësishëm edhe në raste të ndryshme si fejesa dhe të gjitha llojet e festave. Sedimenti i mbetur në filxhanin bosh përdoret shpesh për të parashikuar fatin e një personi.

Kafeja turke besohet se është futur në Stamboll nga Jemeni në vitin 1543 nga Özdemir Pasha, i cili ishte vali i Jemenit.

Në një kohë shumë të shkurtër, falë tregtarëve, udhëtarëve dhe diplomatëve që vizituan Stambollin, kafeja turke u përhap fillimisht në Evropë dhe më pas në të gjithë botën.

Sipas të dhënave të Universitetit Aydan në Stamboll, vitet e fundit ka pasur një rritje të konsiderueshme të konsumit të kafesë turke në Turqi. Ndërsa në vitin 2011 konsumi mesatar vjetor i kafesë për person në vend ishte 350 gramë, në vitin 2021 konsumi u trefishua në 1.1 kilogramë për person.

Lajme

Ka reshje të dobëta të borës në Kodër të Diellit, Strazhë dhe Mavrovë!

Borë e dobët bie në Kodrën e Diellit dhe në Strazhë dhe Mavrovë, ndërsa është ulur dukshmëria për shkak të mjegullës deri në 50 metra në Pletvar, informojnë nga Lidhja Auto Moto e Maqedonisë.

Komunikacioni në rrugët shtetërore po zhvillohet në kushte dimërore, vende-vende nëpër rrugë kryesisht të lagështa. Intensiteti i komunikacionit në akset rrugore jashtë mjediseve urbane është mesatar.

Në vendkalimet kufitare nga ana e Maqedonisë nuk ka vonesa të gjata për hyrje dhe dalje nga shteti.

Nga LAMM u rekomandojnë shoferëve shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut. Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.