Lajme

Microsoft largon 9,000 punonjës

Microsoft, gjiganti i teknologjisë me seli në SHBA, ka bërë të ditur se do të pushojë nga puna 9 mijë punonjës, respektivisht rreth 4 për qind të fuqisë punëtore globale në ekipe, rajone dhe nivele të ndryshme përvoje, transmeton Anadolu.

Ky raund i pushimeve nga puna është i katërti për këtë vit, pasi kompania shkurtoi rreth 1 për qind të fuqisë punëtore në muajin janar, mbi 6 mijë punonjës në muajin maj dhe 300 punonjës në muajin qershor. Në vitin 2023, Microsoft gjithashtu shkurtoi 10 mijë vende pune.

Sipas të dhënave deri në muajin qershor të vitit 2024, kompania punësonte 228 mijë punonjës.

Pas blerjes së sektorit të pajisjeve dhe shërbimeve të Nokia-s në vitin 2014, Microsoft pushoi nga puna 18 mijë punonjës, ndoshta shkarkimi më i madh në historinë e korporatës.

Sipas CNBC-së, Microsoft dëshiron të zvogëlojë numrin e niveleve të menaxherëve që ndajnë drejtuesit e lartë nga kontribuesit individual, ashtu siç bëri me pushimet nga puna në muajin maj.

“Për t’i pozicionuar ‘Lojërat’ për një sukses të qëndrueshëm dhe për të na lejuar të përqendrohemi në fushat e rritjes strategjike, ne do të ndërpresim ose zvogëlojmë punën në fusha të caktuara të biznesit dhe do të ndjekim shembullin e Microsoft në heqjen e shtresave të menaxhimit për të rritur shkathtësinë dhe efektivitetin”, shkroi Phil Spencer, shefi ekzekutiv i lojërave në Microsoft, në një regjistrim për punonjësit në atë sektor.

Microsoft raportoi gati 26 miliardë dollarë të ardhura neto nga 70 miliardë dollarë të ardhura në tremujorin e fundit, mbi pritjet e tregut.

Kompania qëndron si firma e dytë më e vlefshme në botë me një kapital tregu prej 3.66 trilionë dollarësh, duke humbur së fundmi vendin e parë ndaj kompanisë Nvidia.

Aksionet e kompanisë u rritën me 0,11 për qind deri në orën 15:10 GMT, duke arritur në 492.59 dollarë.

Lajme

NPK Tetovë në aksion për pastrimin e lumit Shkumbin, në terren edhe kryetari Kasami dhe drejtori Bislimi

NPK Tetovë në aksion për pastrimin e lumit Shkumbin, në terren edhe kryetari Kasami dhe drejtori Bislimi

NPK Tetovë ka zhvilluar aksion për pastrimin e mbeturinave në lumin Shkumbin, kositjen e kullosës dhe mirëmbajtjen e hapësirave përreth lumit.

Në terren ishte edhe drejtori i NPK Tetovë, dr. Samet Bislimi, ndërsa ekipit iu bashkua edhe Kryetari i Komunës së Tetovës, z. Bilall Kasami.

Aksioni është pjesë e punës së vazhdueshme të NPK-së për mirëmbajtjen e hapësirave publike dhe një mjedis më të pastër në qytet.

Bashkë për një Tetovë më të pastër dhe më të mirë! 🌿

https://www.facebook.com/share/r/1EWC6nXwCL/?mibextid=wwXIfr

Lajme

‘Fluturoi’ 119 km/h në zonën 50 km/h, arrestohet 23-vjeçari në Tetovë

Një 23-vjeçar nga fshati Gjermë është arrestuar në Tetovë pasi është kapur duke drejtuar automjetin me shpejtësi prej 119 km/h, në një pjesë të bulevardit „Vidoje Smilevski Bato“ ku kufizimi është 50 km/h.

Policia e ka ndaluar E.A. më 18 shtator në ora 06:14.

Me udhëzim të prokurorit publik, ai është privuar nga liria nën dyshimin për veprën penale „ngasje e pakujdesshme e mjetit motorik“, sipas nenit 297-a të Kodit Penal.

Pas dokumentimit të rastit, ndaj tij do të vijojë parashtresa përkatëse.

Lajme

“Interex” mori dritën jeshile për të blerë “Tinex”, përfshirë “SuperTinex”, “Tinex Delikates”, “Konto” dhe “Spot”

Komisioni për Mbrojtjen e Konkurrencës ka dhënë dritën jeshile për përqendrimin përmes të cilit kompania kosovare “Proeks Internacional” synon të marrë kontrollin mbi “Tinex Market” SHPK Shkup, thuhet në vendimin e miratuar nga anëtarët e Komisionit.

Nga vendimi bëhet e ditur edhe struktura e transaksionit të planifikuar. Më 2 korrik të këtij viti është nënshkruar një letër qëllimi ndërmjet “Tinex-MT”, si shitës, dhe “Proeks Internacional”, si blerës, përmes së cilës palët janë dakorduar për kushtet kryesore komerciale për marrjen e biznesit të shitjes me pakicë të supermarketeve të “Tinex” në Maqedoni.

Në dokument specifikohet se transaksioni përfshin biznesin që operon, ndër të tjera, me emrat “Tinex”, “SuperTinex”, “Tinex Delikates”, “Konto” dhe “Spot”.

Pas nënshkrimit të letrës së qëllimit, më 14 korrik 2026, “Tinex-MT” ka regjistruar shoqërinë e re “Tinex Market” SHPK Shkup, e cila, sipas vendimit, është krijuar për të shërbyer si mjet për marrjen në kontroll dhe vazhdimin e operimit të këtij biznesi.

Biznesi i shitjes me pakicë, ose pjesët përkatëse të tij, pritet t’i vihen në dispozicion shoqërisë së re në përputhje me kushtet e dakorduara dhe dokumentacionin përfundimtar të transaksionit.

“Proeks Internacional” është kompani me seli në Prishtinë, aktiviteti kryesor i së cilës është tregtia me pakicë në dyqane të paspecializuara, kryesisht me ushqime, pije dhe produkte të duhanit.

Kompania është pjesë e “Proeks Group”, një grup biznesi kosovar i diversifikuar, aktiv në tregti, distribucion, shitje me pakicë, logjistikë dhe sektorin e energjisë. Grupi merret gjithashtu me importin dhe distribuimin e mallrave të konsumit të gjerë, menaxhimin e rrjeteve të supermarketeve, si dhe tregtinë, magazinimin dhe distribuimin e derivateve të naftës.

Një tjetër detaj interesant është se “Proeks Internacional” dhe grupi të cilit i përket deri më tani nuk kanë pasur subjekte të lidhura të regjistruara në Maqedoni, ndërsa gjatë vitit 2025 nuk kanë realizuar të ardhura në tregun maqedonas.

Njoftimi për përqendrimin i është dorëzuar Komisionit më 10 gusht dhe është plotësuar një ditë më vonë. Komisioni më pas e ka shqyrtuar transaksionin dhe ka konstatuar se janë plotësuar kushtet ligjore për miratimin e tij.

Me këtë vendim, praktikisht është hequr pengesa nga aspekti i mbrojtjes së konkurrencës për realizimin e blerjes së planifikuar të biznesit të shitjes me pakicë të “Tinex” nga kompania kosovare “Proeks Internacional”.