Lajme

Kandidati musliman për kryetar të New Yorkut: Lufta ime është për ata që nuk kanë mundësi të jetojnë në këtë qytet

Kandidati musliman i Partisë Demokratike që fitoi zgjedhjet paraprake për kryetar bashkie të mbajtura në New York të SHBA-së, Zohran Mamdani tha se do ta bëjë New Yorkun me çmime të përballueshëm për të gjitha segmentet e popullsisë dhe do të eliminojë pabarazinë klasore në qytet, transmeton Anadolu.

Duke folur në një aktivitet të mbajtur në New York, Mamdani tha se e gjithë fushata e tij zgjedhore bazohet në bërjen e New Yorkut, qytetit më të shtrenjtë në SHBA, të përballueshëm për të gjitha segmentet e popullsisë dhe në eliminimin e pabarazisë klasore.

Ai theksoi se përpjekjet e tij janë që banorët e qytetit të jetojnë në një vend që mund ta përballojnë dhe të ndihen të sigurt dhe do ta bëjë këtë pavarësisht përpjekjeve të administratës së presidentit të SHBA-së, Donald Trump, për të sulmuar teksturën e qytetit.

“Unë po luftoj për klasën punëtore. Lufta ime është për punëtorët që nuk kanë mundësi të jetojnë në këtë qytet”, tha Mamdani.

– Kritika ndaj Trumpit

Pasi rikujtoi fjalët e presidentit Trump se do ta deportojnë atë, Mamdani tha: “Donald Trump po më sulmon sepse dëshiron të na bëjë të harrojmë luftën që ai zhvilloi kundër punëtorëve. Por, ne do të luftojmë kundër saj”.

Mamdani deklaroi se arsyeja pse Trump po bën deklarata që e shënjestrojnë është të largojë vëmendjen e publikut nga çështje të tilla si “rritja e kostos së jetesës, çmimeve të ushqimit dhe banesave”.

Ai shtoi se Trump po tradhton të gjithë qytetarët amerikanë të klasës punëtore, jo vetëm në New York, por në të gjithë vendin, duke mos përmbushur premtimet e tij të fushatës, dhe theksoi se nxitja e pabarazisë dhe diskriminimit klasor është një mundësi më e lehtë për Trumpin.

“Është përgjegjësia jonë si njujorkezë të tregojmë se mund të ngrihemi kundër autoritarizmit dhe të luftojmë për të drejtat e punëtorëve”, nënvizoi Mamdani.

– Përshkrimi i rregullores së uljes së taksave si “tradhti e klasës punëtore”

Mamdani kritikoi projektligjin, i cili përfshin ulje gjithëpërfshirëse të taksave dhe që nga Trumpi quhet si “Një projektligj i madh dhe i bukur”.

Duke e përshkruar rregulloren ligjore si “tradhti ndaj klasës punëtore amerikane”, Mamdani tha se “Ky projektligj do t’u heq kujdesin shëndetësor qytetarëve amerikanë dhe do të vjedhë ushqimin e të uriturve”.

Gjatë vizitës së tij në qendrën e paraburgimit të quajtur “Alcatraz the Aligator” në Florida, ku do të mbahen emigrantët e parregullt, Trump bëri deklarata që shënjestruan Mamdanin.

Trump tha se nëse Mamdani nuk do të bashkëpunonte me autoritetet e imigracionit, ata do të duhej ta arrestonin dhe deportonin. “Nuk kemi nevojë për komunistë në këtë vend”, tha presidenti amerikan.

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.