Lajme

BDI: Edhe në Ministrinë e Bujqësisë, shqiptarët të përjashtuar: 10 – 0

Bashkimi Demokratik për Integrim shpreh indinjatën më të thellë për konkursin e fundit të shpallur nga Ministria e Bujqësisë, ku nga të gjithë të emëruarit: këshilltarë shtetërorë, udhëheqës të sektorëve, të njësive dhe këshilltarë të zakonshëm, asnjë nuk është shqiptar. Rezultati është i qartë: 10 me 0.

Kjo është vetëm një tjetër dëshmi se kjo qeveri, e cila nuk ka legjitimitet etnik, po zbaton një plan sistematik për përjashtimin e shqiptarëve nga institucionet shtetërore dhe publike. Ky plan nuk është i ri. Ai është konceptuar nga partitë dhe oligarkia maqedonase që në vitin 2022 dhe po zbatohet hap pas hapi përmes vendimeve administrative, politike e kushtetuese.

Në qendër të këtij skenari të rrezikshëm qëndron diskriminimi i qëllimshëm i shqiptarëve, qëllimi i të cilit është zbehja e rolit të tyre si faktor shtetformues dhe institucional. Ky proces ka nisur me sulmet ndaj përfaqësimit të drejtë dhe adekuat, me mohimin e të drejtës për vetëdeklarim etnik, me tentativat për shfuqizimin e përdorimit zyrtar të gjuhës shqipe dhe me eliminimin praktik të bilingualizmit në institucionet publike.

Gjykata Kushtetuese, nën urdhrat e kësaj qeverie, ka filluar të rrënojë themelet e Marrëveshjes së Ohrit, duke krijuar një precedent të rrezikshëm për prishjen e ekuilibrit ndëretnik dhe kthimin e vendit në një sistem monoetnik dhe diskriminues.

Rasti i Ministrisë së Bujqësisë është vetëm vazhdimësi e kësaj agjende: në emër të “profesionalizmit” dhe “kompetencës” po fshihet një pastrim sistematik etnik nga institucionet. Shqiptarët janë përjashtuar jo për mungesë vlerash, por për shkak të përkatësisë së tyre kombëtare.

Mbetjet e vetme të “përfaqësimit” janë spektatorë të heshtur, marioneta në një teatër turpi që luhet çdo ditë në Republikën e Maqedonisë së Veriut.

BDI do të vazhdojë të qëndrojë në mbrojtje të barazisë, drejtësisë dhe përfaqësimit real të shqiptarëve në të gjitha nivelet e shtetit, duke denoncuar me forcë çdo përpjekje për përjashtim, diskriminim dhe zhbërje të arriturave historike.

Lajme

Alpinisti i vdekur në Majën e Titos është nga fshati Xhepçisht?!

Personi që humbi jetën sot në zonën e “Kodrës së Diellit”, përkatësisht në afërsi të Majës së Titos, mësohet se është nga fshati Xhepçisht i Komunës së Tetovës, mëson tetova1

Sipas informacioneve të para, bëhet fjalë për një person mbi 70-vjeç, i cili kishte dalë në zonën malore si alpinist. Për shkak të terrenit të vështirë dhe të paarritshëm me mjete të zakonshme, trupi i pajetë është transportuar me helikopter nga zona malore. Autoritetet pritet të japin më shumë detaje lidhur me rrethanat e ngjarjes./tetova1.mk

Lajme

Maran e la jashtë listës së Kombëtares, reagon Jasir Asani

Jasir Asani ishte një nga befasitë e trajnerit Maran, pasi mëngjarashi nuk ishte pjesë e listës me 29 futbollistë të grumbulluar për 4 ndeshjet e kombëtares në Ligën e Kombeve.

Këtë Asani nuk e ka “kapërdirë” dot dhe ka reaguar në rrjetet sociale. Asani ka “ironizuar”, me dy postime të bëra.

“Po rri urtë, se e di veten. Historia nuk harrohet kurrë. Më mirë të mos flas më…”, shkruan Jasir Asani në rrjetet sociale.

Lajme

Këto janë të dhënat që nuk duhet t’ia jepni ChatGPT-së

ChatGPT është bërë pjesë e përditshmërisë së shumë njerëzve, të cilët e përdorin për gjithçka, nga recetat dhe CV-të, deri te këshillat për shëndetin dhe problemet në punë.

Por përdorimi gjithnjë e më i madh i chatbotëve po ngre shqetësime te ekspertët e privatësisë, të cilët paralajmërojnë se disa informacione personale dhe konfidenciale nuk duhet të ndahen në bisedat me inteligjencën artificiale.

Sipas ekspertëve të cituar nga “HuffPost”, përdoruesit duhet të shmangin ndarjen e të dhënave që mund t’i identifikojnë drejtpërdrejt.

Të dhënat personale

Emri i plotë, adresa, numri i telefonit, numri personal, të dhënat e pasaportës, patentës apo dokumenteve të tjera zyrtare janë ndër informacionet që këshillohet të mos ndahen.

Ekspertët rekomandojnë që edhe para ngarkimit të një dokumenti për analizë të hiqen të dhënat që mund të identifikojnë personin.

Problemet dhe informacionet intime

Komunikimi natyral me chatbotët mund t’i bëjë përdoruesit të ndajnë histori familjare, probleme personale apo informacione intime.

Ekspertët paralajmërojnë se një chatbot nuk duhet trajtuar si psikolog, mjek apo avokat, pasi nuk ka të njëjtat detyrime profesionale dhe ligjore për konfidencialitet.

Dokumentet mjekësore
Raportet mjekësore dhe analizat laboratorike mund të përdoren për të marrë shpjegime nga inteligjenca artificiale, por këshillohet që paraprakisht të fshihen emri, datëlindja, numri personal dhe të dhënat e tjera identifikuese.
Informacionet e kompanisë

Raportet e brendshme, kontratat, të dhënat e klientëve, kodet burimore dhe dokumentet që mbrohen nga marrëveshjet e konfidencialitetit nuk duhet të ngarkohen pa autorizim.

Një veprim i tillë mund të krijojë probleme ligjore, kontraktuale ose rregullatore për punonjësin dhe kompaninë.

Të dhënat financiare

Numrat e llogarive bankare, të dhënat e kartave të kreditit, informacionet mbi investimet, të ardhurat dhe deklaratat tatimore janë gjithashtu informacione që duhet të mbahen larg chatbotëve.

Ekspertët këshillojnë përdoruesit të kontrollojnë cilësimet e privatësisë në platformat e inteligjencës artificiale dhe, kur është e mundur, të kufizojnë përdorimin e bisedave për trajnimin e modeleve.

Një alternativë është përdorimi i pseudonimeve ose përshkrimeve të përgjithshme në vend të emrave dhe të dhënave reale, duke i dhënë chatbotit kontekstin e nevojshëm pa ekspozuar informacionet personale apo konfidenciale.