Lajme

Beteja për mbrojtjen e qytetarëve të Komunës se Zhelinës ka nisur!

Unë, Emir Sulejmani, nuk hyra në këtë garë për poste, privilegje apo interesa personale. Hyra sepse Zhelina meriton më shumë. Meriton ajër të pastër, rrugë të pastra, hapësira të gjelbra të mbrojtura, dhe mbi të gjitha – një udhëheqje që i shërben qytetarit, jo vetes, kështu flet ndër të tjerash në këtë intervistë të shkurtë Emir Sulejmani, kandidat i BDI për kryetar të komunës së Zhelinës.

Jeni person që vini nga biznesi, e dini çfarë do të thotë përgjegjësi, cila është lufta që do bëni në dobi të qytetarëve?

Si biznesmen dhe si njeri i vendosur, e di çfarë do të thotë përgjegjësi, punë dhe rezultat. Do të luftoj për çdo centimetër gjelbërim, për çdo hapësirë publike dhe për çdo të drejtë të qytetarëve tanë. Sepse shëndeti fillon nga mjedisi, dhe mjedisi është pasuria jonë e përbashkët.

Për shumë mandate ka pasur vetëm premtime sa i përket mbajtjes së pastërtisë në vendbanimet e komunës së Zhelinës, do vazhdoni të bëni punën ndryshe?

Pastrimi i mbeturinave dhe higjiena e fshatrave do të jenë prioritet i menjëhershëm. Nuk do të ketë më premtime boshe dhe aksione vetëm për sy e faqe. Do të ketë plan, zbatim dhe kontroll.

Sa i përket pjesës së urbanistikës si do të veproni?

Për ndërtimet pa leje dhe keqpërdorimet e së kaluarës – do të veprojmë me ligj dhe me drejtësi. Nuk do të lejoj askënd të shkelë mbi pronën publike apo private, por as të lëmë ndonjë familje në rrugë. Zgjidhjet do t’i gjejmë bashkë me qytetarët, gjithmonë në përputhje me ligjin.

Viteve të fundit komuna e Zhelinës ka qenë nga fundi sa i përket transparencës, çfarë do bëni ju që të përmirësoni gjendjen?

Zhelina do të jetë shembull i zhvillimit të qëndrueshëm. Do të investojmë në sisteme moderne ujitjeje për hapësirat e gjelbra, me sprinklerë automatikë dhe menaxhim efikas, pa shpenzime të panevojshme. Çdo hap do të jetë i planifikuar, çdo projekt do të jetë transparent, dhe çdo shpenzim do të ketë arsyetimin e tij.

Pse vendosët të futeni në garën për të parin e Zhelinës?

Vendimi im për t’u kandiduar nuk ishte spontan – ishte i pashmangshëm. Sepse nuk mund të shoh më një komunë me potencial të madh, të lënë në mëshirë të keqmenaxhimit. Zhelina është shtëpia ime, dhe shtëpia nuk shitet, nuk shpërdorohet, nuk lihet pas dore!

Kjo nuk është vetëm fushata ime – është beteja e të gjithë atyre që besojnë se Zhelina mund të bëhet më e mirë. Dhe po, unë jam gati ta udhëheq këtë ndryshim, thekson për fund Sulejmani.

Lajme

Burri dhe gruaja dogjën vilën duke përgaditur hajvarin

Burri dhe gruaja shkaktuan zjarr në fshatin Gorno Sonje ndërsa po bënin ajvar, pasi hirit nga soba me thëngjill e derdhën pranë shtëpisë. Policia intervenoi dhe zjarri u shua pa të lënduar.

Sipas informacioneve të MPB-së, dje rreth orës 19:50 në polici u raportua se në fshatin Gorno Sonje, pranë Shkupit, kishte filluar zjarr, ku ishte djegur një vilë dhe bari.

“Policët e SPB Shkup dolën në vendngjarje dhe biseduan me D.M. (74), pronarin e vilës, i cili shpjegoi se me bashkëshorten po bënin dimërishte dhe pranë shtëpisë kishin derdhur hirin nga soba, në të cilën ka të ngjarë të kishte thëngjill, dhe ishin larguar, pas së cilës kishte filluar zjarri», thonë nga MBP-ja.

Nuk pati të lënduar, ndërsa ekipi i Brigadës së Mbrojtjes nga Zjarri Shkup e shoi zjarrrin.

Lajme

VLEN merr dy poste të tjera të zëvendësministrave: Priten rokada në eshallonin e dytë qeveritar

Koalicioni VLEN pritet të marrë pozicionet e zëvendësministrave në dikasteret e Shëndetësisë dhe të Politikës Sociale, pas bisedimeve dhe marrëveshjes së arritur me kryeministrin Hristijan Mickoski.

Burime nga koalicioni konfirmojnë se propozimet konkrete me emrat e kandidatëve i janë dorëzuar tashmë kryeministrit për konfirmim përfundimtar, përcjell INA.

Ndryshimet në eshallonin e dytë vijnë si rrjedhojë e riorganizimit të kabinetit qeveritar në korrik, gjatë të cilit VLEN mbeti pa drejtimin e këtyre dy ministrive. Argumenti kryesor i koalicionit është ruajtja e balancit politik brenda partnerëve të pushtetit.

Për të marrë këto dy poste pa ndryshuar peshën e përgjithshme në qeveri, VLEN do të duhet të heqë dorë nga dy pozita të tjera zëvendësministrash.

Është pothuajse e sigurt se koalicioni do të lirojë postin e zëvendësministrit në Bujqësi (ku ministri është nga lëvizja ZNAM), vend i cili pritet t’i kalojë VMRO-DPMNE-së.

Po ashtu do lirohet edhe posti i zëvendësministrit të Kulturës, që pritet t’i takojë VMRO-DPMNE-së ose lëvizjes ZNAM, pasi ministri aktual i Kulturës është nga radhët e VLEN-it.

Kjo parti gjithashtu pret të marrë edhe një tjetër post zëvendësministri, përveç atyre që ka në Energjetikë dhe Transformim Digjital.
Kryeministri Mickoski ka paralajmëruar se kompletimi dhe rokadat në eshallonin e dytë qeveritar do të përmbyllen brenda gjysmës së dytë të tetorit.(INA)

Lajme

Qytetarët ofrojnë garancion për Artan Grubin!

Vazhdon seria e deklaratave publike në mbështetje të Artan Grubit. Pas reagimeve të Asllan Kokës dhe Uka Shaqirit, edhe Blero Arifi nga Velesi ka bërë të ditur se është i gatshëm të vendosë në dispozicion të gjithë pasurinë e tij si garanci për lirimin e Grubit informon Tetovasot.

Përmes një postimi në rrjetet sociale, Arifi ka shkruar se, me mirëkuptimin e familjes, është i gatshëm të vendosë në garanci edhe pasurinë e saj.

“Edhe unë jam gati të vë në garanci gjithçka që kam — pasurinë time dhe, me mirëkuptimin e familjes, edhe pasurinë e saj për lirimin e Artan Grubit,” ka shkruar Blero Arifi.

Ai ka sqaruar se këtë qëndrim e merr për shkak të bindjes së tij personale.

“E bëj këtë sepse besoj në pafajësinë e tij dhe besoj se ndaj tij po zhvillohet një përndjekje politike,” është shprehur Arifi.

Në fund të postimit, ai shton se bindjet duhet të mbështeten me veprime.

“Kur beson te drejtësia, nuk mjafton vetëm të flasësh. Duhet të jesh i gatshëm të qëndrosh pas bindjes tënde edhe kur kjo të kushton,” ka përfunduar ai.

Deklarata e Blero Arifit vjen pas disa reagimeve të ngjashme të mbështetësve të Artan Grubit, të cilët ditët e fundit kanë shprehur publikisht gatishmërinë për të ofruar pasurinë e tyre si garanci.

Ndërsa, tetovari Asllan Koka ka bërë një deklaratë publike, duke shprehur gatishmërinë që pasurinë e tij të paluajtshme ta vendosë si garanci pasurore për ish-zëvendëskryeministrin Artan Grubi.

Përmes një postimi në rrjetet sociale, Koka ka shkruar se është i gatshëm ta japë shtëpinë e tij si garanci me qëllim që Grubit t’i kthehet pasaporta.

“Edhe pasuria e paluajtshme e ime është në dispozicion të Artan Grubit për t’u vendosur si garanci pasurore, me qëllim që t’i kthehet pasaporta,” ka shkruar Asllan Koka.(INA)