Lajme

Mexhiti: S’ka më na jepni votën, do ta bëjmë këtë ose atë! E bëjmë punën, ju e vlerësoni

Kandidati i VLEN-it për kryetar të Komunës së Çairit, Izet Mexhiti, pasditen e sotme zhvilloi një takim me banorët e Çairit të Vjetër në një nga çajtoret e lagjes, përcjell TV21. Në një atmosferë të ngrohtë e miqësore, ai bashkëbisedoi me qytetarët për gjendjen e shkollave, rrugëve që presin rregullim, hapësirave publike që kanë nevojë për kujdes, si dhe për rolin e bizneseve të vogla në gjallërimin e ekonomisë lokale. Mexhiti tha se nga këto takime forcohet besimi se Çairi i Vjetër dhe i gjithë Çairi mund të bëhen më të rregullt, më të zhvilluar dhe më të mirë për të gjithë banorët.

“Dallimi është se në të kaluarën kemi ardhur, kemi kërkuar, na jepni votën se do t’i bëjmë këtë projekt e atë projekt. Sot domethënë e bëjmë punën dhe e lamë qytetarit ta vlerësojë punën. Dhe në fund të vjen domethënë te vlerësimi. Vetëm prej “Xhon Kenedi” e këndej, Çairi i Vjetër asfaltohet tërësisht, çdo rrugë, çdo rrugicë, me ndriçim të ri, me trotuaret të ri, domethënë, në ketë pjesë. Dizhoni, ka qenë vetëm rruga kryesore. Tash çdo rrugicë e Dizhonit do të ketë ujësjellës kanalizim rrjet atmosferik dhe në fund pra asfaltohet krejt Dizhoni. Rruga “Ferid Murati”, që ne ja kemi ndërruar edhe, pjesërisht është “Lazar Trpovski” prej “Xhon Kenedi”, deri te Shqiponja, rruge e re me trotuare të ri, me korsi për biçikleta me njërën anë parking me ndriçim të ri, pra është një milion euro vetëm ajo rrugë. Dhe këto ditë pra fillon edhe asfaltimi i tërësishëm i Fushë Topanës, domethënë dhe dalim mandej edhe te Teneqe Mëhalla. Atë rrugë që s’e kemi bërë në të kaluarën, domethënë do t’i rregullojmë. Pra vetëm prej në “Xhon Kenedi” e këndej, ka më shumë se tre-katër milionë euro investime prej qeverisë për Çairin, pa e harru dy milionë eurot që duhet hynë në Duqanxhik, për ujësjellës, kanalizim, rrjet atmosferik dhe asfaltim. Pa e harru edhe një milion e gjysmë që janë duke u bërë në “Sahat Kullë”, që s’është bërë ndoshta prej kohës së Titës, domethënë s’është prek ajo. Me ujësjellës, me kanalizim, me rrjet atmosferik, edhe nga “Isa Begu”, edhe nga Sulltan Murati”, tha mes tjerash Mexhiti./tv21.tv

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.