Në historinë e çdo kombi ekzistojnë figura që nuk maten vetëm me tituj, pozita apo fjalë të shkruara në letra, por me gjurmët që lënë në shpirtin e një populli. Janë ata njerëz që nuk kërkojnë lavdi, por e ndërtojnë atë përmes veprave; nuk kërkojnë vëmendje, por bëhen vetë dritë udhëheqëse për komunitetin e tyre. Një nga këta emra që spikat me dinjitet, përkushtim dhe ndjenjë të thellë atdhetare është Peti Camaj, bir i denjë i Malësisë së Madhe, trevës që historikisht ka qenë kështjellë e qëndresës shqiptare, e krenarisë kombëtare dhe e sakrificës për liri.

I lindur dhe i rritur në një vatër me tradita të pastra patriotike, Peti Camaj mbart në vetvete trashëgiminë shpirtërore të një treve që kurrë nuk është përkulur para vështirësive. Malësia e Madhe, kjo tokë e burrërisë dhe besës shqiptare, ka nxjerrë ndër shekuj figura që kanë mbrojtur me gjak dhe nder identitetin kombëtar. Në këtë vazhdë të artë historike, familja Camaj përfaqëson një degë të fortë të trungut patriotik shqiptar, dhe Peti Camaj është një vazhdues i denjë i kësaj tradite të shenjtë.

Edhe pse jeta e tij profesionale dhe familjare është zhvilluar në Shtetet e Bashkuara të Amerikës, zemra e tij nuk është larguar asnjëherë nga vendlindja. Përkundrazi, largësia fizike është shndërruar në një lidhje edhe më të fortë shpirtërore me atdheun, duke e bërë atë një nga zërat dhe veprimtarët më të përkushtuar të diasporës shqiptare.

Veprimtaria e Peti Camajt në shërbim të komunitetit shqiptar nisi që në moshën 16-vjeçare, dhe ai vjen nga një familje me gjashtë vëllezër, e njohur për kontributin e saj në jetën shoqërore dhe kombëtare të komunitetit shqiptar. Së bashku me vëllain e tij Palok Camaj dhe me këngëtarin e njohur Lindon Camaj, për shumë vite kanë organizuar mbrëmje argëtuese, kulturore dhe kombëtare për shqiptarët në diasporë, duke sjellë dhjetëra artistë të njohur nga trojet shqiptare dhe duke forcuar ndjenjën e unitetit dhe përkatësisë kombëtare.

Në çdo kohë kur Malësia e Madhe apo trevat shqiptare kanë pasur nevojë për ndihmë, mbështetje apo solidaritet, ai është gjendur ndër të parët, duke vepruar pa zhurmë dhe pa kërkuar lavdi. Humanizmi i tij është një shtyllë e fortë e figurës së tij, pasi ai ka ndihmuar vazhdimisht familje në nevojë dhe ka mbështetur iniciativa komunitare, duke u bërë një urë lidhëse mes diasporës dhe atdheut dhe duke ruajtur identitetin kombëtar shqiptar në mërgim.

Aktualisht, ai mban detyrën e Kryetarit të Bordit Drejtues të Shoqatës “Jehona e Malësisë”, duke kontribuar në drejtimin dhe zhvillimin e veprimtarisë së saj në shërbim të komunitetit shqiptar dhe ruajtjes së vlerave kombëtare.

Përkushtimi i Peti Camaj është dëshmi e gjallë se shqiptari i vërtetë nuk e harron kurrë vendin e tij, pavarësisht se ku jeton. Ai e mban Malësinë në zemër dhe shqiptarinë në veprim. Ky është një model që duhet të shërbejë si frymëzim për brezat e rinj, si në vendlindje ashtu edhe në diasporë.

Sot, më shumë se kurrë, shoqëria shqiptare ka nevojë për shembuj të tillë njerëz që veprojnë me ndershmëri, përkushtim dhe dashuri të sinqertë për kombin. Peti Camaj është një prej tyre. Ai përfaqëson atë kategori të rrallë atdhetarësh që nuk kërkojnë vëmendje, por lënë gjurmë, nuk kërkojnë lavdi, por ndërtojnë vlera, nuk flasin shumë, por veprojnë shumë.

Në këtë kuptim, emri i Peti Camaj nuk është vetëm emër individi, por një simbol i lidhjes së fortë mes diasporës shqiptare dhe atdheut, një dëshmi e gjallë e dashurisë për Malësinë e Madhe dhe për kombin shqiptar në tërësi.

Figura të tilla janë pasuri kombëtare që duhen vlerësuar, kujtuar dhe nderuar, sepse përmes tyre ruhet vazhdimësia e shpirtit patriotik shqiptar ndër breza.

Në fund, mund të thuhet me bindje se Peti Camaj mbetet një nga ata bij të Malësisë së Madhe që me jetën dhe veprën e tij e nderon vendlindjen, e forcon diasporën dhe e pasuron historinë e gjallë të atdhedashurisë shqiptare.

OJQ “LABEATËT”, në bashkëpunim me Organizatën Turistike të Tuzit, organizoi shtegtimin tradicional në Greçë, duke promovuar trashëgiminë historike të Memorandumit të Greçës dhe pasuritë natyrore të Kanionit të Cemit.

Shkruar nga Luigj Camaj dhe Alen Gjokaj

Në vazhdën e realizimit të aktiviteteve të saj tradicionale, OJQ “LABEATËT”, në bashkëpunim me Organizatën Turistike të Tuzit, më 21 qershor 2026, organizoi shtegtimin tradicional në Greçë. Ky aktivitet kishte për qëllim njohjen, promovimin dhe ruajtjen e vlerave historike, kulturore dhe natyrore të kësaj treve me rëndësi të veçantë për Malësinë dhe historinë kombëtare.
Shtegtimi në Greçë ishte një përkujtim i denjë i ngjarjeve të rëndësishme historike të vitit 1911, kur në këtë vend u mbajt Kuvendi i Greçës dhe u hartua Memorandumi i Greçës, një nga dokumentet më të rëndësishme politike të kohës, që hodhi themelet e kërkesave për të drejtat kombëtare të shqiptarëve. Krahas dimensionit historik, aktiviteti synoi edhe promovimin e bukurive natyrore të Lugut të Greçës, duke i dhënë shtegtimit një karakter edukativ, kulturor dhe turistik.
Në këtë aktivitet morën pjesë 37 persona. Përveç anëtarëve të OJQ “LABEATËT”, pjesëmarrës ishin edhe stafi i Organizatës Turistike të Tuzit, si dhe anëtarë të Klubit të Bjeshkatarisë “LIPOJA” nga Ulqini.
Pjesëmarrësit në ekspeditën historiko-turistike ishin: Luigj Camaj, Alen Gjokaj, Anton Lulgjuraj, Nikollë Gegaj, Prenkë Ivezaj, Gani Ceka, Rrok Gjokaj, Petrit Gjokaj, Marash Kalaj, Gjon Nicaj, Marjan Lulgjuraj, Alban Dedvukaj, Kristjan Bojaj, Mikail Bogdani, Gjeto Ulaj, Shtjefën Ivanaj, Mario Bojaj, Pjetro Dushaj, Makson Gojçaj, Togo Gojçaj, Nua Dushaj, Tom Ivezaj, Ilirjan Dedvukaj, Husein Palaj, Linda Camaj, Lubo Lucaj, Lindon Dedvukaj, Martina Dedvukaj, Linda Dedvukaj, Martin Dedvukaj, Martin Vulaj, Rilind Dedvukaj, Albert Dedvukaj, Nevila Nikaj, Linda Sinishtaj dhe Viktor Dedvukaj.
Udhëheqës i shtegtimit ishte Anton Lulgjuraj. Interpretimin e veçorive gjeografike, historike dhe natyrore të zonës e bëri Luigj Camaj.
Gjatësia e përgjithshme e itinerarit ishte rreth 13 kilometra. Rruga nga Lugu i Koritës drejt Greçës kalon nëpër një terren të larmishëm malor, ku ndërthuren bukuritë natyrore me gjurmët e historisë. Përgjatë ecjes pjesëmarrësit patën mundësi të njiheshin me vende karakteristike si Kodra e Muzheçkut, Maja e Sokolit, Gropa e Zezë, Lugu i Prosekut, Pusi i Kalbtë, Gropa e Harushës dhe shumë pika të tjera me vlera natyrore e historike.
Ekspedita vazhdoi nëpër hijen e ahishtave shekullore, dëshmitare të gjalla të historisë së kësaj treve. Trupat e mëdhenj të ahut, që dikur mezi përqafoheshin nga dy burra, vazhdojnë të qëndrojnë krenarë si monumente të gjalla të natyrës. Më tej shtegtarët kaluan pranë vendbanimit të Luk Toms Nikprelajt, një prej figurave të njohura të zonës, ndërsa në anën e majtë qëndronte madhështore Maja e Kujit.
Në Greçë, pjesëmarrësit u njohën më nga afër me rëndësinë historike të këtij vendi. Mbi historikun e Greçës foli Anton Lulgjuraj, duke rikujtuar ngjarjet që e bënë këtë vend simbol të qëndresës dhe vetëdijes kombëtare.
Pas kësaj, grupi vizitoi Kronin e Greçës, ku shtegtarët u freskuan me ujin e ftohtë malor dhe pushuan për pak çaste. Vizita vazhdoi drejt Kanionit të Cemit, një prej mrekullive natyrore më të veçanta të Malësisë. Nga buzët e kanionit pjesëmarrësit shijuan panorama mbresëlënëse, ku natyra ka krijuar peizazhe të rralla dhe spektakolare.
Kanioni i Cemit është një pasuri natyrore me vlera të jashtëzakonshme gjeologjike, ekologjike dhe turistike. Biodiversiteti dhe gjeodiversiteti i tij përbëjnë një harmoni të rrallë natyrore që vështirë gjendet në hapësira të tjera të rajonit. Buzët vertikale të kanionit ngrihen në lartësi prej 1100 deri në 1200 metra mbi nivelin e detit, duke krijuar pamje mahnitëse që lënë mbresa të pashlyeshme te çdo vizitor.
Nga kjo pikë mund të shihen qartë shumë prej vendeve karakteristike të zonës, si Bregu i Galë (Gala Smajlajve), Lugu i Dulë (Dulajve), Lugu i Kol Dokë (Kol Dokajve), Gropa e Carë (Carajve), Kroni i Greçës, Kroni i Krenit, Dritat e Greçës, Maja e Lerthit, Mregu dhe shumë lokalitete të tjera që përbëjnë mozaikun natyror dhe kulturor të Malësisë.
Me këtë shtegtim, OJQ “LABEATËT”, me mbështetjen e Organizatës Turistike të Tuzit, vazhdoi traditën e organizimit të aktiviteteve në Greçë, me shpresën që në vitet e ardhshme kjo nismë të tërheqë edhe më shumë pjesëmarrës dhe dashamirë të natyrës, historisë dhe kulturës.
Mbreteria e hijeve të freskëta të ahishtave dhe pyjeve me pisha që shtrihen në Lugun e Greçës mbetet ndër pasuritë më të çmuara të kësaj zone. Ajri i pastër, qetësia e maleve, aroma e luleve dhe gjelbërimi i pakufishëm krijojnë një atmosferë të veçantë, ku çdo vizitor ndien lidhjen e fortë me natyrën dhe trashëgiminë e vendit.
Nga kreshtat malore të Bjeshkëve të Kelmendit shpalosen pamje madhështore që të lënë pa frymë. Këto peizazhe, të soditura nga lartësitë e shqiponjave, ngjallin emocione të veçanta dhe mbeten gjatë në kujtesën e çdo shtegtari. Sikur vetë natyra të ftonte me fjalët e saj të heshtura: “Ejani përsëri, ju presim!”
“Grand Canyon” i Malësisë, Kanioni i Cemit, së bashku me ahishtat, pyjet dhe majat krenare të maleve tona, dëshmojnë për pasurinë e jashtëzakonshme natyrore që na është lënë trashëgim nga brezat e mëparshëm. Këto bukuri, të përshkruara me admirim nga shumë vizitorë vendas e të huaj, meritojnë të ruhen, të promovohen dhe të vizitohen edhe më shumë.
Këto janë vetëm disa nga përshtypjet dhe kujtimet e një dite të kaluar në Greçën historike. Fotografitë e “CeNo Rrogathi” Husein (Ceno) Palaj dhe përjetimet e pjesëmarrësve flasin edhe më shumë sesa mund të përshkruajnë fjalët.
Falënderojmë të gjithë pjesëmarrësit dhe mbështetësit që kontribuuan në realizimin e këtij aktiviteti, si dhe lexuesit që i kushtuan kohë këtij rrëfimi modest për një nga viset më të bukura dhe më domethënëse të Malësisë.

Qeveria propozon ndryshime në Ligjin për Sigurinë në Komunikacion, me të cilat kufizohet përdorimi i trotinetëve elektrikë, ulet shpejtësia maksimale e lejuar dhe parashihet mundësia e konfiskimit të përkohshëm të tyre. Sipas propozimit, në të ardhmen trotinetët elektrikë do të mund të drejtohen vetëm nga persona mbi moshën 18-vjeçare, ndërsa shpejtësia maksimale e lejuar do të kufizohet në 20 kilometra në orë. Ndryshimet janë shqyrtuar në seancën plenare të Kuvendit. Përveç gjobave financiare, ligji parashikon edhe mundësinë e konfiskimit të përkohshëm të trotinetit elektrik për një periudhë prej 30 ditësh.

Koordinatori i grupit parlamentar të VMRO-DPMNE dhe një nga propozuesit e ndryshimeve, Nikolla Micevski, deklaroi se nevoja për rregulla më të ashpra buron nga analizat e aksidenteve rrugore ku kanë qenë të përfshirë drejtues të trotinetëve elektrikë.

NIKOLLA MICEVSKI, KOORDINATOR I GRUPIT PARLAMENTAR TË VMRO-DPMNE-SË

“Po ndërhyhet në shpejtësi, pra shpejtësia maksimale të jetë deri në 20 km në orë me qëllim uljen e shkeljeve me trotinetët elektrikë, po rritet kufiri i moshës, mosha minimale 18 vjeç për drejtimin e trotinetëve. Kufiri i moshës po rritet sepse në më shumë se gjysmën e aksidenteve me trotinetë, ato drejtoheshin nga persona të moshës 16 dhe 17 vjeç. Propozimi është rigoroz, por lëmë hapësirë për amendamente të ardhshme”.

Micevski shtoi se gjatë dy viteve e gjysmë të fundit në aksidente trafiku  kanë qenë të përfshirë rreth 2.000 persona, ku 46 prej tyre kanë humbur jetën, ndërsa 556 kanë pësuar lëndime të rënda trupore. Edhe pse masat e propozuara konsiderohen të rrepta, ai theksoi se ato lënë hapësirë për ndryshime dhe plotësime të mëtejshme në bazë të analizave të ardhshme.