Lajme

Rrethi i dytë i zgjedhjeve lokale më 2 nëntor, garë në 32 komuna dhe në Qytetin e Shkupit

Rrethi i dytë i zgjedhjeve lokale do të mbahet saktësisht pas një jave, më 2 nëntor. Sipas të dhënave të Komisionit Shtetëror Zgjedhor (KSHZ), rrethi i dytë do të zhvillohet në 32 komuna dhe në Qytetin e Shkupit. Kundërkandidatët për postet e kryetarëve të komunave pritet ta intensifikojnë këtë javë fushatën e tyre me tubime dhe takime me qytetarët.

Këtë javë pritet të zhvillohet debat mes dy rivalëve për Qytetin e Shkupit – Orce Gjorgjievski nga koalicioni i udhëhequr nga VMRO-DPMNE dhe Amar Mecinoviq nga E Majta (Levica). Në fokus të fushatës së tyre gjatë javës së kaluar ka qenë problemi i mbeturinave dhe mënyra e grumbullimit të tyre në kryeqytet.

Kandidati i VMRO-DPMNE-së për Shkup, Orce Gjorgjievski, deklaroi se me një organizim të mirë problemet e qytetit mund të zgjidhen shpejt dhe se në 72 orët e para pas zgjedhjeve do të nisë një aksion i madh pastrimi, ku do të përfshihen të gjitha komunat, ndërmarrjet publike dhe kompanitë shoqërisht të përgjegjshme.

Nga ana tjetër, Mecinoviq prezantoi një plan për riformimin dhe modernizimin e Ndërmarrjes Publike Komunale, duke propozuar zgjidhje inovative për trajtimin e mbeturinave, që sipas tij tashmë janë të suksesshme në disa qytete evropiane.

Afatet zgjedhore janë gjithashtu në përfundim. Mbrëmë skadoi afati për paraqitjen e personave të sëmurë dhe të pafuqishëm për votim në shtëpi, ndërsa pas dy ditësh përfundon edhe afati për personat në arrest shtëpiak. Këta persona, së bashku me të burgosurit dhe banorët e shtëpive të të moshuarve, votojnë një ditë para zgjedhjeve – më 1 nëntor.

Nga KSHZ informojnë se është në vazhdim procesi i regjistrimit të vëzhguesve për rrethin e dytë të zgjedhjeve.

KSHZ njoftoi gjithashtu se të enjten, në një seancë publike, ka refuzuar të gjitha 57 ankesat e dorëzuara për rrethin e parë të zgjedhjeve lokale.
Prej tyre, 37 ankesa kishin të bëjnë me procedurat e përcaktimit dhe përmbledhjes së rezultateve të votimit, ndërsa 20 të tjera me procesin e vetë votimit.

Në rrethin e parë më 19 tetor, zgjedhjet lokale përfunduan në 43 komuna, ndërsa në Gostivar, Mavrovë-Rostushë, Vrapçisht dhe Qendër Zhupë, ku pjesëmarrja e votuesve nuk arriti një të tretën e numrit të përgjithshëm të regjistruar, procesi i zgjedhjeve për kryetar komune do të përsëritet brenda 60 ditëve nga data e publikimit të rezultateve përfundimtare.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.