Lajme

Nga 1 janari 2026, punësimi sezonal legalizohet me rregulla të reja

Nga 1 janari 2026 hyn në fuqi Ligji për Punësimin e Personave, një rregullore e re që synon të formalizojë punësimin sezonal dhe të krijojë kushte më fleksibile si për punonjësit, ashtu edhe për punëdhënësit. Zëvendësministri i Ekonomisë dhe Punës, Marjan Risteski, e cilësoi ligjin si “revolucionar”, pasi për herë të parë vendos një kornizë të qartë dhe funksionale për angazhimet sezonale, duke synuar uljen e ekonomisë informale dhe rritjen e transparencës në tregun e punës.

Kush përfiton nga ligji i ri?
Ligji u mundëson disa kategorive të qytetarëve të punojnë sezonal pa humbur statusin apo të drejtat aktuale. Ndër ta janë:

Pensionistët, të cilët mund të angazhohen pa humbur pensionin;
Studentët, që ruajnë statusin e tyre;
Të papunët, të cilët nuk e humbin të drejtën për ndihmë sociale;
Të punësuarit, që mund të sigurojnë të ardhura shtesë;
Të vetëpunësuarit, që mund të kryejnë punë shtesë në mënyrë të ligjshme.
Përfituesit mund të angazhohen në tre sektorë kryesorë: bujqësi, hoteleri dhe shërbime.

“Ky ligj është me rëndësi të madhe. Për herë të parë, u mundëson kategorive të ndryshme të punojnë sezonalisht pa humbur përfitimet që tashmë gëzojnë,” deklaroi Risteski.

Regjistrimi me aplikacion mobil
Një nga risitë kryesore është aplikacioni mobil për regjistrimin dhe çregjistrimin e punëtorëve sezonalë në kohë reale. Punëdhënësit do të mund të kryejnë procedurat brenda pak sekondave, gjë që pritet të reduktojë dukshëm punën “në të zezë”.

“Ligji do të intensifikojë luftën kundër punës së paligjshme. Aplikacioni i ri do të sigurojë që çdo punëtor sezonal të jetë i regjistruar dhe i mbrojtur”, theksoi Risteski.

Sa ditë mund të punohet në vit?
Ligji përcakton kufizime të qarta:

120 deri në 180 ditë angazhim sezonal në vit, varësisht nga sektori;
Deri në 15 ditë pune në muaj për secilin punonjës.
Sipas Risteskit, modeli fleksibil synon të ndihmojë bizneset gjatë periudhave të ngarkuara – si sezoni turistik apo ai bujqësor – ndërsa u jep individëve mundësi për të ardhura shtesë pa rrezikuar statusin e tyre profesional apo social.

Efektet e pritshme
Qëllimet kryesore të ligjit janë:

formalizimi i punës sezonale,
ulja e ekonomisë gri,
mbrojtje më e madhe ligjore për punëtorët,
fleksibilitet më i madh për punëdhënësit,
rritja e të ardhurave për individët dhe familjet me të ardhura të ulëta.
Ky ligj pritet të ndikojë dukshëm në tregun e punës duke ofruar një zgjidhje të ligjshme, praktike dhe të sigurt si për bizneset, ashtu edhe për qytetarët.

Zbatimi i tij fillon më 1 janar 2026, njoftoi gazeta Koha, përcjell Flaka

Lajme

Gjendet pa shenja jete një grua në Mavrovë, ja detajet

Një grua 58-vjeçare është gjetur pa shenja jete në një shtëpi vikendi në Hanet e Mavrovës. Rasti është raportuar në Stacionin Policor të Mavrovës, ndërsa mjeku ka konstatuar vdekjen pa shenja dhune. “Me urdhër të prokurorit publik, trupi i pajetë është dërguar për obduksion”, njoftojnë autoritetet.

Lajme

Azir Aliu: Do t’i japim fund mitos në shëndetësi

Ministri i Shëndetësisë, Azir Aliu paralajmëroi se përmes rregullimit të listës së pritjes së pacientëve për ndërhyrje kirurgjike do të ndalohet praktika e mitos për këtë çështje.

Megjithatë, qytetarët thonë se realiteti në terren vazhdon të jetë ndryshe. Sipas tyre, pa ryshfet dhe pa ndërhyrje nga njohjet, procedurat shpesh vonohen, duke i detyruar pacientët të presin me muaj të tërë për ndërhyrje.

“Nëse nuk ke miq, nuk ke asgjë. Çfarë të ju them….shkurtë e qartë nëse ke para ke menjëherë operacion, nëse nuk ke para nuk të përfillin”, u shpreh një qytetarë.

“Po pritet, mundet një muaj, dy ose më shumë …. kam pasur operacion për hernia, kam miq dhe më kanë përfunduar punë menjëherë”, tha një tjetër qytetarë.

“Përafërsisht për gruan time kam pritur gjashtë muaj”, theksoi një qytetarë.

“Me aq sa di është shumë vështirë, pasi nuk kanë personel, por shëndetësinë e kemi katastrofë. Ishim fantastik, tani jemi zero”, tha një qytetare.

“Më mirë mos më pyesni, pasi që gjithçka është kaos. Nëse ju them se për dopler të arterieve karotide kam pritur nga tetori deri në muajin mars, dhe në fund përsëri nuk kam kryer punë”, deklaroi një qytetarë.

“Nuk e di saktësisht, por e di se pritet shumë”, u shpreh një qytetarë.

Problemi me listën e pritjes për terminë ende nuk është tejkaluar. Drejtoresha e Klinikës së specializuar për mjekësi geriatrike dhe paliative, thekson se situata më shqetësuese mbetet për pacientët me demencë.

“Problemi në repartin e Geriatirsë, veçanërisht problemi me pacientët e kategorisë me demencë nuk është tejkaluar. Problemi qëndron ende, pasi që kapacitetet janë të njëjta nuk janë zmadhuar…në ndërkohë e dini se ka pasur skandale në sektorin privat, dhe ne jemi gjendur në një presion më të lartë për akomodimin e pacientëve. Zgjidhje të menjëhershme për këtë problem nuk është e mundur”, theksoi drejtoresha e Klinikës së Geriatrisë, Lençe Nelloska.

Lajme

Trump “nuk ka gjasa të pranojë” propozimin e Iranit për t’i dhënë fund luftës

Presidenti i SHBA-së, Donald Trump, sinjalizoi se nuk ka gjasa të pranojë propozimin më të fundit të Iranit për t’i dhënë fund luftës, pasi Teherani propozoi një plan për rihapjen e Ngushticës së Hormuzit, duke lënë çështjet për programin e tij bërthamor për negociata të mëvonshme, raportoi CNN, duke cituar dy burime të njohura me çështjen, transmeton Anadolu.

Sipas raportit, Trump përcolli qëndrimet e tij gjatë një takimi të së hënës me zyrtarë të lartë të sigurisë kombëtare ku u diskutua Irani, me një burim që tha se presidenti amerikan nuk ka gjasa të pranojë planin që i është dërguar SHBA-së gjatë ditëve të fundit.
Hapi i radhës i Trumpit mbeti i paqartë, thuhet në raport, duke shtuar se zyrtarët amerikanë janë ende të shqetësuar për atë që e quajnë përçarje të brendshme brenda udhëheqjes së Iranit dhe nuk është e qartë se kush mban autoritetin përfundimtar mbi çdo marrëveshje të mundshme.

Megjithatë, publikisht, Trump ka shprehur dyshime për rifillimin e fushatës së bombardimeve të SHBA-së, e cila aktualisht është pezull pasi ai zgjati armëpushimin javën e kaluar.

Shtëpia e Bardhë nuk ka dhënë detaje mbi formën ose drejtimin e negociatave në vazhdim.

“Këto janë diskutime diplomatike të ndjeshme dhe SHBA-ja nuk do të negociojë përmes mediave. Siç ka thënë presidenti, Shtetet e Bashkuara kanë në dorë letrat dhe do të bëjnë vetëm një marrëveshje që vendos në radhë të parë popullin amerikan, duke mos lejuar kurrë Iranin të ketë një armë bërthamore”, i tha CNN-it ndihmës-zëdhënësja e Shtëpisë së Bardhë, Olivia Wales.