Lajme

VLEN-i ende s’u bë zyrtarisht një parti! Propozimi për kryetar me rotacion?

Tani e 8 muaj që thanë se u bënë një parti, por VLEN-i ende s’e ka formalizuar këtë gjë! Kanë formuar një kryesi të përbashkët, por akoma nuk kanë arritur të zgjedhin një kryetar. Ky proces me sa duket do të mbetet pas festave, pasi askush nga VLEN nuk kanë paralajmëruar kohën se kur do të bëhet konsolidimi i plotë. Njëri nga anëtarët e kryesisë së VLEN-it, Fatmir Limani tha se sa më shpejtë të formohen juridikisht organet e partisë VLEN, aq më shpejtë do të merr formë partia.

“Sa më shpejtë aq më mirë edhe për VLEN-in edhe për mbarëvajtjen e gjithë proceseve politike dhe për pritshmëritë që kanë e gjithë popullata, e cila sy e vesh i kanë nga ne. Mendoj se të gjithë e dinë se kush mund të jetë përfaqësuesi më i mirë i shqiptarëve, në kuadër të kësaj përbërje, e cila quhet VLEN. Këtë duhet t’ua lejmë organeve partiake dhe strukturës që përbën subjektin e VLEN-it siç janë LD, ASH, Besës, Alternativës dhe në fund të presim të realizohet pritshmëria e popullsisë. Me shpresë të madhe dhe bindje të thellë të fokusohemi te përzgjedhja e asaj që gjithë e presim të përfaqësohemi nga një lider i dinjitetëshëm, i cili orientim të vetëm do të ketë Unionin Evropian”, tha Fatmir Limani, VLEN.

Me të dal ASH-ja e Taravarit nga VLEN nga fundi i prillit, tre liderët Mexhiti, Ibrahimi e Kasami dhe pjesë e ASH-së e prirë nga Arben Fetai dolën me idenë në formimin e një partie, por juridikisht kjo akoma nuk është bërë. Burime të brendshme partiake tregojnë se disa e mbështesin modelin e vendimmarrjes me konsensus.

Burim nga VLEN:

Për katër vite të ketë katër kryetarë me rotacion çdo vit nga një parti. Sipas modelit të qeverisjes zvicerane vendimmarrja të jetë e përbashkët me konsensus prej 4 krerëve, ndërsa kryetari të ketë statusin simbolik, ndërkohë të tjerët të jenë nënkryetarë dhe sekretar gjeneral. Kështu do të jetë pushteti partiak i balancuar dhe të gjithë do të kenë fuqi të barabartë brenda subjektit të VLEN-it.

Jo zyrtarisht mësohet se mosmarrëveshja ndërmjet kryesisë së partisë është në mes të ndarjes në dy fronte nga krahu i Izet Mexhitit dhe krahu i Bilall Kasamit. Për të amortizuar një përçarje brendapartiake pritet që pas festave të fund vitit të propozohet një model konsesual, ku përveç kreut të LD-së dhe Besës që me vota në zgjedhjet lokale kanë dal me nga 40%, fuqinë e njëjtë vendimmarrëse do ta kenë edhe kryetari i Ri i Alternativës Bekim Sali, parti e cila në lokale mori 15% dhe kreu i degës së ASH-së Arben Fetai, prej të cilëve kandidatët për kryetarë komunash dhe këshilltarë komunal morën 5% të votave.

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)