Lajme

Fundjavë e ftohtë në Maqedoni: Borë, erëra të forta dhe temperatura në rënie

Fundjava që vjen do të sjellë mot tipik dimëror, me vranësira të ndryshueshme, reshje lokale dhe ftohje të dukshme, njoftojnë meteorologët.

Të shtunën , moti do të jetë i ndryshueshëm me vranësira dhe reshje lokale të rastit. Në male dhe vende më të larta do të ketë reshje bore, ndërsa në pjesët më të ulëta reshjet do të jenë shi dhe borë. Do të fryjë erë e moderuar nga jugperëndimi. Reshjet do të jenë më të shumta në pjesët perëndimore të vendit, ku pritet një rritje shtesë e mbulesës së borës.

Në Shkup, të shtunën do të mbajë mot pjesërisht i vranët dhe me shira të herëpashershëm, me erëra të lehta dhe të ndryshueshme.

Të dielën moti do të jetë i ndryshueshëm, me vranësira dhe i ftohtë, me reshje të herëpashershme lokale bore. Do të fryjë erë e mesme, ndërsa përgjatë lumit Vardar do të fryjë erë e fortë veriore, me shpejtësi mbi 60 kilometra në orë.

Temperaturat minimale do të variojnë nga -5 deri në 2 gradë Celsius, ndërsa maksimalet do të jenë në intervalin -2 deri në 7 gradë Celsius. Në disa vende, temperatura e ditës mund të mbetet nën zero.

Moti i ftohtë do të vazhdojë edhe të hënën me erëra të forta veriore dhe reshje lokale bore herë pas here. Moti pritet të stabilizohet nga e marta , me një periudhë më të thatë dhe më të ftohtë.

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)