Lajme

1100 euro për 20 ditë, faturat e EVN-së që po tronditin mërgimtarët

Fatura të fryra të energjisë elektrike po shkaktojnë reagime të ashpra te qytetarët dhe mërgimtarët, të cilët gjatë qëndrimit të shkurtër në vendlindje po përballen me shuma marramendëse për shpenzim të rrymës. Një rast konkret vjen nga fshati Dobridoll i Vrapçishtit, ku Sadri Bahtijari, i cili jeton dhe vepron prej vitesh në Gjermani bashkë me familjen, ka pranuar një faturë prej 66.453 denarësh, apo rreth 1.100 euro, për vetëm 20 ditë qëndrimi në shtëpi.

Në një reagim për gazetën KOHA, Bahtijari shprehet se nga 15 dhjetori deri në fillim të janarit ka qëndruar në Dobridoll, duke u ngrohur me sistem inverterësh, të cilët konsiderohen si kursimtarë të energjisë elektrike. Megjithatë, ai thotë se është tronditur kur ka marrë faturën.

“Është më shumë se hajni. EVN po vjedh hapur, ndërsa as Qeveria dhe as ndonjë institucion tjetër nuk del t’i thotë stop kësaj padrejtësie. Edhe nëse ankohesh në gjykatë, nuk e fiton dot EVN-në. Rryma në Maqedoni më e shtrenjtë se qiraja në Gjermani”, shprehet i revoltuar Bahtijari.

Ai thekson se gjatë qëndrimit nuk ka pasur ndonjë konsum të jashtëzakonshëm të energjisë dhe se shuma e faturuar nuk përputhet aspak me realitetin. Bahtijari nuk është rast i izoluar. Edhe mërgimtarë të tjerë, të cilët për festat e Vitit të Ri kanë qëndruar në vendlindje jo më shumë se 10 deri në 14 ditë, kanë pranuar fatura deri pesëfish më të larta se zakonisht. Disa prej tyre kanë tentuar të ankohen, ndërsa të tjerë kanë hequr dorë që në fillim, duke e konsideruar procesin të pashpresë.

“Ku të ankohesh? Të thonë shkruaj një ankesë-lutje dhe kaq. Asnjë përgjigje nuk merr. Në fund duhet ta paguash faturën, përndryshe mbetesh pa energji elektrike”, tha ditë më parë për mediat një mërgimtar nga Llabunishti, i cili për vetëm 10 ditë qëndrimi në shtëpi kishte marrë faturë afër 2.000 euro.

Sipas informacioneve nga terreni, gjatë muajve nëntor, dhjetor dhe janar, numri i ankesave për fatura të fryra është rritur ndjeshëm. Më së shumti ankesa vijnë nga banorë të Likovës, Shkupit, Tetovës, Gostivarit dhe Strugës me rrethinë, zona ku konsumi i energjisë gjatë dimrit tradicionalisht është më i lartë për shkak të ngrohjes.

Megjithatë, pavarësisht reagimeve publike dhe ankesave të shumta të qytetarëve, nga kompania EVN deri më tani nuk ka pasur asnjë sqarim zyrtar për arsyet e faturave kaq të larta, të cilat në disa raste arrijnë deri në pesëfishin e shpenzimit real. Heshtja institucionale vetëm sa ka shtuar pakënaqësinë dhe dyshimet e qytetarëve, të cilët kërkojnë transparencë, kontroll të matësve dhe reagim urgjent nga institucionet shtetërore për mbrojtjen e konsumatorëve. (koha.mk)

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.