Lajme

Plan i ri për Kalanë e Shkupit, ja se çfarë do të ndërtohet

Hapësira rreth Kalasë së Shkupi po hyn në lojë urbanistike, por kësaj radhe radhitje më ndryshe e prioriteteve. Në vend që edhe një valë e përmbajtjeve komerciale në zemrën e qytetit, planet e reja detajore urbanistike që i ka miratuar Këshilli i Komunës Qendër sjellin paralajmërim për parqe, objekte sportive, shtrigje këmbësore dhe shtige çiklistësh. Në një pjesë të zonave ku paraprakisht janë paraparë hotele, tani hapet hapësirë për përdorim, njofton Portalb.mk.

Me planet e miratuara janë përfshirë “Kalaja dhe QRS Kala” dhe “Varrezat franceze, Tetovska trosharina dhe Park 2”. Komuna theksoi se me to bëhet harmonizim me Planin e përgjithshëm urbanistik të Shkupit, ndërsa për hapësirën rreth Kalasë për herë të parë miratohet dokumentacion më i hollësishëm urbanistik që duhet ta rregullojë qasjen, lëvizjen dhe dedikimin e tokës në këtë rajon të ndjeshëm.

Ndryshimi më i dukshëm është në atë që interesi publik vendoset para ndërtimit agresiv. Në Lajen e Qytetit CS 01 është paraparë objekt sportiv në tokë shtetërore afër kejit me sipërfaqe prej 9.295 metra katrorë, ndërsa në pozita tjera planifikohet gjelbërim me parqe, përmbajtje publike dhe parking. Nën Kalanë, në tokë private edhe tutje mbetet mundësi për hotele, por me kate më të ulëta, deri në P+3, që është sinjal ndryshe nga intervenimet e mëdha më parë të planifikuara.

Plani parashikon edhe shtigje të reja për çiklistë në rrugët “Samoillova” dhe “Llazar Liçenoski”, me lidhje drejt shtegut afër Vardarit, si dhe trotoare më të gjera dhe pemë të reja. Intervenimet e tilla nuk janë vetëm hollësi teknike, por tregues se çfarë qyteti planifiohet në këtë drejtim: hapësirë nëpër të cilën nuk kalohet vetëm me automobil, por ehde në këmbë, me biçikleta dhe me pritje më të gjata.

Në plan ësht vendosur edhe mundësi për ekspozita në të hapur, me çka Kalaja nuk trajtohet vetëm si lokacion atraktiv i ndërtimit, por edhe si pikë kulturore-historike që duhet të komunikojë me qytetin. Sipas informatave të publikuara, në përgatitjen e planit janë marrë parasysh edhe sugjerime të profesionistëve nga Muzeu i Arteve Bashkëkohore, që i jep peshë shtesë qasjes që të ruhet karakteri publik dhe simbolik i hapësirës.

Esenca e këtij PDU nuk është vetëm në atë se çfarë do të ndërtohet, por edhe në atë që nuk do të ndërtohet si më parë. Në një qytet i cili me vite shikon si hapësira publike ngushtohet para interesit privat, çdo zhvendosje nga komplekset hoteliere në parqe, salla dhe hapësira të hapura ku do të lexohet në mënyrë të pashmangshme si një mesazh urbanistik dhe politik. Pyetja tani nuk është nëse plani tingëllon mirë në letër, por se nëse do të duket i tillë edhe në terren.

Me 8 milionë denarë (rreth 130,000 euro) që u siguruan nga ribalanci i buxhetit, dy muzetë e Kalasë në Shkup do të rindërtohen dhe do të punohet në sanimin e saj për t’u bërë një atraksion turistik.

Punimet në Kalanë e Shkupit nxitën probleme ndëretnike në dekadën e kaluar, kur partia në pushtet VMRO DPMNE incioi ndërtimin e tre objekteve, të cilat u kontestuan nga shqiptarët sepse ishin objekte monetnike dhe monofetare. Për shkak të tensioneve që u krijuan nga protestat asokohe, Kalaja si hapësirë historike dhe turistike mbeti e mbyllur me vite.

Lajme

Netanyahu: Irani shënjestroi një nga djemtë e mi

Kryeministri izraelit, Benjamin Netanyahu, ka deklaruar se Irani është përpjekur të vrasë një nga djemtë e tij ndërsa informacioni për komplotin e dyshuar është mbajtur i fshehtë për disa muaj.

Netanyahu e bëri deklaratën gjatë një interviste telefonike me korrespondentin ushtarak të Channel 14, Noam Amir, duke e lidhur kërcënimin me nevojën për masa të vazhdueshme sigurie për familjen e tij.

“Irani shënjestroi një nga djemtë e mi. U përpoq të vriste një nga djemtë e mi. Kjo është arsyeja pse kjo siguri nuk është luks. Pa të, ata do të kenë sukses”, tha Netanyahu.

Kryeministri izraelit nuk bëri të ditur se cili prej dy djemve të tij, Yair apo Avner, ishte objektivi dhe nuk dha detaje mbi mënyrën apo kohën kur dyshohet se ka ndodhur komploti.

Netanyahu tha gjithashtu se kishte komunikuar me kreun e Shin Bet, David Zini, të cilit i kishte kërkuar që të sigurojë mbrojtjen e përshtatshme për çdo kandidat për postin e kryeministrit, veçanërisht në periudhën e fushatës zgjedhore.

Deklaratat vijnë në një kohë tensionesh të larta mes Izraelit dhe Iranit, ndërsa Netanyahu u bëri thirrje gjithashtu aktorëve politikë që të tregojnë përmbajtje gjatë fushatës.

Lajme

“Lotaria” / Prokuroria me 231 prova dhe 7 dëshmitarë kundër Grubit dhe 7 personave të tjerë

Me shoqërim policor, ish zëvendëskryeministri i parë, Artan Grubi, nga paraburgimi u soll sot në Gjykatën Penale të Shkupit për seancën e parë gjyqësore lidhur me lëndën për shpërdorim e 8.2 milionë eurove në Lotarinë Shtetërore.

Grubi i shoqëruar nga dy avokatët, Goce Ristevski dhe Vlladimir Donevski u ul në bankën e të akuzuarit, ndërsa për veprën që i ngarkohet, Kodi Penal parashikon prej 1 deri në 5 vjet burg.

Krahas tij, sot në seancë janë paraqitur edhe 6 të akuzuar të tjerë. Në afërsi të tij, është ulur Metodija Dimovski, ish sekretar i Qeverisë, por edhe të akuzuarit Skender Memeti, Bojan Janev, Fatmir Ramadanovski, Bashkim Avdi dhe Aleksandar Dimitrieski. Mungoi vetëm ish drejtori i Lotarisë Përparim Bajrami, i cili është i akuzuar i parë në këtë lëndë, por që mbetet në arrati prej dhjetorit të vitit 2024.

Megjithatë seancë e sotme zgjati shkurt, meqë organi i akuzës nuk ua ka dorëzuar palëve provat. Për këtë, prokurorët e lëndës Daniel Kocev dhe Aleksandar Davçevski kishin përgatitur tetë pako me prova, të cilat i morën avokatët e të akuzuarve. Siç shpjeguan prokurorët, ata posedojnë listë me 231 prova materiale, të cilat thanë se do t’i prezantojnë brenda një seance gjyqësore, ndërsa ato verbale, respektivisht dëshmitë e 7 dëshmitarëve për 2 deri në 3 seanca, ndonëse kjo nuk mund të përcaktohet pasi do të varet edhe nga numri i pyetjeve të kryqëzuara nga ana e avokatëve të mbrojtjes.

Meqenëse mbrojtja nuk ka pasur mundësi të përgatitet për shkak se nuk i ka pasur provat, gjykatësja e lëndës Biljana Shuplinovska – Jovevski u dha dy javë kohë, respektivisht caktoi seancën e radhës për më 7 shtator. Deri atëherë, avokatët duhet t’i studiojnë provat e Prokurorisë, të përgatisin mbrojtjen dhe të dorëzojnë listë të tyre me prova.

Njëkohësisht, gjyqtarja në pajtim me palët caktoi dinamikën e gjykimit për periudhën e ardhshme, e cila sipas terminëve do të jetë mjaftë e ngjeshur. Gjatë muajit shtator, do të mbahen 6 seanca gjyqësore, ndërsa 7 të tjera janë caktuar në tetor.

Sipas Prokurorisë, Artan Grubi dhe 7 persona të tjerë akuzohen se kanë “Keqpërdorur detyrën zyrtare” pasi kanë qenë pjesë e operacionit për furnizimin e VLT aparateve për lojëra elektronike të fatit, për nevojat e Lotarisë Shtetërore edhe pse të njëjtat asnjëherë nuk janë përdorur, pasi që Lotaria Shtetërore nuk ka të drejtë ligjore për organizimin e pavarur të lojërave elektronike të fatit. Prokuroria e zhvilloi hetimin për veprën penale “Mashtrim në shërbim” për të cilën parashihet dënim me burg prej 4 deri në 20 vjet burg, megjithatë propozim akuzën e dorëzoi për vepër tjetër penale që parashikon dënim më të butë, respektivisht prej 1 deri në 5 vjet burg. /Alsat.mk

Lajme

E dhimbshme: Ky është kosovari që vdiq në detin e Shëngjinit

Një 18-vjeçar nga Kosova ka humbur jetën në zonën e Kunes, në Shëngjin, ndërsa burime të Klankosova.tv bëjnë të ditur se i riu është identifikuar si Shpëtim Syla.

I riu është gjetur pa shenja jete në ujë. Ende nuk janë të qarta rrethanat e sakta të ngjarjes, ndërsa autoritetet po hetojnë nëse 18-vjeçari është mbytur gjatë qëndrimit në det apo ka pësuar arrest kardiak.

Trupi i pajetë është transportuar në morgun e Lezhës, ku pritet t’i nënshtrohet ekspertizës mjekoligjore. Ekspertiza pritet të ndihmojë në përcaktimin e shkakut të vdekjes./Klankosova.tv