Lajme

Nga telefonatat tek interneti, qytetarët po ndryshojnë mënyrën e komunikimit

Tregu i komunikimeve elektronike në Maqedoninë e Veriut gjatë vitit 2025 pasqyron një fazë të qartë maturimi dhe transformimi, ku përdoruesit vazhdojnë të mbështeten fuqishëm në shërbimet mobile, por njëkohësisht po ndryshojnë mënyrën se si i përdorin ato. Sipas të dhënave më të fundit, gjatë vitit të kaluar abonentët e telefonisë celulare realizuan mesatarisht 104.05 thirrje dhe folën rreth 228.03 minuta në muaj. Këto shifra tregojnë se komunikimi zanor vazhdon të ketë një rol të rëndësishëm, megjithëse trendet globale sugjerojnë një zhvendosje graduale drejt komunikimit përmes internetit, përfshirë aplikacionet e mesazheve dhe thirrjeve online.

Struktura e trafikut tregon një dominim të fortë të komunikimit brenda të njëjtit rrjet celular, me 143.27 minuta ose 62.83 për qind të totalit. Ky fenomen lidhet kryesisht me ofertat komerciale të operatorëve, të cilat favorizojnë thirrjet brenda rrjetit të tyre. Nga ana tjetër, trafiku drejt rrjeteve të tjera celulare në vend arrin në 80.99 minuta, ose 35.52 për qind, duke reflektuar një ndërveprim të konsiderueshëm mes përdoruesve të operatorëve të ndryshëm, por ende më të kufizuar krahasuar me komunikimin “on-net”.

Thirrjet drejt rrjeteve fikse dhe ato ndërkombëtare përbëjnë një pjesë shumë të vogël të përdorimit. Konkretisht, vetëm 1.51 minuta shkojnë drejt rrjetit fiks të të njëjtit operator, 1.97 minuta drejt rrjeteve të tjera fikse dhe vetëm 0.29 minuta drejt rrjeteve jashtë vendit. Kjo tregon një rënie të dukshme të rëndësisë së telefonisë fikse dhe të thirrjeve tradicionale ndërkombëtare, të cilat po zëvendësohen gjithnjë e më shumë nga shërbimet digjitale. Krahasuar me vitin 2024, vihet re një rënie e përgjithshme e volumit të trafikut drejt të gjitha destinacioneve. Ky zhvillim konsiderohet si tregues i qartë i ndryshimit të sjelljes së konsumatorëve, të cilët po orientohen gjithnjë e më shumë drejt përdorimit të internetit mobil për komunikim, në vend të thirrjeve klasike.

Numri i abonentëve aktivë të telefonisë mobile në fund të vitit 2025 arriti në 1.954.643, që paraqet një rritje prej 1.82 për qind krahasuar me vitin paraprak. Kjo rritje është nxitur kryesisht nga abonentët rezidencialë me kontratë (post-paid), të cilët shënuan një rritje prej 2.55 për qind. Në të kundërt, segmenti i biznesit ka pësuar një rënie të lehtë prej 0.3 për qind, që mund të lidhet me optimizimin e kostove dhe përdorimin më të madh të platformave alternative të komunikimit.

Sa i përket konkurrencës në treg, ajo mbetet relativisht e përqendruar. A1 MK kryeson me 48.08 për qind të pjesëmarrjes në treg, e ndjekur nga Makedonski Telekom me 45.93 për qind. Operatorët më të vegjël si MTEL (4.42 për qind), Telekabel (1.36 për qind), Mtelmobile (0.10 për qind) dhe Green Mobile (0.11 për qind) kanë një rol më të kufizuar, por gjithsesi kontribuojnë në diversifikimin e ofertës dhe rritjen e konkurrencës në treg. Në segmentin e telefonisë fikse, në fund të vitit u regjistruan 457.763 përdorues, që paraqet një rritje modeste prej 1.75 për qind. Megjithatë, funksioni i linjës fikse po ndryshon gradualisht, duke u integruar gjithnjë e më shumë në paketa të kombinuara shërbimesh.

Një tregues i rëndësishëm i këtij transformimi është numri i abonentëve në shërbime të paketuara, i cili arriti në 445.831. Shumica e këtyre përdoruesve zgjedhin paketa që përfshijnë tri shërbime – telefoninë fikse, internetin me brez të gjerë dhe televizionin – duke reflektuar një orientim të qartë drejt ofertave “bundle”, të cilat ofrojnë më shumë komoditet dhe kosto më të ulët për konsumatorët. Në përgjithësi, të dhënat tregojnë se tregu i komunikimeve në vend po kalon nga një model tradicional i bazuar në komunikimin zanor drejt një modeli gjithnjë e më digjital, ku interneti dhe shërbimet e integruara po marrin rolin dominues në jetën e përditshme të qytetarëve. /Koha/

Lajme

Tragjedia në Venezuelë, momenti kur dy tërmetet e fuqishme godasin Karakasin. Shpallet gjendja e emergjencës, autoritete: Frikë për shumë viktima

Dy tërmete të fuqishme kanë goditur kryeqytetin e Venezuelës, Karakasin, brenda pak sekondash nga njëri-tjetri.

Lëkundja e dytë, me magnitudë 7.5 ballë, konsiderohet një nga tërmetet më të forta që ka prekur vendin e Amerikës së Jugut në më shumë se një shekull.

Si pasojë e tërmeteve, disa ndërtesa janë shembur në zona të ndryshme të qytetit, ndërsa banorët kanë dalë me nxitim në rrugë për t’u strehuar në vende më të sigurta. Gazetarët në terren kanë regjistruar momentet e lëkundjeve të forta që shkaktuan panik te qytetarët.

Presidentja e përkohshme e Venezuelës, Delcy Rodríguez, ka shpallur gjendjen e jashtëzakonshme në vend për të përballuar situatën emergjente.

Sipas deklaratës së saj më të fundit, të paktën 32 persona kanë humbur jetën, ndërsa rreth 700 të tjerë janë plagosur. Këto janë shifrat e para zyrtare të publikuara nga autoritetet lidhur me bilancin e viktimave dhe të lënduarve, ndërsa numri pritet të rritet ndjeshëm.

Ekipet e shpëtimit dhe emergjencave vijojnë operacionet në zonat e prekura, ndërsa autoritetet po vlerësojnë dëmet materiale dhe rrezikun e pasgoditjeve. Situata mbetet në zhvillim dhe pritet që numri i viktimave dhe të plagosurve të ndryshojë në orët në vijim.

https://x.com/californiapost/status/2069955064202919952?ref_src=twsrc%5Etfw%7Ctwcamp%5Etweetembed%7Ctwterm%5E2069955064202919952%7Ctwgr%5E1fc806654af336c61a0029f6da8640df1f676491%7Ctwcon%5Es1_&ref_url=https%3A%2F%2Ftop-channel.tv%2F2026%2F06%2F25%2Fvideo-tragjedia-ne-venezuele-momenti-kur-dy-termetet-e-fuqishme-godasin-karakasin-shpallet-gjendja-e-emergjences-autoritete-frike-per-shume-viktima%2F

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/