Lajme

Studentët refuzojnë politizimin e protestës, Memedi: Nuk jemi zë i askujt, kërkojmë vetëm drejtësi

Avokati i Studentëve në Universitetin “Nënë Tereza”, Suhejb Memedi, ka reaguar ndaj, siç i quan ai, përpjekjeve për politizimin e nismës studentore për mbajtjen e provimit të Jurisprudencës në gjuhën shqipe, duke theksuar se studentët nuk janë nën ndikimin e asnjë subjekti politik.

Në një deklaratë publike, Memedi u ka bërë thirrje qytetarëve dhe opinionit që të mos bien pre e provokimeve dhe dezinformatave që, sipas tij, synojnë ta paraqesin këtë lëvizje dhe protestën e së hënës si të dirigjuar nga opozita.

“Para të gjithëve dhe me plot ndërgjegje deklarojmë se nuk jemi nën komandën e askujt. Ne jemi disa studentë të thjeshtë që kërkojmë vetëm drejtësi”, ka theksuar ai.

Statusi i plotë i Suhejb Memedit:

Ju bëj apel të gjithëve mos bini pre e provokimeve dhe dezinformatave kinse ne jemi zë i opozitës, sepse para të gjithëve dhe me plot ndërgjegje deklarojmë se nuk jemi nën komandën e askujt. Ne jemi disa studentë të thjeshtë që kërkojmë vetëm drejtësi.

Sa i përket partive opozitare shqiptare, është e vërtetë që ata nuk e kanë bërë këtë për 20 e disa vite, por po aq fajtorë jeni edhe ju, partitë politike shqiptare që jeni në qeveri.

Na thoni ju cila është arsyeja që nuk e rregulloni që provimi i jurisprudencës të mbahet në gjuhën shqipe dhe të merrni meritat për një të drejtë që është e garantuar?

Prej kur kemi filluar, organizimin e vetmja përgjigje që kemi marrë është se është formuar një Grup Pune.

Nuk mund t’i merrni meritat e studentëve që nuk kanë bërë gjumë në sy për këtë të drejtë të pastër.

Andaj, ju bëj apel partive shqiptare mos na përdorni asnjëra palë. Kjo e drejtë është e drejtë e studentëve – rrini larg!

Lajme

Blerim Destani pushton Zurich Film Festival 2026

Blerim Destani pushton Zurich Film Festival me premierën botërore të filmit “BLOOD MONEY”

Aktori i njohur shqiptar Blerim Destani rikthehet fuqishëm në qendër të vëmendjes ndërkombëtare. Filmi i tij i ri, drama aksion “BLOOD MONEY”, do të shënojë premierën e tij botërore në edicionin e sivjetmë të Zurich Film Festival (ZFF), më 2 tetor 2026.

Përveç shfaqjes së parë të projektit për publikun e gjerë, ky festival do të rezervojë një hapësirë të veçantë për ekipin krijues. Më 3 tetor, Blerim Destani së bashku me bashkëpunëtorët e tij do të jenë pjesë e panelit prestigjioz të diskutimit “ZFF Masters”, ku do të ndajnë prapaskenat e xhirimeve dhe sfidat e realizimit të këtij projekti madhor.

Një kast i jashtëzakonshëm dhe debutimi i Noizy-t si aktor
Filmi mban firmën e regjisorit të vlerësuar Visar Morina dhe sjell një bashkim interesant emrash në ekranin e madh. Përkrah Blerim Destanit, në rolet kryesore luan aktori i mirënjohur gjerman Moritz Bleibtreu, si dhe reperi i dashur për publikun shqiptar, Noizy, i cili me këtë rol shënon debutimin e tij të parë si aktor në një film të metrazhit të gjatë.

Çfarë ndodh në “BLOOD MONEY”?
Ngjarjet e kësaj drame të errët të arteve marciale zhvillohen në qytetin bregdetar të Durrësit. Filmi ndjek historinë e Arionit (luajtur nga Noizy), një ish-i burgosur që rikthehet në dyluftimet e paligjshme të njohura si “The Circle”. Ai pranon të ndeshet për llogari të Ilirit (Blerim Destani), një personazh i zhytur në borxhe të mëdha. Gjërat marrin një kthesë të rrezikshme kur të dy përfshihen pa dashje në një rrjet të madh dhe të paligjshëm bastesh, duke vënë në rrezik gjithçka.

Për të gjithë artdashësit dhe adhuruesit e kinematografisë në Zvicër, biletat dhe oraret e plota të shfaqjeve tashmë janë të disponueshme në faqen zyrtare të festivalit (h ttps://zff.com/de).
/ Foto credits: Zürich Film Festival – Media zff.com /

Lajme

Jonida Vokshi me një mesazh të koduar për Monika Lubonjën

“Nuk janë fjalët, por prania, ajo që ka rëndësi”! Ky është mesazhi që Jonida Vokshi ka zgjedhur të ndajë në rrjetet sociale, në një moment kur mikesha e saj e afërt, Monika Lubonja, ndodhet në qendër të vëmendjes.
Prezantuesja dhe aktorja ka publikuar në Instagram një fotografi të shoqëruar me këtë fjali, pa dhënë detaje të tjera dhe pa e përmendur drejtpërdrejt emrin e Monikës.

Megjithatë, mesazhi është interpretuar si një shenjë mbështetjeje për aktoren, ndërsa situata e saj vijon të jetë në fokusin e opinionit publik.

Vokshi duket se ka zgjedhur të mos bëjë një deklaratë të gjatë apo të komentojë publikisht mbi atë që po ndodh, por të përcjellë një mesazh të shkurtër për rëndësinë e pranisë në momente të vështira.

Një postim i thjeshtë, por që përcjell idenë se mbështetja ndaj një personi të afërt nuk ka gjithmonë nevojë të shprehet me fjalë apo publikisht.

Lajme

Dëshmitari i Prokurorisë del në favor të Bajramit e Grubit

Dëshmitari i Prokurorisë në rastin “Lotaria”, Vllado Petkovski, është shpallur dëshmitar armiqësor pasi në dëshminë e tij dha përgjigje që favorizojnë të akuzuarit Përparim Bajrami dhe Artan Grubi.

Petkovski, drejtor sektori për lojërat e fatit në Lotarinë Shtetërore, tha se Bajrami kishte pasur qasje proaktive dhe kishte sjellë projekte të reja.

Për paraardhësen e tij, Katica Nikollovska, ai tha se nuk kishte bërë asgjë.

Sa i përket furnizimit me aparate VLT, Petkovski deklaroi se kishte marrë pjesë personalisht në procedurë dhe se ajo nuk kishte qenë kontestuese.

Kjo deklaratë bie ndesh me tezën e Prokurorisë se furnizimi ishte i panevojshëm dhe i kishte shkaktuar dëm buxhetit prej 9.7 milionë eurosh.

Petkovski tha gjithashtu se në Lotarinë Shtetërore ishte diskutuar mundësia që ajo vetë të organizonte lojëra elektronike të fatit.

Sipas tij, para furnizimit me VLT aparate ishin përgatitur dokumente, studim fizibiliteti, hulumtim tregu, si dhe ishin marrë mendime nga Ministria e Financave dhe Qeveria.

“Qëllimi ishte që i gjithë fitimi të mbetej te Lotaria Shtetërore dhe të mos ndahej me të tjerët”, deklaroi Petkovski para gjykatës.

Pas këtyre përgjigjeve, Prokuroria hoqi dorë nga dëshmitari, por kërkoi që ai të merrej në pyetje përmes pyetjeve të kryqëzuara, ndërsa avokati i Grubit, Goce Ristevski, tha se dëshmia e konfirmon tezën e mbrojtjes.

Seancat e radhës do të vazhdojnë me dëgjimin e gjashtë dëshmitarëve të tjerë, ndërsa tetë të akuzuarit përballen me akuzën për keqpërdorim të detyrës zyrtare, vepër për të cilën parashihet dënim prej një deri në pesë vjet burg.